― 57 ―
„Ajo, lekas boeka pintoe, kan orang liatin kita riboet di di loear !”
„Prampoean jang moeka tebel dan bopan masa taoe maloe !”
„Loe kaloe maoe tjerein djoega sama goea, goea maoe ambil goea poenja pakean !”
„Pakean apa loe ada poenja, koetika loe kawin sama goea, loe tjoema bawa satoe badjoe dan satoe kaen, sebab itoe pakean jang loe bawa semoewa ada di bli dari goea poenja doeit, jang goea kasi pada itoe prampoean toewa doerhaka banjaknja doea ratoes roepia boeat mas kawin !”
„Hm, bagoes ja ! pakean goea loe maoe kasi prampoean loe jang baroe pake !”
Orang-orang jang liwat di itoe straat, semoewa lantes pada brenti menonton itoe pertjidrahan moeloet antara soewami-istri, hingga Entjek Hwa Hin merasa maloe, djika ia teroesken itoe pertjektjokan, maka ia laloe tinggalken istrinja dan pergi naek sado.
Si Ros, jang meliat soewaminja soeda tinggal pergi, djadi tida ada harepan boeat dapet ampoen lagi dan dapet kombali pakeannja ; dengen aer mata berlinang-linang ia ikoet iboenja poelang ka Angke.
„Ja Meh bagimana nanti djadi dengen saia poenja diri ?” kata si Ros, sembari menangis sengak sengoek.
„Doenia masi lebar, doenia boekan sedaon kelor dan menoesia ada banjak. Orang jang bagoes seperti loe djangan slempang tida dapat laki !” kata sang iboe doerhaka, jang maoe hiboerken hatinja ia poenja anak.
Baeklah kita tinggalken doeloe perdjalanannja ini doea prampoean hina, dan balik meliat pada itoe tjoete-idoeng-poeti, jang telah djato terletak di atas tanah dengen loepa orang.
„Tit for Tat” — „Leer om leer” begitoelah boenjinja pepata di dalem bahasa Inggris dan Olanda ; kita orang
