— 40 —
djoega tentoe ia nanti bisa dapet wang lagi dari itoe tjoetee-idoeng-poeti jang sanget roijal boeat madjoe lagi di atas tiker.
„Njonja marih sini saia maoe adjak bitjara sedikit !” kata si Isah dengen niatan, soepaja itoe orang moeda djadi tinggal berdoea-doeahan sadja.
Itoe iboe jang doerhaka setelah denger itoe omongan ia djadi dapet tebak kehendakan si Isah; sembari mengikoetin si Isah ia berkata. „Ada apa, Sah!”
Dengen begitoelah itoe doea orang moeda djadi tinggal berdoea-doea sadja.
„Enso oemoer brapa sekarang ?” tanja itoe tjoete-idoeng-poeti dengen mesem.
„Doea poeloe ampat taon !”
„Ach sajang sekali! saja dateng keblakangan, hingga satoe boenga Ros, jang begitoe bagoes soeda di petik oleh laen orang !”
Bisa adja Koh !” sahoet si Ros, jang sekarang soeda tida maloe-maloe lagi, setelah denger itoe perkataän.
„Ja, betoel saia menjesel sekali, jang saja tida bisa kawin pada nona!”
„Kenapa Enko engga dateng lamar, saia sih seperti barang dagangan, siapa jang maoe bli, tentoe di kasi !”
„Kaloe begitoe, sekarang sadja saja lamar.”
„Eh, gampang gambir, tembako Tjina, gampang Enko maoe ambil, sekarang saia soeda ada jang poenja.”
„Ach itoe sih melengkan nona poenja pikiran, kaloe nona soedi sama saia, maski di djaga bagimana keras, toch kita masi bisa tjari akal boeat bertjinta-tjintaän!”
„Masa, apa sebetoelnja Enko tjinta pada saia ?”
,,Soemboe mati Nah!”
„Memang djoega soemboe mati, kaloe engga ada minjaknja!” kata si Ros, seraja tertawa berkikikkan.
