– 23 –
bisa bersatoe hati dan dapet taoe djoega bahoewa pladjaran ada sanget bergoena boeat orang mentjari pengidoepan, semantara boeat bladjar bahasa asing ada terlaloe soesa boeat bisa di trima didalem itoe sekola serta pembajarannja ada sanget mahal, djika boekan anaknja orang hartawan atawa orang jang dapet gadji besar soeda tentoe tida bisa dapet itoe pladjaran, maka itoe ia orang soeda berdiriken Tiong Hoa Hwee Koan.
Koetika Tiong Hoa Hwee Koan telah berdiri, banjak sekali orang Tionghoa soeda kirim anaknja bladjar di itoe sekola, begitoe djoega toean Tek Boen soeda kasi masoek si Keng Hok ka itoe roema pegoeroean.
Di dalem itoe sekola Keng Hok ada djadi moerid jang paling pinter dan ia ada doedoek di klas jang paling tinggi. Maski perkarangannja itoe roema sekola ada sanget lebar, dan gedonguja ada loeas, tapi jang di pake boeat tempat sekola tjoema di pertengaän sadja, sedeng jang membri pladjaran pada itoe semoewa moerid-moerid tjoema satoe goeroe kepala jang tinggal di samping sebla kiri dari itoe roema sekola, dan di samping sebla kanan ada satoe baris roema petak ketjil jang soeda toea dan di sewaken pada orang orang. Ini gang bisa teroes menemboes ka gang Lamijeng, di blakang itoe roema sekola ada satoe tanah kosong jang blon di oeroes betoel, roeboean temboknja roemah-roemah masi di tinggalken mengandang di sana-sini.
Moerid-moerid prampoean dan moerid-moerid lelaki poen ada di tjampoer djadi satoe.
Keng Hok ada jang paling di sajang oleh itoe goeroe kepala. Setelah berselang doea tiga taon, itoe roema sekola telah djadi madjoe sekali dan djoega satoe goeroe Inggris bangsa Tionghoa, Toean Lie jang baroe loeloes dari pepreksahan di Amerika ada membri pladjaran Inggris pada itoe moerid-
