― 74 ―
„Engko djoega semalem tida bisa tidoer, sebab pikirin Nona tidoer sendirian disini!”
„Koh soeda makan nasi blon, kaloe blon mari makan sama-sama adja !” kata si Manis, sembari bersenjoem.
„Blon Nona lantaran Engko riboet sama bini Engko djadi blon makan lagi. Engko soeda dateng kamari !”
„Kenapa bole djadi riboet?”
„Setaoe siapa jang soeda mengadoe, maka dia dapet taoe jang Engko baroe kawin lagi sama Nona !”
„Apa dia taoe saja tinggal disini ?”
„Engga, dia tida dapet taoe !”
„Baek djoega dia tida taoe, kaloe dia taoe, tentoe dia dateng kamari Koh, abis saja bagimana nanti djadinja?”
„Engga masa, dia brani dateng kamari !” kata Baron Lini, jang maoe bikin senang hatinja ia poenja djinge.
Tatkala makanan soeda sedia diatas medja, itoe doea orang moeda laloe doedoek bersantap.
Malem djem sepoeloe itoe Baron baroe bisa keloear dari roemanja ia poenja bini moeda aken brangkat poelang ka roemanja.
Setelah berselang ampat hari sedari hari kawinnja si Manis, toekang kasi sewa prabot orang kawin, toekang masak, toekang moesik, rekening panggil wajang, dan rekening sewa pakean penganten, semoewa pada dateng tagi oewangnja di Gang Tjaijho, apa maoe djoestroe di itoe waktoe Baron Lim ada di itoe roema.
„Kenapa loe engga minta disana ?” kata itoe Baron pada sekalian orang, jang dateng menagi oewang.
„Njonja di sana tida bisa bajar lantaran dia soeda kala maen maka saja dateng kamari, Ba !” kata toekang moesik.
Dan begitoe poen laen-laen penagi oetang ada oetjapken seroepa perkatahan.
