— 36 —
Dasar peroentoengannja Entjim Asie ini hari ada bagoes baroe-baroe tarik sadja, ia soeda dapet tiga pasangan, dan koetika ia balik-balik lagi kartoe-kartoe laen, dengen sebentaran sadja ia soeda poetoes dan di itoe hari ia soeda menang anam roepia.
Pada waktoe sore itoe pementopan soeda poelang di roemanja dengen hati jang girang, tetapi ia soeda djadi kesel poelah. koetika si Manis kasi taoe, bahoewa barang dagangan semoewa soeda djadi abis, sedeng wang poen tiada ketinggalan sekepeng, hingga besok ia tida bisa mendjoealan lagi.
„Kamana doeit pendjoealannja ?”
„Pan abis Memeh dan Asoek ambilin !”
„Brapa banjak itoe pemadatan ambil oewang saban hari ?”
„Satoe hari Asoek pake paling sedikit satoe roepia!”
„Kemana dia sekarang?” tanja sang iboe dengen roepa jang goesar seperti satoe matjan, jang maoe toebroek korbannja.
„Blon poelang, Meh!”
„Sabentar kaloe dia poelang, goea labrak biar dia lekasan mampoes!” kata Entjim Asie, jang boeka moeloet besar-besar, hingga orang boleh dapet liat giginja jang item lantaran soeda karatan kena loeda siri.
Si Beto jang lagi berdiri di sampingnja, koetika meliat glagatnja tida baek, laloe berkata pada iboenja: „Meh, doeit soeda abis di pake, Memeh mara djoega tiada goenanja !”
„Ja! loe soeroe goea kesianin adja pada si pemadatan, tapi dia sendiri tida taoe diri!”
„Baekan sekarang Memeh pergi pindjem doeit pada Entji Seroeni !” kata si Manis dengen roepa jang doeka.
„Brapa loe perloe pake ?” kata itoe iboe pementopan dengen lakoe sebagi satoe njonja besar, kerna kantongnja ada terisi oewang tiga poeloe satoe roepia.
