— 71 —
seperti Nona!” kata itoe Baron jang laloe tarik napas pandjang pendek dan oesoet-oesoet dadanja.
Lantaran takoet jang Babanja nanti djadi goesar, si Manis lantas doedoek dengen tida toetoep ia poenja moeka lagi sama kaen klamboe, tetapi ia masi toendoekkin sadja ia poenja moeka.
„Mari dong Nona manis djantoeng hatikoe! Kaloe Nona tjinta pada Engko djangan dong maloe-maloe!„ kata itoe Baron poelah, sembari gapein ia poenja bini moeda.
Si Manis lantas samperin pada Babanja, sembari berkata: „Koh, boekan saja engga tjinta sama Engko, tetapi saja merasa maloe si, sebab baroe ketemoe Engko ini malem!”
„Maloe apa si, marilah kita reba-rebahan!” kata itoe Baron jang laloe betot tangannja si Manis; dan kemoedian itoe anak moeda jang soeda tiada bisa tahan lebi lama ia poenja hati jang rindoe, soeda tolak badannja ia poenja bini moeda ka atas pembaringan, hingga itoe gadis terpaksa misti toeroet oendangannia ia poenja Baba.
Maskipoen si Manis masi berlakoe maloe-maloe achir-achirnja itoe pengrasahan maloe soeda djadi linjap dengen sekedjepan Sadja, lantaran pengaroenja Natuur jang amat besar pengrasahan mana sama djoega sebagi mega mendoeng soeda djadi trang oleh kerna ketioep angin jang kras. Koetika itoe Baron tjioem pipinja si Manis, itoe prampoean moeda jang pada itoe waktoe masi ada satoe gadis, telah membales tjioem lagi ia poenja Baba, sembari kasi liat senjoeman jang manis, perboeatan mana membikin berkobar lebi besar lagi api birahi dari itoe lelaki moeda, sebagi api jang lagi menjala di siremken minjak tanah. Apa itoe doea orang moeda lagi berboeat, ini memang soeda roemranja doenia, djika tida ada ini plesiran doenia, kita poen maoe pertjaia, bahoewa di ini doenia jang loeas, tida djadi begitoe rame
