- 38 -
bersetia dari fihak Enko saja minta Enko poenja hati dan blas-kesian pada diri saja, soepaja Enko bisa tjinta dan sajang pada saja jang soeda kenjang teroembang-ambing di gloembang kasangsarahan dan tersia-sia. Mati atawa idoep saja poenja njawa saja seraken di tangan Enko saorang, jang saja taro harepan besar bahoewa kita orang aken bisa idoep roekoen dan broentoeng. Kapan Enko soeda tetep boeat ambil saja poenja diri jang boeroek djadi Enko poenja Dji Nio, besok pagi kita orang misti lantes pinda dari ini tempat, kita orang tjari satoe tempat jang dingin, soeroep boeat liwatin kita poenja tempo dan dapetken itoe kesenangan, sebagi sepasang penganten, sebagimana jang Enko soeda ketemoein di kreta api.“ kata Dji Nio sambil senderin kepalanja di dada saja.
,,Akoer, saja moefaket sekali, dengen begitoe kita orang seperti djoega idoep di Sorga.“
Bebrapa hari berselang kita orang soeda berdiam di Malang di sala satoe hotel jang sopan.
- 39 -
Malang ada satoe kota jang terkenal dengen hawanja jang sanget njaman, dimana ada djadi tempat kediamannja orang-orang hartawan, orang Militair dan Ambtenaar jang pensioen, boeat djadi lebi trang bagi pembatja, itoe kota bole di oepamaken seperti di Batavia poenja Buitenzorg, begitoe Soerabaja soeda merasa bangga dengen itoe kota.
Djoestroe kamar dimana tempat jang saja tinggalin ada berhadepan dengen Fontain aer dari itoe hotel, dengen doedoek di galerij depan dari saja poenja kamar jang memang ada disediaken medja dan krosi peranti tetamoe doedoek makan angin, saja bisa pandang itoe aer mantjoer seperti djoega di Pasar Gambir.
Saja sengadja kenangken saja poenja pikiran sebagi djoega saja lagi idoep di Paradise dengen saja poenja Dji Nio, itoe bidadari jang baek dan manis boedi.
Pada soeatoe hari selagi saja reba di krosi pandjang, Dji Nio peen laloe toeroet doedoek di samping saja, sambil senderin badannja di saja poenja dada, hingga dengen begitoe moeka saja dan moekanja djadi berhadep-hadepan.
