- 42 -
„Ajo, tarik da!” kata poelah laen prampoean.
Itoe orang-orang prampoean lantes moelai tarik kartoe, dan dengen begitoe ia orang djadi berdjoedi, jang satoe lempar perit, sedeng jang laen boewang koetjing, lempar melempar toekar menoekar kartoe, hingga sala satoe telah djadi poetoes.
Baroe sadja Entjim Asie doedoek maen boeat tiga djem, oewangnja soeda djadi poetoes sama sekali, hingga ia telah djadi kelabakan, seperti ikan jang tiada dapet aer; boeat maen teroes, soeda tentoe orang tida maoe adjak, sebab ia tida bisa bajar, djika ia djato kala; boeat minta pindjem oewang tida ada orang jang maoe kasi pindjem, maka dengen roepa jang doeka ia pergi samperin si Isa, sembari berkata: „Isa tjari‘in goea doeit gi!”
„Itoe Baba soeda engga taoe dateng si disini, dimana saia bisa tjari-in doeit boeat Njonja ?”
„Engga pindjemin adja sama laen orang.”
„Njonja si maoe gampangin sadja, oewang orang kaloe kita maoe pindjem kan soesa, dia maoe taoe doeloe, apa kita bisa bajar atawa tiada, engga seperti itoe Baba orangnja tjintjaij, tetapi boeat Njonja si sebetoelnja teroesa soesa oewang, sebab njonja ada poenja anak prampoean jang berparas eilok.”
„Anak prampoean seperti si Ros si goena apa?”
„Apa Njonja si engga bisa kasi mengarti, tjoba saja jang omongin padanja, tentoe ia menoeroet.”
„Nah, kaloe begitoe tjoba loe pergi ka roemanja, goea kepengen taoe!”
„Baek, sekarang djoega saja pergi ka sana!” kata si Isa, jang laloe brangkat pergi menoedjoe ka Gang-Semoet.
Tatkala ia ia sampe di roemanja si Ros, kebetoelan Babanja si Ros, lagi pergi keloear, dan si Mina
