Beng Lee Koen/Volume 14
„Bahoea dengen Sin ampoenja oesia moeda, mendadak beroleh ini kedoedoekan jang moelia, tiada bisa disangkal soeda menerbitken orang poenja ketjoerigaän hati. Sekarang kombali di hadepan kraton. Pihe oetjapken ini perkataän maen-maen, itoelah bakal menegoeken orang poenja tjemboeroean, bahoea Sin poenja djabatan telah diperolehken dari satoe pengaroeh jang tiada selajiknja. Apalagi antara radja dan mantri ada sama seperti antara ajah dan anak, maka djikaloe sampe tjara-tjara bermaen dioendjoekin, pastilah terdjadi jang radja boekannja radja, sebaliknja mantri poen boekannja mantri, dengen begitoe begimanalah Sin nanti bisa berkerdja semoestinja aken goena Pihe. Biarlah keblakangan, Pihe nanti soeka beratiati melepasken bitjara dan djangan oendjoek tjara bermaen pada mantri-mantri, kerna itoe boekan sadja membikin Pihe poenja keagoengan djadi bernoda, tapi djoega seperti membri andjoeran aken sang mantri tiada pandeng mata terhadep Pihe. Demikianlah dengen mengambil kegoblokan sendiri dan tiada menjingkir dari hoekoeman, Sin madjoeken ini perkataän jang bisa djadi menerbitken Pihe ampoenja kemorkahan, sambil mengharep Pihe maoe ambil perhatian, begitoe kemoedian negri dan keradjaän aken bersoekoer, djoega Sin sekalian aken toeroet bersoekoer.”
Mendenger itoe perkataän, Seng Tjong merasa maloe sendiri dan tiada bisa oetjapken barang sepatan perkataän. Tetapi, itoe radja dan mantri masi teroes doedoek makan dan minoem dengen penoe kegoembirahan dan sepoeasnja, sampe sang matahari moelaistjondong ka barat baroelah itoe perdjamoean ditoetoep. Semoea sorang pada boebaran, begitoe djoega Beng Tong bersama mertoeanja telah balik poelang ka gedongnja, di mana So Hoa soeda dateng menjamboet, serta kemoedian bersama-sama naek ka loteng, masoek dalem kamarnja sendiri. Di sitoe, Beng Tong kasi keloear itoe sepoeloe bidji moetiara besar, sembari toetoerken halnja Thaij Houw telah membri persenan.
⁂
Arkian terseboet itoe doea orang soeroean dari Lee Beng Tong jang membawa pakean-pakean anoegrahan dari sri-baginda, koetika seliwatnja pertengahan boelan Pek-gwee marika baroe sampe di bilangan Ouw Kong, dan sebelonnja dateng di roemanja Khong Djia San, lebi siang iaorang telah minta orang aken lebi doeloe merapportken ini hal pada Khong Djia San.
Mendapet ini warta, nalangkah sgirangnja kitapoenja Wangwee, boeroe-boeroe ia prenta orangnja dengen dibekelin oewang boeat sigra pergi menjewa seprangkat bendera-bendera, Tjhaij dan laen-laen keperloean boeat arakan, berikoet satoe stel tetaboean jang compleet betoel, aken goena menjamboet itoe anoegrahan dari baginda keizer dateng ka roemanja.
Begitoelah dengen segala keramean itoe perarakan kemoedian sampe di depan gedongnja Khong Wangwee, di mana Djia San soeami-istri telah sediaken medja sembajang serta dengen berloetoet menerima itoe pakean pakean dan Hong-khwa kebesaran. Sesoeda oepatjara penerimaän mendjadi beres, Khong Djia San laloe memake iapoenja pakean kebesaran, demikian poen Soen Sie memake iapoenja Hong-khwa, dengen berbareng marika bersoedjoed mengadep ka djoeroesan oetara, hatoerken iaorang poenja trima kasi atas boedinja sri-baginda.
Lebi djaoe Khong Wangwee, poen titah orangnja aken sigra menjediaken medja perdjamoean boeat mendjamoe itoe kedoea orang soeroean, siapa setelah menjerahken soeratnja Beng Tong, poen lantas pada pergi doedoek makan-minoem dengen goembira. Samentara Djia San itoe tempo telah berdjalan masoek ka dalem, boeka soerat terseboet dan batja di hadepannja itoe banjak orang, jalah tentang halnja pinda tinggal di kota radja.
Da Baroe habis membatja. Soen Sie telah minta sang soeami masoek ka dalem kamar, seraja menanja katanja:
„Begimana kaoepoenja pikiran, apakah maoe djoega pergi ka kota radja?”
„Pertanjaän edan!” Berkata Djia San dengen ketawa, kaloe akoe nanti berada di kota radja, setiap waktoe akoe bisa berdampingan dengen satoe Tjaij Siang dan satoe sama laen saling berbasa dengen panggilan „Tjhin Ong”, tidakah itoe ada satoe kehormatan dan kemoeliaän jang tiada terhingga? Begitoelah akoe telah ambil ketetepan aken bersama-sama kedoea goendik dan anak-anak sekalian pergi tinggal di kota radja, boeat bisa itjipin, kemoeliaän dan kedjajaän doenia, samentara kaoe sendiri boleh tinggal sadja di sini boeat tilikin kitapoenja antero harta-benda.”
„Akoe djoega hendak tinggal di kota radja,” berkata Soen Sie, „soepaja bisa dampingan setjara mertoea dan mantoe dengen satoe Tjhian-kim Siotjia.”
„Kaloe kaoe djoega hendak ikoet ka kota radja,” berkata Khong Djia San, sama siapakah kita moesti serahken oeroesan menilik segala harta-benda ?”
„Soeda tentòe pada kitapoenja anak prempoean,” djawab Soen Sie dengen lantjar.
Djia San djadi pikir dalem hatinja, bahoea kapan sepotong roti terdjato di tana, itoelah berarti satoe kemoedjoeran bagi andjing. Ja, ini djoega soeda dasar bintang terang dari mantoenja, hingga ia bakal alamin peroentoengan bagoes, kerna dengen serahken kekoeasaän atas segala oeroesan harta-benda pada iapoenja anak prempoean, tiada beda seperti diserahken pada mantoenja. Tetapi, maski hati merasa koerang poeas, Djia San toch kepaksa menoeroet djoega.
XXXV.
Teng Tjioe Tjin mengirim rekest moehoen bala-bantoean. Lee Peng Po madjoeken voorstel mengoempoel orang gaga.
Setelah ini permoefakatan mendjadi beres, Soen Sie lantas pergi ka blakang atawa sesoedanja berhadepan dengen iapoenja poetri, Sin Kim, ia lantas menoetoerken tentang maksoednja hendak ikoet brangkat ka kota radja.
„Biarlah Hoetjin sadja jang brangkat lebi doeloe, sedeng Boetjin boleh menjoesoel blakangan,“ berkata Sin Kim, „bernanti sampe anak soeda bersalin, baroelah Boetjin boleh pergi tinggal di kota radja, kerna kaloe tiada ada Boetjin di sini, waktoe anak melahirken, siapakah jang nanti bisa meliat-liatin ?“
Boeat sesaät lamanja Soen Sie tinggal terpekoer, achir-achir ia berkata:
„Baeklah, akoe tinggal di sini boeat toenggoe sampe kaoe telah melahirken anak, brangkat sekarang djoega hatikoe bakalan tiada bisa merdika betoel.“
Kemoedian ia lantas dateng djoempaken poela sang soeami, menjataken tentang oeroengnja iapoenja maksoed, sebab terhalang oleh Sin Kim jang tiada lama lagi bakal bersalin. Djia San tentoe sadja membenerken itoe tindakan.
Besok harinja, sembari minta orang piliken hari baek serta mengatoer segala keperloean boeat brangkat. Djia San traoeroeng telah memake iapoenja pakean kebesaran, membawa pengiring-pengiring dan doedoek djoli kebesaran, koendjoengin berbagi-bagi pembesar negri dan sobat-andenja; lebi djaoe mendjamoe tetamoe boeat hadlirken iapoenja pesta jang dibikin begitoe rame, sebagi tanda membri slamet tinggal atas iapoenja brangkat ka kota radja.
Kapan semoea soeda beres dan itoe hari jang ditetepken telah sampe, dengen membawa iapoenja doea goendik dan poetra, berserta bilang blas boedak - boedak prempoean dan lelaki, Djia San langsoeng brangkat djalan, dengen teriring oleh sepasang telong besar di mana ada tertoelis hoeroef-hoeroef jang berboenji: „Peng Po Siang Sie“.
Demikian pada sepandjang djalan jang diliwatin, soeda ada itoe berbagi-bagi pembesar militair jang antero berada di bawah pegangan Peng Po, saling ganti telah mengadaken pengantaran dan perlindoengan speciaal dengen satoe pasoekan ketjil soldadoe negri soenggoe inilah bisa dibilang satoe kehormatan besar dan menambaken soemarak loear biasa bagi itoe rombongan orang jang melandjoetken perdjalanan.
Koetika ampir sampe deket kota radja, itoe doea orang soeroean dari Beng Tong terlebi doeloe soeda kirim orang masoek dalem kota boeat membri rapportan. Samentara Beng Tong sesoeda trima ini warta, tiada lama berselang ia poen telah berada di loear pintoe kota boeat menjamboet.
Sebentar lagi, Khong Djia San dengen laen - laennja keliatan sampe di itoe pasanggrahan di mana Beng Tong ada menoenggoe. Orang brenti sebentaran di sitoe boeat minoem thee, kemoedian laloe doedoekin poela masing-masing poenja djoli dan meneroesken perdjalanannja.
Beng Tong lebi doeloe balik poelang ka Siang Hoe dan bersama Nio Siang iaorang bersedia dan doedoek menoenggoe di pertengahan gedong, aken menjamboet kedatengannja Khong Wangwee.
Tiada antara lama, Khong Djia San bersama doea goendik serta laen - laennja telah sampe depan gedong Siang Hoe, di mana orang soeda memboeka pintoe tenga, sedeng Nio Siang keliatan toeroen ka bawah oendakan boeat memapak.
Tatkala baroe sadja menampak Nio Siang lagi mendatengin, Khong Djia San boeroe-boeroe toeroen dari djolinja, madjoe ka depan dan hendak membri hormat dengen tjara berloetoet, tapi Nio Siang keboeroe memegat sembari berkata:
„Atas Tjhia - ong ampoenja kedatengan, Lo Hoe telah alpa menjamboet djaoe, hareplah soedi dimaäfken.”
Khong Djia San hatoerken trima kasi, seraja membales katanja:
„Siauw Dji soeda menerima Thaij Soe ampoenja ketjintaän berikoet pimpinan, Lo Han merasa menanggoeng, boedi boekan ketjil, sekarang kombali moesti hadepken penjamboetan demikian besar. soenggoe Lo Han merasa berat boeat trima.”
Begitoelah dengen saling merendah, kedoea besan ini lantas naek ka pertengahan dan kemoedian berdoedoek dengen terbagi antara toean roema dan tetamoe, sedeng Beng Tong poen mengambil tempat doedoek di samping.
Apabila soeda disoegoeken thee, Nio Siang sigra prenta orang pergi panggil poetrinja boeat keloear djoempaken sang mertoea
Sesaät berselang, So Hoa keliatan telah berdjalan keloear, Beng Tong poen bangoen berdiri laloe bersama-sama membri hormat dengen berloetoet di hadepannja Djia San dan ini orang toea djoega membales dengen setenga hormat. Dari sini, kedoea soeami-istri itoe langsoeng mendjalanken lagi kehormatan pada kedoea goendik itoe, tapi dalem tjara terhadep pada orang sepantaran sadja, baroe kemoedian itoe doea goendik diadjak masoek ka roeangan blakang aken berdjoempa dengen Keng Hoedjin, di mana orang doedoek beromong-omong.
Oleh kerna ini pertemoean ampir tiada membawa laen-laen kedjadian, maka biarlah kita tinggalken sampe di sini, hanja ada lebi penting kapan kita balik menilik atas segala kedjadian dalem keradjaän.
Adapoen Lee Beng Tong sedari soeda naek pangkat mendjadi Peng Po Siang, setiap hari ia tentoe bersama-sama dengen laen-laen pembesar berada di dalem kantoran dari kraton boeat melakoeken pepreksaän atas segala soetat-soerat rapportan maoepoen rekest-rekest dari berbagi-bagi kota dan provincie seloeroe negri, boeat mana sesoeatoe mantri jang berkewadjiban haroes menaro tjatetan dari ia sendiri ampoenja pendapetanbbegitoe djoega advies dalem itoe oeroesan. Dan Beng Tong jang memang terkenal ada saorang berotak tadjem dan mempoenjai ketjerdikan loear biasa, maka djoega iapoenja sesoeatoe pendapetan dan pikiran kebanjakan ada harganja dan djitoe betoel dengen adanja hal, lagi ia ada amat adil dan djoedjoer, hingga ampir tiada perna kedapetan perboeatan jang berat sebela. Ini sebab, sesoeatoe oeroesan dan soerat-soerat jang djato dalem tangannja Beng Tong, iapoenja pendapetan serta advies selaioe mendapet kesetoedjoean, sri-baginda, hingga ampir bisa dibilang apa jang ia kerdjaken dan oeroes, pasti dapet perkenannja baginda aken boleh didjalanken dengen zonder bersangsi-sangsi poela.
Tiada heran, jang moelai dari baginda keizer sampe pada sekalian mantri-mantri ampir tiada ada satoe jang tiada menaro indah dan pandeng tinggi pada Beng Tong, begitoelah boeat segala apa jang divoorstelken olehnja, senantiasa didenger dan ditoeroet oleh Seng Tjong. Tetapi, biarpoen begitoe, Beng Tong masi djoega belon mendapet djalan boeat bisa berkerdja aken goena menoeloeng atawa mengangkat pada bakal soeaminja, inilah membikin ia selaloe berdoeka dan tiada merasa poeas.
Itoe waktoe orang berada di antara boelan Kauw-gwee.
Pada soeatoe hari, selagi sri-baginda doedoek bersidang di tachta keradjaän, tiba-tiba Ngo Boen Kwa telah masoek mengadep dan merapport katanja:
„Sekarang soeda dateng dan menoenggoe saorang soeroean dari San Tong poenja Soen Boe, Peng Djoe Tek, dengen membawa satoe soerat rekest.”
Baginda laloe titah panggil itoe orang soeroean masoek mengadep, jang setelah dipersembahken itoe rekest, baginda titah pembesar Tit Djit Hak Soe boeat batjaken boenjinja soerat terseboet; dalem mana, antara laen- laen ada diwartaken tentang halnja Tjin Wie Taij Tjiang Koen, Jo Peng Gie, jang sedari taon berselang membawa sepoeloe-riboe balatentara, madjoe ka Teng Tjioe berhadepan dengen moesoe, tapi lantaran Tiauw Sian poenja Koen Soe, Sin Boe To Djin, ada poenja ilmoe siloeman jang amat Lihaij, mendjadi setiap kali maloemken peprangan setiap kali djoega beroleh keroesakan, sampe Jo Peng Gie sama sekali tiada bisa berdaja lagi, achirnja d boelan Tjhit gwee ia telah menoetoep mata lantaran moenta dara. Samentara itoe, pasoekan moesoe jang masi djoega lakoeken penjerangan teroes-teroesan pada Teng Tjioe, kerna koeatir seliwatnja boelan Kauw-gwee bakal toeroen oedjan - saldjoe, hingga aer laoet bakalan mendjadi bekoe dan soeker ditempoeh oleh praoe-praoe, amat bisa djadi marika aken sigra moendoer ka poelo Soa Boen To. Begitoelah marika oewarken kabar, bahoea di antara boelan Sha-gwee taon mendateng, pasti bakal madjoe poela aken menerdjang dengen sepenoenja tenaga pada seloeroe provincie San Tong. Demikian dimoehoen, aken sri - baginda goenaken itoe tempo sedeng moesoe moendoerken pasoekannja, lantas adaken persediaän atawa mengirim panglima-panglima bidjaksana berikoet satoe pasoekan besar boeat menoeloeng Teng Tjioe jang terantjem heibat. enz.
Apabila itoe rekest soeda terbatja habis, baginda laloe menanja pada sekalian mantri-mantrinja:
„Garang betoel itoe Tiauw Sian jang saben kali membikin roesak kitapoenja balatentara, pantes sekali moesti dikasi hadjaran. Siapakah di antara sekalian Tjiang Koen jang ada, brani dan maoe bawa pasoekan balatentara boeat pergi melawan moesoe?”
Tapi maski berkali-kali ini pertanjaän dioelangken, toch tiada ada satoe soeara djoega jang menjaoet, sampe baginda djadi pegel dan bersabda lagi dengen roepa tiada seneng:
„Pertjoema Tim mempoenjai, begitoe banjak panglima perang, tapi soeda tiada ada satoe djoega jang brani mengorbanken djiwa boeat membela negri. Semoea takoet mati, och, soenggoe ini ada amat menjakitin!”
Tetekala mana, Beng Tong djoega ada terdapet di antara sekalian mantri - mantri jang bersidang, sedari soeda mendenger itoe rekest dari Teng Tjioe dibatjaken, dalem hati siang - siang telah berpikir, bahoea sewaktoe negri lagi terantjem dan terdesek, brangkali ia dapet djalan aken tjoba berichtiar aken sang toenangan oendjoekin diri serta berdiriken pahala bagi negri. Maka kemoedian ia laloe keloear dari tempatnja, madjoe berloetoet di hadepan sri - baginda dan oedjarnja:
„Pihe ampoenja kemorkahan, Sin pertjaja ada sedikit kliroe tempatnja. Semoea panglima jang ada di keradjaän, boekannja tiada bisa bersetia, djoega boekannja takoet mati. Sebetoelnja marika sekalian hanja masoek dalem golongan orang gaga di atas daratan, sebaliknja kapan satoe kali toeroen di kapal perang dan berada tenga laoetan, marika aken tiada bisa tetep berdiri maoepoen berdoedoek, moenta - moenta dalem keadaän orang sakit paja, maka seande dengen gegaba membawa pasoekan boeat berhadepan pada moesoe, tiada bisa disangkal selaen bakal mengorbanken banjak djiwa dengen sia-sia, malahan poen bisa meroegiken keangkerannja negri. Ini sebab, mengapa soeda tiada ada satoe djoega jang brani oendjoekin diri.”
„Ja, Keng poenja pembitjaraän bener sekali,” bersabda baginda, „aken tetapi, djika tiada keloearken tentara boeat menangkis serangan moesoe, apakah moesti diliatin sadja Teng Tjioe djato dan moesoe kemoedian menerdjang sampe kemari, sedeng kita sekalian tinggal pelok tangan boeat menerima kematian.”
„Menoeroet Sin poenja pengliatan,” berkata lagi Beng Tong, „kekoeatan pasoekan Tiauw Sian ada amat besar, tambahan lagi marikapoenja Koen Soe mempoenjai ilmoe siloeman jang begitoe Lihaij, soeker sekali boeat bisa dimenangin. Soekoer kita sekarang berada, di moesim dingin, jang lantaran bekoenja aer laoet, moesoe kepaksa brentiken peprangan boeat lamanja bebrapa boelan; maka dengen menggoenaken ini tempo, Pihe boleh siarken selebaran di seloeroe negri, dalem mana diterangken sedjelasnja prihal mengoempoel balatentara boeat toeroen laoetan perangin Tiauw Sian, maka barang siapa jang mempoenjai kebisaän ilmoe perang, lagipoen tiada takoet angin dan ombak, tiada diketjoealiken pembesar-pembesar militair dan civiel, soldadoe dan rajat biasa, sampepoen segala pelarian dan orang-orang jang perna berboeat kedosaän melanggar wet negri, antero boleh lekas dateng di kota radja, masoekin nama masing-masing pada Peng Po. Kemoedian ditetepken pada boelan Dji - gwee tanggal Tjhe-it dari taon jang bakal dateng, dioetoes saorang pembesar agoeng boeat kepalaï ini perkerdjaän, jang diatoer sama seperti tjara memboeka examen. Pertama mengadoe ilmoe pana, kekoeatan dan kebisaän maen sendjata, blakangan baroe dioedji hal pengartian dalem ilmoe soerat, ketjerdikan dan taktiek peprangan, dari mana lantas ditjaboet jang loeloes paling atas boeat 96 nama Boe Tjin Soe, paling achir baroelah diserahken boeat Pihe sendiri lakoeken pengoedjian pengabisan bagi orang-orang jang terloeloes, dari mana laloe ditetepken gelaran satoe-persatoe. Demikianlah Boe Tjiong Goan diangkat mendjadi Taij Goan Swee, Pong Gan dan Tham Hoa didjadiken Tjo dan Joe Sian Hong, sedeng laen - laennja Tjin Soe diwadjibken ikoet madjoe ka medan perang boeat mereboet pahala. Maka dengen tjara begini, orang-orang gaga dari seloeroe negri pasti bakal dateng kemari, dari mana tentoe bisa diharep boeat dapetken satoe-doea panglima jang kena diandelin serta mempoenjai kebisaän loear - biasa. Lebi djaoe Pihe boleh mengeloearken firman aken Peng Po di taon dateng antara boelan Tjhia gwee, pili dan tjaboet 60.000 soldadoe soldadoe negri jang masi moeda dan bertenaga tjoekoep, serahken pada sala satoe panglima besar boeat moelai itoe waktoe mengadjar dan mendidik dengen giat, soepaja semoea bisa paham betoel dalem tjara madjoe di paprangan, sehingga mendjadiken satoe pasoekan jang terpladjar betoel, aken koemoedian mengikoet Tjeng Tang Goan Swee madjoe ka San Tong, toeroen ka kapal perang boeat berhadepan dengen moesoe.“
„Begitoe djoega Sin denger,” meneroes lagi Beng Tong sesoeda brenti sebentar, „djoemblah dari Tiauw Sian ampoenja angkatan semoea ada 50.000 djiwa, tapi selama maloemken peprangan terhadep fihak kita, djoega berkali-kali telah beroleh keroesakan jang boekan ketjil, mendjadi ditaksir tenaganja marikapoenja pasoeken sekarang ini tiada tjoekoep dalem itoengan boelet 40,000 djiwa, samentara kitapoenja barisan toch masi ada dalem djoemblah besar sekali, lagipoen bertenaga baroe, bisa dipertjaja aken memperolehken kemenangan, asal jang mengepalaï mempoenjai tjoekoep kebisaän. Tetapi boeat soldadoe- soldadoe jang bakal ditjaboet, haroes didoeloeken atas sekalian provincie ampoenja soldadoe- soldadoe marine atawa barisan pembasmi badjak, baroelah itoe bisa menoeloeng banjak. Laen dari itoe, Pibe poen haroes mengeloearken firman, titah San Tong Soen Boe, keloearken sekean djoemblah dari kas negri boeat mengatoer bikin sekean banjak kapal-kapal perang besar dan ketjil jang sekira tjoekoep dipake oleh 60.000 balatentara. Demikianlah ini peprangan djadi dimaloemken di moeka laoetan, agar soepaja Teng Tjioe tiada hadepin keroesakan jang bisa datengken kesoesahan rajat kita. Sebeginilah adanja Sin poenja pendapetan, tetapi belon taoe begimana Pihe poenja pikiran ?” Mendenger Beng Tong poenja peroendingan jang pandjang, baginda djadi merasa sanget girang, sembari bersabda:
„Keng poenja antero voorstel soenggoe amat sampoerna, Tim aken menoeroet dan mendjalanken satoe-persatoe!”
Demikianlah di itoe waktoe djoega, baginda keloearken titah soepaja pembesar dari departement peprangan sigra mengatoer tjonto boeat itoe soerat selebaran jang aken dikirim pada berbagi-bagi provincie ampoenja Soen Boe, siapa kemoedian haroes toeroenken poela itoe selebaran dalem papan plekat boeat ditaro pada berbagi-bagi tempat oemoem dalem bilangan masing-masing. Boenjinja selebaran terseboet boleh menoeroet sebegimana penoetoeran Lee Beng Tong baroesan.
Pembesar jang berkewadjiban setelah menerima titah, zonder berajal lagi lantas moelai menoelis itoe soerat, samentara baginda soeda mengeloearken poela titah katanja:
„Dalem selebaran lebi djace haroes diterangken djoega, tjoema itoe mantri pengchianat Hong Hoe Keng ampoenja poetra, Hong Hoe Siauw Hoa, tiada diïdzinken boleh toeroet masoek soldadoe, sedeng selebinya biarpoen pelarian, maoepoen orang boeangan, asal sadja mempoenjai kebisaän baek dalem ilmoe perang, semoea boleh ditrima.”
Apabila dapet denger ini sabdaän, Beng Tong djadi termenoeng boeat sedikit saät, dalem hati berpikir bahoea dengen madjoeken voorstelan baroesan, adalah semata-mata mengharepaken bisa toeloeng mengangkat toenangannja, dengen satoe pengandjoeran aloes, soepaja Hong Hoe Siauw Hoa nanti memake nama palsoe ikoet masoek soldadoe, tapi sekarang atas titahnja baginda jang baroesan dikeloearken, iapoenja bakal soeami masi djoega tiada dapet keampoenan, tidakah pengharepannja jang bermoela bakal djadi tersia - sia dan ketjapean hatinja djadi terboeang pertjoema. Achir-achir ia madjoe kombali ka depan dan merapport katanja
„Pihe ampoenja boedi kemoerahan, mirip loeasnja laoetan besar, keroeh dan djerni semoea tiada ditampik, masakah satoe Hong Hoe Siauw Hoa, tiada bisa lebi baek daripada itoe berbagi-bagi orang pelarian dan orang boeangan, sampe begitoe perloe moesti diketjoealiken. Begitoe djoega ada koerang pantes bila dalem plekat diseboetken demikian, kerna itoe bakal bisa menimboelken rasa sangsi - sangsi pada sekalian rajat di loearan jang nanti beranggepan Pihe koerang adil. tiada berhati soenggoe-soenggoe dalem hal mengoempoel orang-orang gaga, mahal dengen keampoenan. Ini sebab Sin sanget harep Pihe aken soeka tarik poelang poetoesan jang baroesan, agar soepaja dapet mengoendjoekin itoe pri kemoerahan seloeas-loeasnja.”
Setelah denger ini perkataän, Seng Tjong bersabda poela dengen menggigit gigi seperti menjataken rasa getoennja:
„Hong Hoe Keng telah menerima Tim doea toeroenan ampoenja boedi besar dan perlakoean jang mengindahken, mempoenjai kedoedoekan agoeng, tapi sewaktoe dititah memoekoel Tiauw Sian, baroe sadja kena terrawan soeda lantas berlakoe begitoe pengetjoet, menaloek moesoe boeat bisa tinggal idoep, malah sanggoepin hendak mendjadi penoendjoek djalan boeat pimpin moesoe balik menjerang Teng Tjioe. Kedosaän begitoe besar apakah bisa dikasi kelonggaran? Samentara itoe, tempo dititah oetoesan aken pergi menangkep seroema tangganja, si anak doerbaka, Hong Hoe Siauw Hoa, soeda bisa tjioem baoe serta lebi siang melarikan diri, tjoema dapet ditangkep doea prempoean jaitoe iboe dan anak. Ini djoega tatkala liwatin Tjoei Taij San, komplotnja pengchianat, Wie Jong Tat, kepalaï iapoenja koempoelan brandal, memboenoe oetoesan dan merampas Hong Hoe Keng poenja anak - bini bawa ka atas goenoeng, aken bersama-sama lakoeken perkerdjaän begal, dengen atjapkali membinasaken soldadoe penghoekoem brandal dari negri. demikian djoega terdjadi atas dirinja Lauw Ke Pek jang membawa balatentara aken membasmi itoe kawanan, dengen tipoe telah ditawan dan ditahan dalem sarangnja, sampe sekarang orang tiada denger kabar tentang mati-idoepnja. Ja, ja, ini semoea tjoekoep membikin Tim poenja panasaran rasanja meloeap dari takeran, soeda tetepken niatan kapan sadja Tiauw Sian poenja hoeroe-hara dapet ditindes, sigra djoega madjoeken pasoekan besar boeat basmi Tjoei Taij San sampe antjoer, tangkepin anak-bininja Hong Hoe Keng serta Wie Jong Tat, satoe-persatoe dibri hoekoeman tjintjang badannja hingga berkeping-keping, soepaja wet negri dapet dipegang keras. Terhadep itoe anak pengchianat, Hong Hoe Siauw Hoa, sekean lama Tim telah keloearken titah keras boeat lakoeken penangkepan atas dirinja, moestail amat sekarang boleh dikasi idzin aken dia toeroet masoek soldadoe.“
„Sin denger,“ Beng Tong membilang lagi, „sedari oesia moeda Hong Hoe Keng telah mendjabat pangkat negri, beroelang - oelang soeda berdiriken pahala besar, sampe dia bisa perolehken kedoedoekan moelia, tentoe sekali sesoeda dirinja kena ditawan oleh ilmoe siloeman, dia sekarang ditahan dalem pendjaranja moesoe. Amat moestail panglima sematjem dia maoe begitoe gampang menaloek pada negri moesoe, jang dia toea terang dengen perboeatan itoe bakal menjilakaken seisi roema tangganja. Bisa djadi sekali lantaran peprangan dimaloemken di moeka aer, segala warta jang dateng atjapkali tiada membawa kebeneran. Lagi sakali Tim brani memastiken Hong Hoe Keng moestinja tiada menaloek pada Tiauw Sian! Doeloean, tempo Sin masi berada di Ouw Kong, mengetahoei betoel Hong Hoe Siauw Hoa ada mempoenjai ilmoe silat dan kepandean maen sendjata sanget bagoes, lagian mempoenjai pengartian bagoes dalem ilmoe soerat Orang begitoe, sedikitnja tentoe mempoenjai pri-kebedjikan jang tiada tertjiwa, berbatin moelia boeat menoedjoe pada keberbaktian dan kesetiaän. Maka seandenja dia mendapet denger prihal negri lagi mengoempoel orang-orang gaga, nistjaja dia aken menoekar nama, dateng kemari boeat masoek soldadoe, kemoedian dengen zonder mengenal kematian madjoe di peprangan, agar pertama bisa membelah negri dan kadoea bisa menoeloeng pada ajahnja sendiri. boeat, memenoeken itoe kewadjiban selakoe satoe mantri dan satoe anak. Tapi ini semoea hanja bergantoeng atas kemoerahannja Pihe, jang membri kesempatan boeat dia bisa menjoekoepin itoe doea keharoesan. Sebaliknja kapan Pihe masi berkeras boeat tiada idzinken dia toeroet madjoeken diri, Hong Hoe Siauw Hoa pasti aken merasa tertjepit betoel-betoel di antara doea djalanan, maoe madjoe boentoe sedeng maoe moendoer terpegat. Pengabisan, sesoeda meliat tiada lagi ada djalan boeat bisa menoeloeng ajahnja ia terpaksa mengambil tindakan jang achir, menaloek pada Tiauw Sian aken bisa bersatoe tempat dengen ajahoja atawa kemoedian sebagi tjara membales sakit hati, memindjem balatentara Tiauw Sian, betoel-betoel dateng mengamoek ka seloeroe bilangan Tiong Goan, boeat mana bisa diramalken sedikit banjak marika tentoe bisa dapetken bantoean dari sobat - sobat sebela dalem negri, hingga inilah berbalik aken mendatengken bahaja besar bagi keradjaän. Ja, Sin soeda bitjara terlaloe banjak, tapi itoepoen ada boeat kebaekannja negri dan boekannja meloeloe omongan melantoer, semoea tersilah boeat Pihe boleh timbang dan pikir lebi djaoe.
Seng Tjong berdiam sesaät lamanja kemoedian dengen manggoet-manggoetin kapala ia bersoeara lagi :
„Lee Keng ampoenja peroendingan memang betoel ada beratoeran, tapi ada satoe hal jang masi moesti dikoeatirin dan rasa-rasanja koerang sentosa. Tim berpendapetan, kaloe Hong Hoe Keng betoel tiada menaloek pada moesoe, moestail San Tong Soen Boe brani membri rapportan begitoe sembrono. Maka itoe kapan Hong Hoe Siauw Hoa ditrima dalem balatentara dan madjoe ka peprangan, sedeng Hong Hoe Keng betoel-betoel menaloek pada moesoe, nistjajalah Hong Hoe Siauw Hoa aken lebi berfihak pada ajahnja, hingga bisa kedjadian pasoekan kita djadi terantjem kerna dapet serangan dari loear dan dalem. Tidakah ini ada meroepaken satoe bahaja jang terlebi heibat? Dan Lee Keng sebagi satoe mantri jang bidjaksana, tjobalah pikir lagi sakali apakah ini tindakan boleh diambil zonder kekoeatiran blakangan ?”
„Soenggoepoen Pihe poenja pendapetan ada teramat terang,” begitoelah Beng Tong kepaksa menoetoer kombali, „sebaliknja menoeroet Sin poenja pengliatan jang bodo, tiada sekali-kali Hong Hoe Keng maoe menaloek pada Tiauw Sian, samentara: Hong Hoe Siauw Hoa pasti nanti bisa oendjoekin seantero tenaganja boeat goena negri: Djikaloe Hong Hoe Siauw Hoa sesoedanja toeroet dalem barisan kemoedian brontak, Sin ridlah menanggoeng dengen djiwa seisi roema tangga boeat adjaran bagi siapa jang soeda begitoe brani madjoeken voorstel setjara memboeta. Sebenernja kaloe Sin soeda berlakoe begitoe, jalah boeat goenanja negri soepaja bisa memake orang pande, begitoe djoega sebaliknja mengasi djalan bagi orang aken bisa perbaekin keadaännja, sama sekali tiada mengandoeng pikiran laen, apa djoega !”
„Memang betoel Keng poenja penglihatan ada amat loeas,” achirnja bersabda, Seng Tjong dengen roepa girang. „Keng poenja voorstelan soeda dimadjoeken begitoe tandes. Tim ampir maoe pertjaja Hong Hoe Keng moestinja tiada menaloek pada moesoe, boeat traoesa dibilang Hong Hoe Siauw Hoa tiada aken brani berchianat, sedeng sekalipoen, betoel - betoel kemoedian dia ambil tindakan brontak, Keng toch soeda madjoeken voorstel menoeroet keadilan serta dengen sedjoedjoernja hati, apabila Tim masi moesti timpaken kedosaän atas Keng poenja poendak, itoelah boekan jalan jang bener, malah bisa dikoeatirin blakang hari Tim aken berhadepan meloeloe dengen mantri - mantri jang menoetoep moeloetnja rapet-rapet. Siapakah poela jang brani madjoeken voorstel ini-itoe dengen setjara djoedjoer kaloe taoe bahoea itoe banjak resiconja ?”
Berbareng dengen habisnja ini oetjapan, baginda: laloe keloearken titah aken lantas roba poela boenjinja soerat selebaran terseboet, jang setelah kemoedian mendapet ketjotjokan dari baginda, lantas disalin lagi boeat tigablas lembar banjaknja, berikoet lagi tigablas lembar soerat firman jang soeda dipakein tjap keradjaän. Langsoeng dititah tigablas orang oetoesan, jang dipetja djadi tigablas djalanan boeat masing masing menjampeken itoe firman dan soerat selebaran pada Soen Boe - Soen Boe dari tigablas provincie.
Apabila semoea ini soeda diatoer beres, sri-baginda poen laloe moendoer masoek ka dalem astana, begitoe djoega seantero mantri pada boebaran boeat balik poelang, ka gedongnja masing-masing.
Dengen moeka bersri sri dan hati bersoekatjita, Beng Tong balik poelang ka gedongnja, kerna dalem hati pikir bahoea iapoenja toenangan kebanjakan tentoe toeroet dateng kemari boeat masoek soldadoe. Koetika ia sampe di Siang Hoe dan masoek ka dalem, ia dapetken sang mertoea lebi doeloe soeda berada di sitoe, selagi doedoek beromong-omong dengen Keng Hoedjin dan So Hoa. Begitoelah Beng Tong tempo, telah boeka iapoenja pakean kebesaran, poen toeroet dateng doedoek bersama-sama di sitoe.
„Njatalah Hian Saij terlaloe soeka tjampoer orang poenja oeroesan,” begitoelah antara laen - laen Nio, Siang telah tjomelin sang mantoe, „kabar tentang Hong Hoe Keng menaloek pada Tiauw Sian, telah dateng dari rapportannja San Tong poenja Soen Boe dan njata itoe tentoe ada berboekti terang. Seandenja kemoedian Siauw Hoa brontak dari dalem, sedeng kaoe ada membri tanggoengan begitoe roepa, sedikit - banjak tiada terloepoet dari kedosaän.”
„Oleh kerna Siauw Saij beranggepan pasti Hong Hoe Keng tiada aken menaloek pada Tiauw Sian, hanja itoe warta terbit dari sebab itoe penjerepan di moeka aer tiada begitoe sampoerna.“ djawab Beng Tong dengen hormat, „ini sebab Siauw Saij brani membri voorstelan begitoe roepa, agar soepaja sang poetra dapet berkerdja boeat menoeloeng ajahnja balik poelang kemari.“
„Kenal orang kenal moekanja tiada kenal hatinja,“ berkata lagi Nio Siang. „,seande Hong Hoe Keng dengen poetranja bener-bener memboenjai pikiran berchianat, kaoe-poenja kedosaän bakal tiada ketjil adanja. Biarlah laen kali kaoe tiada berboeat demikian poela.“
„Gak Hoe poenja pesenan, Siauw Saij nanti perhatiken betoel,“ achirnja djawab Beng Tong jang soengkan membanta lebi djaoe. Sedeng sesoeda doedoek beromong-omong sedikit lama lagi, laloe kedoea soeami-istri itoe permisi dari orang toeanja balik poelang ka loteng Long Siauw Lauw. Di mana setelah menjoeroe moendoer semoea boedak - boedaknja. So Hoa lantas menanja:
„Tersebab apakah, maka Thaij Soe baroesan soeda oetjapken perkataan begitoe?“
Beng Tong lantas menoetoerken satoe- persatoe apa jang telah kedjadian tadi pagi di kraton, sembari kemoedian meneroesken katanja:
„Kaloe itoe boekan bersangkoet dengen oeroesan toenangankoe, masakah ada begitoe gelo boeat akoe moesti berlakoe sampe demikian, Gak Hoe jang tiada taoe selak - seloeknja tentoe sadja mendjadi begitoe koe- rang seneng dan berkoeatir, goesarin akoe maoe sadja tjampoer dalem orang laen poenja perkara,“
„Ach, memang soeker boeat bisa didapetken orang prempoean seperti Siotjia,“ katanja So Hoa sambil mengela napas. „boeat goenanja Hong Hoe Long kaoe sampe moesti mengorbanken banjak pikiran dan ketjapean hati, Toehan tiada merem dan tentoe djatoken anoegrahan jang beroepa perlindoengan, moedah - moedahan dia dapet djalan madjoe ka medan perang, serta balik poelang dengen perolehken kemenangan dan bersama-sama dengen ajahnja, agar lebi siang Siotjia poenja perdjodoan dapet dilangsoengken.“
„Tapi sebaliknja orang, tiada bisa meramal begimana Thian ampoenja takdir,“ berkata Beng Tong, „melaenken kita hanja bisa mengerdjaken menoeroet kemampoean sendiri dan berichtiar sedapet-dapetnja. Berselang tiga-ampat hari kemoedian, “ dalem kota radja pertama-tama telah dilakoeken penempelan dari sekean banjak soerat- soerat plekat tentang mengoempoel soldadoe- soldadoe
Samentara itoe, Beng Tong terlebi siang soeda panggil berhimpoen iapoenja seantero djoeroetoelis dan laen-laen penggawe dalem kantoran Peng Po, di hadepan marika itoe Beng Tong boeka sedikit pembitjaraän, antara laen-laen ia ada membilang :
„Tentang hal mengoempoel soldadoe, adalah termasoek sebagi satoe oeroesan jang terpenting bagi negri dan keradjaän, maka itoe kaoe sekalian haroes perhatiken betoel-betoel, djikaloe ada dateng sesoeatoe orang jang hendak memasoekin namanja, melaenken diïdzinken orang boleh trima sedikit djoemblah sebagi cepahan kerdja menoelis dan itoe oepahan tiada boleh melebiken dari 120 boen tembaga. Diantjem keras dengen disertaken hoekoeman berat zonder keampoenan, kapada siapa-siapa jang ketaoean melakoeken pemeresan atawa paksaän boeat dapetken oepahan jang tiada halal, maoepoen soeapan jang tiada lajik.“
Itoe semoea orang rata-rata memanggoetin kapala serta bersoempa aken memegang betoel apa jang telah diperingetin. Kapan soerat plekat soeda disiarken, ternjata dengen sebentar sadja menarik banjak perhatian, satoe - satoenja fatsal jang paling menarik pikiran, jalah itoe perbilangan bahoea segala orang biarpoen begimana hina, djoega bisa mempoenjai harepan boeat mereboet gelaran Tjiong Goan, siapakah jang tiada bernapsoe aken toeroet teeken soldadoe? Tapi sebaliknja boeat melangka laooetan aken perangin Tiauw Sian, lagipoen fihak moesoe ada poenja ilmoe siloeman jang amat Lihaij, berarti djoega orang bakal moesti hadepin ombak dan bahaja besar, membikin kegoembirahan baroesan boejar sendirinja, hingga sebagian besar soeda oeroengken niatannja, tapi toch masi tida koerang banjaknja orang-orang jang tida takoet ombak dan bernjali besar, beroentoen-roentoen masoekin namanja di kantoran Peng Po.
XXXVI.
Di Oei Hok Lauw. goeroe dan moerid
berpisaän. Di Tjoei Taij San, iboe
dan poetra bertemoeän.
Adapoen prihal itoe circulair mengoempoel balatentara, bisa dibilang ada satoe oeroesan jang terpenting, maka djoega ada diwatesken temponja boeat masing-masing oetoesan, tiadalah heran zonder perdoeliken siang maoepoen malem, itoe tigablas oetoesan brangkat menoedjoe dengen spoed ka masing-masing provincie jang diwadjibken. Sedeng itoe berbagi-bagi Soen Boe apabila mendapet trima ciculair terseboet, dengen tiada brani berajal, marika poen sigra mengatoer
dan bikin poela bebrapa banjak plekat boeat ditempelken pada tempat-tempat oemoem dalem bilangannja.
Setelah ini pekabaran djadi tersiar di seloeroe negri, dalem sedikit tempo sadja soeda ada bebrapa banjak orang-orang gaga jang tiada takoet ombak dan angin, beroentoen - roentoen telah pada menoedjoe ka kota radja aken toeroet masoek soldadoe, boeat kemoedian ambil bagian dalem examen militair.
Kita tinggalken samentara boeat ini hal pengoempoelan soldadoe, aken balik menilik keadaännja Him Hauw dan Hong Hoe Siaaw Hoa jang sekean lama telah diliwatin. Sebegimana diketahoei, sedari taon berselang di antara boelan Tjhia-gwee, ini doea orang moeda soeda berdiam di goenoeng Oei Hok San aken menoentoet berbagi-bagi ilmoe kebisaän dan kesetiaän. Begitoelah siang-malem marika selaloe berjakin soenggoe -soenggoe dalem ilmoe maen pana, maen sendjata dan ilmoe silat.
Sampe pada taon kadoea, boelan Tjap-it-gwee tanggal satoe pagi-pagi, Oei Hok Sian Ong jang sedeng doedoek semedhi di pertapaännja, sekoenjoeng-koenjoeng segoeloeng anging berlamboeran di moekanja, jang diberikoetin dengen soeara menggeroeng.
Itoelah ada membawa satoe alamat, jang Sian Ong dengen lekas soeda bisa mengetahoei, maka sigra djoega ia panggil Him Hauw dan Siauw Hoa dateng dihadepannja, pada kedoea moerid itoe Sian Ong membilang katanja:
„Sekarang ini Tiauw Sian sedeng mengoendjoek kegarangannja, negri telah menjiarken selebaran boeat mengoempoal soldadoe-soldadoe, maka seloeroe negri ampoenja orang-orang gaga pada dateng berkoempoel di kota radja boeat memasoekin namanja masing-masing di Peng Po, aken menoenggoe sampe laen taon di tanggal Dji - gwee Tjhe-it, toeroet ambil bagian dalem examen militair besar, mengadee oentoeng boeat bisa perolekken gelaran Boe Tjiong Goan atawa sedikitaja Boe Tjin Soe, jang boeat mana sama sekali ada disediaken sembilan-poeloeanem titel. Boe Tjiong Goan nanti jang diangkat mendjadi Goan Swee. Tham Hoa dan Pong Gan mendjadi Sian Hong kiri dan kanan, sedeng laen - laennja adalah mendjadi panglima pembantoe, laloe bersama- sama membawa pasoekan besar pergi perangin Tiauw Sian. Ja, kaoe berdoea ampoenja nasib terang sekarang soeda mendeketin, bolehlah sigra bersedia boeat balik poelang ka roemamoe, aken kemoedian selekasnja brangkat ka kota radja boeat masoek soldadoe.“
„Soeda seringkali Te Tjoe berdoea menampak di kaki goenoeng, sekiternja ada laoetan besar meloeloe, mana bisa lantas poelang?“ berkata Him Hauw.
„Kaloe akoe jang menjoeroe kaoeorang poelang,“ berkata Sian Ong dengen ketawa, „soeda tentoe moesti ada djalan boeat pergi!“
„Aken tetapi,“ Him Hauw dan Siauw Hoa berkata dengen ampir berbareng. ,,Soe Hoe tentoe lebi mengetahoei bahoea itoe Hoan Koen Soe ada mempoenjai ilmoe kesaktian dan berbagi-bagi Popwe jang amat Lihaij, samentara Te Tjoe berdoea sama sekali tiada poenja ilmoe apa djoega, tjara begimana nanti mampoe tandingin moesoe?"
„Tiada apa,“ kata Sian Ong poela, „akoe nanti kasiken kaoeorang bebrapa roepa Popwee boeat dibawa, pasti kaoeorang bakal hadepin, kemenangan.“
Sehabisnja oetjapken ini perkataän, Sian Ong menitah itoe moerid ketjil sigra pergi dalem kamarnja, aken ambil bawa dateng itoe roepa - roepa barang jang terletak di atas medja, terdiri dari: satoe Pian, satoe Pokian, satoe gembolan dan satoe katja. Begitoelah sebentar lagi ini bebrapa matjem barang soeda dibawa dateng oleh botja tjilik terseboet.
Itoe katja ada terdjadi dari koeningan, potongan boender kira-kira sebesar satoe mangkok. Pokiam ada dari wadja jang mengasi tjahaja berkredep - kredep dan sitoe gembolan keliatan ada terpaloe dengen emas koening.
Kemoedian Sian Ong laloe mengambil itoe katja berserta gembolan, seraken pada Siauw Hoa sembari berkata dengen membisikin di koeping orang:
„Ini Kim Toei (gembolan mas) ada bernama Hoei Tian Toei, sewak toe ketemoeken Sin Boe Todjin melajang-lajang di atas mega, boleh lantas lepasken ini gembolan ka oedara dan sigra djoega tentoe ada sinaran kilat nanti memoekoel atas badannja jang sakitnja soeker ditahan. Dan ini katja ada bernama Pho Long Keng, djoega bisa di seboet Peng Ho Keng, kaloe Jauw To menampak kekalahan, dia pasti menjiptaken ombak dan angin boeat bikin tenggelem kaoepoenja kapal-kapal, atawa ketemoe angin toefan dan ombak besar, kaoe boleh mengatja satoe kali dengen ini katja, sekedjapan itoe semoea tentoe djadi boejar. Begitoe djoega bila berdjoempa Jauw To semboerken api boeat membakar kapal, poen bisa digoenaken ini katja boeat memoesnaken sang api dengen sakali mengatjaïn.“
Sehabisnja membilang begitoe. Oei Hok Sian Ong laloe serahken poela pada Him Hauw itoe Pokiam serta Pian, sembari membisik katanja:
„Ini Pokiam bernama Tjam Kauw Kiam, di daratan ia bisa menabas segala binatang oepama: matjan, kerbo, badak dan gadja besar, sedeng di moeka aer ia bisa binasaken sesoeatoe binatang aer, seperti: boeaja, naga dan laen-laen; bila ia dilemparken ka oedara, sigra mengeloearken sinaran terang dan bisa djoega mengorbanken djiwa manoesia. Dan ini Pian, ada diseboet Hoa Liong Pian, kapan digoenaken djoega mengeloearken sorot gilang-goemilang, jang djika toeroen memoekoel di badannja Jauw To, nistjaja dia aken dapet rasaken seroepa kesakitan jang tiada terderita.“
„Ja,“ kemoedian berkata Sian Ong lebi djaoe pada kedoea moeridnja itoe, „akoe sekarang soeda serahken kaoeorang masing-masing dengen doea roepa Popwe, hingga kaoeorang bisa goenaken itoe boeat petjaken segala ilmoe siloeman dengen traoesa merasa koeatir satoe apa poela.“
Kedoea moerid itoe mengoetjapken trima kasi, seraja menjimpen itoe Popwe di badannja masing-masing. Sian Ong mengeloearken lagi doea lembar Hoe-djimat, kasiken pada masing-masing moeridnja dan berkata:
„Ini Hoe ada dipanggil Hok Sin Hoe, masing-masing boleh memake satoe lembar, letakin di betoelan ramboet kapala. Sewaktoe Jauw To terdesek, dia tentoe menggoenaken ilmoe mengilang dan melajang ka oedara, dia bisa meliat orang dengen teges, sebaliknja orang tiada bisa menampak roepanja. Tapi kaloe kaoeorang soeda poenjaken ini Hoe di badan, ilmoe begitoe mendjadi poena sendirinja, dapetlah kaoeorang goenaken Popwe dengen betoel boeat memoekoel padanja“
Him Hauw dan Siauw Hoa setelah menerima itoe. Hoe, laloe menjimpen baek di badannja, kemoedian Siauw Hoa kedengeran menanja:
„Itoe Sin Boe Todjin sebetoelnja ada orang apa jang soeda berlakoe begitoe roepa poenja garang?“
„Dia itoe adalah Loan San Lo Tjouw ampoenja moerid dan teritoeng djoega sebagi akoepoenja moerid keponakan,“ saoetnja Oei Hok Sian Ong, „lantaran dia itoe ada saorang gila prempoean, mengandoeng niatan aken meroepaken dirinja seperti satoe anak sekolahan boeat kemoedian lakoeken perdjinaän dengen orang poenja anak - bini,maka Loan San Lo Tjouw telah mengoesir padanja. Dalem panasaran dan kedjengkelan dia djadi bertindak pada djalanan tersesat serta berboeat segala apa jang bertentangan pada kehendakannja Thian atawa ini djoega memang soeda takdirnja Allah, sehingga dia sampe maoe membantoe Tiauw Sian boeat terbitken hoeroe-hara.“
Sambil oetjapken ini perkataän jang pengabisan, Sian Ong merogo tangan dalem kantongnja, ambil keloear satoe goeloeng tali Ang Kim Toat So, berikoet djoega satoe kantong soelaman ketjil, serahken kedoeanja barang terseboet pada Hong Hoe Siauw Hoa seraja berkata lagi:
„Kaoepoenja pergi ini jang semata-mata ada boeat berhadepan dengen Sin Boe Todjin, kaloe dia soeda beroleh kekalahan besar, tenga malem boeta dia pasti bakal melajang di oedara masoek dalem pasanggrahanmoe boeat lakoeken pemboenoehan gelap, itoelah menandaken bahoea diapoenja kedosaän soeda menjoekoepin wates, kaoe baroe boleh goenaken ini Ang Kim Toat So boeat menangkep padanja, tapi inget, sekali-kali tiada boleh bikin binasa djiwanja, hanja kaoe haroes kasiken ini kantong ketjil padanja soepaja dia sendiri nanti boleh boeka batja, kerna di dalem poen ada terlampir sapoetjoek soerat mintaken ampoen boeat dia aken diapoenja goeroe nanti maoe trima kombali padanja. Dari sitoe dia tentoe memboedjoek radja Tiauw Sian boeat hatoerken soerat menaloek dan mengirim barang bingkisan. begitoe djoega kasi lepas pada Hong Hoe Keng dan Goei Hoan Sesoeda itoe. Sin Boe Todjin bakal balik poelang ka goenoeng boeat teroesken bertapaännja, sedeng kaoe sekalian bisa kombali ka kota radja dengen segala kemenangan.“
„Tidakah Hong Hoe Goan Swee masi idoep?“ menanja Siauw Hoa dengen berdebaran.
„Ja.“ djawab Sian Ong, „kaoepoenja ajah berserta Sian Hong-nja, kerna tiada soedi menaloek Tiauw Sian, sekarang lagi berada dalem pemboeian moesoe dengen tiada koerang soeatoe apa.“
Mendenger ini perkataän, Hong Hoe Siauw Hoa djadi merasa amat girang, sesoeda kombali hatoerken trima kasi, laloe bersama-sama Him Hauw masoek ka dalem beresken masing-masing poenja boengkoesan pakean, kemoedian keloear kombali moehoen berpisa dari goeroenja sambil berloetoet berkali-kali, baroelah dengen mengendong sang boengkoesan di poendak, iaorang berdjalan keloear dari pintoe gowa teroes menoedjoe ka bawah goenoeng. Bener sekali di sitoe marika dapetken tana datar meloeloe dengen berbagi-bagi pepoehoenan dan reroempoetan jang idoep soeboer dan lebat, sedikit djoega tiada kedapetan aer ombak, sebegimana atjapkali sebelonnja ini marika perna menampak atawa hadepin.
„Soenggoe besar sekali Soe Hoe ampoenja kesaktian,“ berkata Him Hauw.
Siauw Hoa membenerken itoe bitjara, kemoedian doea orang ini laloe bersoedjoet poela mengadep ka arah tinggi goenoeng seperti hendak membri slamet tinggal serta hatoerken trima kasinja. Soeda itoe, iaorang langsoeng meneroesken perdjalanannja. Di sepandjang djalan, di mana terdapet itoe plekat boeat menangkep Hong Hoe Siauw Hoa berikoet gambarannja, sekarang soeda boleh dikata roesak seanteronja kerna serangannja angin dan oedjan sekaen lama, begitoe djoega marika tiada perna menampak halangan soeatoe apa, tentang pemereksaän maoepoen pertanjaän dari siapa djoega, inilah membikin iaorang dapet meneroesken perdjalanannja dengen hati lega dan pikiran merdika, meliwatin afdeeling dan residentie, malem mengaso siang berdjalan. Maskipoen begitoe, traloepoet Him Hauw itoe koetika seperti dapetken seroepa pengrasaän dari gandjelan hati, semingkin deket dengen kediamannja, semingkin keras pikirannja kenang-kenangin sang istri, jang ia tiada bisa mendoega - doega dengen pasti apa jang telah kedjadian Tapi rasanja seperti ada satoe firasat jang tiada enak bersemi di hatinja.
Dan ternjata djoega itoe firasat boekan tiada beraiesan, oleh kerna semandjek Him Hauw telah meninggalken roemanja. atawa pada tanggal Sie- gwee Tjhe-sha, iapoenja istri. Tji Sie, soeda melahirken saorang poetra dibri nama Him Hwaij alias Kie Hong. sebaliknja Tji Sie sesoeda beranak tiada brapa lama, zonder ketoeloengan ia telah menoetoep mata boeat selama-lamanja, berhoeboeng dengen kesoekeran melahirken.
Boeat itoe segala oeroesan kematian adalah dioeroes sampe beres dan memoeasken oleh Tji Geng Siang bersama istrinja Samentara boeat merawat itoe anak baji, adalah diserahken pada doea orang baboe-tete.
Sampe pada permoelaän dari boelan Tjap- dji - gwee, waktoe masi pagi, Him Hauw dengen Siauw Hoa telah sampe di itoe roema, jang disamboet oleh sekalian orang-orangnja Him Hauw, sambil ada djoega di antaranja jang telah membilang:
„Kenapa Siang Kong sampe sekarang baroe poelang ? Och, kesian soenggoe, An Djin soeda tiada bisa didjoempaken poela?“ Him Hauw djadi terprandjat, dengen hati berdebar-debar ia menanja:
„Tidakah An Djin soeda meninggal lantaran beranak ?“
„Waktoe melahirken An Djin tiada koerang soeatoe apa,“ saoet orangnja, „tapi setelah berselang satoe boelan lebi An Djin baroe dihinggapin penjakit, teroes-meneroes sampe setenga taon baroelah An Djin menoetoep mata. Peti mait sekarang ini masi terletak di pertengahan roema, boeat toenggoe sampe Taij-ja kombali lantas dilakoeken pengoeboeran“.
Mendenger ini penoetoeran, Him Hauw rasaken hatinja seperti diris-iris, Hong Hoe Siauw Hoa poen dapetken seroepa pengrasaän berdoeka jang boekan ketjil, boeroe-boeroe marika bertindak masoek ka dalem. Di roeangan pertengahan, iaorang menampak itoe peti mati jang di blakang mana terpasang kaen soetra dengen toelisan: „Him Hoe Tjeng Sip le Djin Tji Sie It Wie Tjeng Hoen“ (istri jang sah dari familie Him, Tji Sie, ampoenja roh sedjati).
Him Hauw madjoe toebroek itoe peti-mati dan setjara memeloek ia menangis serta meratap katanja:
„Kapan itoe hari akoe keloear pintoe, jalah mengandoeng seroepa pengharepan : „soeami djaja sedeng istri termoelia“, tapi sebaliknja siapa njana sekarang bisa djadi begini roepa . . . . . . . . Waktoe sakit akoe tiada bisa bantoe merawat dengen soegoeken thee dan obat. . . . . . . Begitoe djoega sewaktoe hendak menoetoep mata, akoe tiada bisa berada di sini boeat mengatoerken berpisaän dengen berdepan. . . . Oh, Allah, inilah bakal membikin akoe seoemoer idoep merasa menanggoeng satoe panasaran jang tiada habisnja!
Hong Hoe Siauw Hoa djoega telah madjoe ka depan, menangis dengen soeara keras katanja :
„Semoea ini adalah Poet Tjaij ampoenja kedosaän, jang telah menjebabken Toako, soeami-istri moesti terpisa setjara amat menjedihken, moehoen sanget Hian So ampoenja roh jang soetji soeka membri ampoen, serta tiada mengandoeng sakit hati.“
Djoestroe itoe waktoe, Tji Geng Siang kebetoelan baroe sadja dateng dari loear, tempo dapet liat sang mantoe, dalem hatinja soeda merasa amat piloe; meliat lagi Him Hauw dan Loe Leng ada menangis begitoe sedih, ia sigra madjoe mengampirin seraja memboedjoek katanja: „Siauw Lie ampoenja meninggal, jalah djoega ada takdiraja Toehan, menangis begimana djoega toch tiada ada goenanja.“
Him Hauw dan Siauw Hoa baroelah keliatan maoe menjeka aer matanja, sama-sama iaorang membri hormat pada itoe orang toea, langsoeng mengambil tempat doedoeknja masing-masing. Itoe baboe-tete di dalem, tempo mendapet taoe ini hal, boeroe-boeroe empo Him Hwaij bawa keloear, samentara Geng Siang lagi menoetoerken semoea hal satoe-persatoe berhoeboeng dengen Tji Sie poenja melahirken poetra, mendapet penjakit sampe achirnja dateng sang adjal boeat ia brangkat ka tana baka.
Him Hwaij itoe tatkala soeda beroesia satoe taon lebi, matanja keliatan tjeli alisnja bersi, sedeng romannja poen tjakep sekali. Maka dengen memandeng sang poetra, traoeroeng Him Hauw djadi terkenang poela aken istrinja. Ia menggendong itoe anak dengen aer-mata berlinang - linang dan menangis sesenggoekan sampe sekoetika lamanja. Achir-achir seperti hendak memetjaken itoe kesedian, Tji Geng Siang moelai menanja:
„Dji Wie poenja pergi ini, apakah soeda perolehken ilmoe - ilmoe gaib dan kesaktian ini-itoe? Kemaren atas firmannja sri-baginda di berbagi bagi tempat ada ditempelken plekat-plekat, jang menoetoerken prihal ilmoe siloeman dari Tiauw San ampoenja Koen Soe amat Lihaij, maka dipanggil seloeroe negri ampoenja orang-orang gaga dan berilmoe boeat dateng berkoempoel di kota radja, agar soepaja semoeanja bisa toeroet madjoe dalem examen jang bakal lekas dibikin, boeat mereboet itoe gelaran Tjiong Goan. Kaloe Dji Wie memang betoel telah perolehken ilmoe kesaktian, bolehlah sigra masoek ka kota radja boeat toeroet dalem examen.“
„Bener sekali Siauw Saij bercentoeng soeda bisa mendapet sedikit ilmoe kesaktian. menjaoet Him Hauw dengen mengela napas pandjang, tapi pikir orang idoep di doenia ada mirip dengen itoe impian di moesim Tjhoen, nama kebesaran, kekajaän maoepoen kemoeliaän, tiada koerang dan tiada lebi sama sadja seoepama mega jang tetapoeng-rapoeng. Semoea ini tjoekoeplah membikin orang poenja hati djadi pata dan kenapsoean mendjadi loemer sendirinja.“
„Kaoe kliroe sekali, Hian Saij,“ berkata lagi Geng Siang sambil menghiboer, „sesoedanja ada mempoenjai ilmoe kesaktian, pantes sekali lekas-lekas mentjari tana koeboeran boeat sigra mengoeboer lajonnja Sianw Lie, agar semoea oeroesan mendjadi beres dan Hian Saij berdoea dengen lekas bisa lantas brangkat ka kota radja, boeat toeroet examen jang hendak diboeka pada taon mendatengin di boelan Dji-gwee tanggal satoe. Mengapalah sekarang moesti oetjapken ini roepa perkataän?“
Him Hauw tinggal diam dengen menoendoekin iapoenja kapala, sedeng Siauw Hoa poen laloe pamitan berlaloe dari sitoe dan dateng di laen roeangan, di mana iapoenja boedak toea, Loe Tiong, telah dateng djoempaken, sembari menjeritaken sesoeatoe hal jang telah kedjadian selama marika terpisa satoe sama laen.
Samentara itoe, di hadepan segala malaekat, aboe-leloehoer, begitoe djoega di hadepan medja sembajangnja Tji Sie, antero soeda dipasangin lilin, di mana Him Hauw. kemoedian memasang hio dan bersembajang. Sesoeda itoe, baroelah ia lakoeken pemereksaän pada segala boekoe - boekoe dan tjatetan oewang keloear - masoek, jang memakan djoega tempo boekan sedikit, hingga sampe hari soeda mendjadi malem, baroelah masing-masing orang balik poelang ka kamarnja boeat mengaso. Loe Tiong laloe menjeritaken poela prihal sakitnja Tji Sie teroes sampe matinja, kemoedian begimana ia ada dibentjiin oleh Geng Siang poenja bini, Ouw Sie, jang soeda berlakoe begitoe bengis terhadep dirinja setjara orang maoe mengoesir, ampir sadja ia maoe tinggalken itoe roema boeat tjari toempangan di laen tempat, kaloe hatinja koerang sabar, oleh kerna pikir dengen ambil tindakan begitoe, ia bisa menjoesaken Kongtjoenja boeat tjari padanja kapan sekombalinja di sini.
„Ouw Sie poen ada saorang prempoean doesoen jang tiada mempoenjai pengertian loeas,“ kata Siauw Hoa sembari memboedjoek, „biarlah diapoenja sesoeatoe perboeatan djangan terlaloe dipikirin dan dianggep. Tapi tentang Hoedjin dan Siotjia jang dibawa ka kota radja, adakah kaoe mendapet kabar apa-apa?“
„Ja,“ djawab Loe Tiong, „tiada satoe saät djoega hamba bisa meloepaken halnja Hoedjin, maka begitoe dapet tampo, hamba tentoe dengen jakin aken saben - saben menjerepin, begitoelah hamba djadi bisa dapet kabar jang pasti tentangan Hoedjin dan Siotjia ini tempo.“
Kemoedian Loe Tiong lantas tjeritaken halnja Wie Jong Tat dari goenaeng Tjoel Taij San, jang soeda memboenoe oetoesan radja menoeloeng Hoedjin dan Siotjia bawa tinggal di atas goenoeng. Lebi djaoe Loe Tiong poen bilang bahoea ia denger kabar Wie Jong Tat itoe ada saorang moeda jang gaga perkasa, serta baroe beroesia kira-kira doeapoeloe taon.
Mendenger penoetoerannja sang boedak, Siauw Hoa djadi termenoeng - menoeng sesaät lamanja, dalem hatinja berpikir katanja:
„Ach, dalem ini hal ternjata Boetjin soeda berlakoe kliroe, masakah orang-orang dari golongan penjamoen bisa terdapet ada jang mempoenjai kebedjikan serta boediman? Lagipoen Tji-tji masi beroemoer amat moeda, tiada pantes sekali moesti tinggal di atas goenoeng, di mana lelaki dan prempoean ada tertjampoer - baoer. Begitoe djoega kapan baginda kiezer mendapet taoe hal ini, tidakah itoe menerbitken satoe kemorkahan dan ketjoerigaän.“
„Baroesan kemaren ada ditempelken bebrapa banjak soerat plekat boeat mengoempoel orang-orang gaga, sedeng Kongtjoe ini hari djoestroe soeda balik poelang, itoelah ada satoe hal amat kebetoelan boeat Kongtjoe sigra brangkat ka kota radja toeroet masoek examen,“ demikian Loe Tiong berkata poela.
„Ja,“ djawab Siauw Hoa, akoe memang ada poenja itoe niatan.“
Begitoelah antara ini boedak dan madjikan telah dilakoeken pembitjarään jang pandjang sekali, sampe djam tiga tenga malem. baroelah iaorang pada masoek tidoer.
Besok paginja Ouw Sie jang mendapet denger iapoenja mantoe soeda balik poelang, tiada tempo lagi ia sigra dateng ka itoe gedong boeat bertemoe, sedeng di hadepan itoe mantoe traoeroeng Ia poen telah oetjapken bebrapa perkataän jang menjataken kemasgoelan dan kemenjeselannja. Sebaliknja Him Hauw jang memang taoe orang poenja adat, sedikitpoen tiada maoe membanta.
Kemoedian Him Hauw laloe prenta menjediaken berbagi-bagi barang sembajangan dan atoer itoe di satoe medja boeat dilakoeken persembajangan sepantesnja, samentara Siauw Hoa djoega serahken sedjoemblah oewang pada Loe Tiong boeat pergi hatoer sebagian barang sembajangan serta laen-laen keperloean, oepama: lilin, hio dan kertas perak. Dan apabila semoea soeda tersedia beres, Him Hauw dengen Siauw Hoa laloe pada bersembajang di hadepan peti-mati itoe, menangis dan meratap dengen soeara piloe dan menjedihken.
Samentara itoe, orang-orang telah menjediaken satoe medja hidangan, pada mana Tji Geng Siang disilahken ambil tempat doedoek di kapala medja, Him Hauw dan Siauw Hoa mengambil kedoedoekan di kedoea samping, laloe bersama-sama moelai makan dan minoem. Dalem begitoe, Siauw Hoa kedengeran berkata pada Him Hauw:
„Bener sekali jang sri baginda telah mengeloearken titah boeat prenta mengadaken plekat aken mengoempoel orang-orang gaga. dari itoe, Toako haroes sekali lekas- lekas memili hari baek boeat lakoeken pengoeboeran lajonnja Hian So, agar kemoedian bisa lantas bersama-sama Siauw Te brangkat ka kota radja toeroet masoek soldadoe.“
„Ach, kapan dipikir, istrikoe dalem oesia belon meliwatin doeapoeloesatoe taon soeda tinggal mati,“ berkata Him Hauw sembari menarik napas pandjang, „akoe seperti merasaken bahoea orang idoep di moeka boemi tiada perloe moesti terlaloe mengedjer aken itoe segala kekajaän dan kemoeliaän. Ja, Hian Te, akoe sekarang tiada bernapsoe lagi tentang kebesaran nama, apalagi dalem roema kekoerangan orang jang mengoeroes serta menilik segala perkerdjaän, hingga soeker sekali boeat akoe boleh meninggalken roema. Sebaliknja Hian Te, jang memang ada poenja kepentingan besar, tida-boleh-tida moesti lekas brangkat ka kota radja.“
„Tetapi,“ berkata Siauw Hoa dengen roepa goerem, samentara soearanja poen tiada tetep, „kaloe Siauw Te tiada beroleh Toako poenja bantoean serta toendjangan, nistjajalah tiada bisa diharep dapet menjampeken maksoed hati. Maka itoe, hareplah Toako soeka pergi bersama-sama.“
„Hatikoe soeda tertoetoep boeat segala kemoeliaän, pikirankoe soeda tetep boeat tida sampeken kota radja,“ berkata lagi Him Hauw dengen soenggoe-soenggoe.
Tji Geng Siang jang sedari tadi dengerin sadja orang poenja pertjakepan, tiba-tiba telah menjelak sembari memboedjoek katanja:
„Sedari Siauw Lie terhinggap penjakit, saben-saben dia telah membitjaraken tentang Hian Saij ampoenja roman jang membawa tampang kemoeliaän, di hari kemoedian tentoe bisa djadi orang jang terindah. Dia seselin redjekinja sendiri jang tipis, maka tida bisa merasaken itoe kehormatan. Selagi hendak menoetoep mata, dia pesen poma-poma aken peringetin kaoe maoe bergiat serta jakin soenggoe - soenggoe boeat mengedjer nama kebesaran, kemoedian selekasnja mentjari poela gadis jang bidjaksana boeat istri. Anakkoe sendiri aken merasa poeas dan bersenjoem di tana baka, asal sadja sesoeda mati dia bisa perolehken anoegrahan seroepa titel kebesaran, dengen perantaraän käoepoenja kedjasaän pada negri dan selaen dari anakkoe jang telah wafat, akoe djoega aken merasa amat bersoekoer berikoet kebanggahan! Baek djoega Lo Sin ini waktoe ada berbadan sehat dan bertenaga tjoekoep, boleh sekali membantoe kaoe menilikin oeroesan roema tangga dan harta benda. Dari itoe, Hian Saij, kaoe haroes bersama-sama ini Hian Tit sigra bersedia boeat masoek ka kota radja.“
Denger itoe orang toea ampoenja pertjakepan, Siauw Hoa diam-diam merasa girang dalem hati dan mengalem Geng Siang ada orang baek.
„Njatalah ini semoea ada mengoendjoek Hian So ampoenja kebidjaksanaän,“ achirnja memoedji Siauw Hoa, „maka Heng Tiang wadjib sekali berjakin boeat mentjari nama keagoengan, agar soepaja bisa mengiboerken roh jang soetji !“
Tji Geng Siang poen telah memboedjoek dengen sanget, sampe achir - achicnja Him Hauw poenja niatan bisa djoega berkiser dan soeka menoeroet, laloe ia prenta orangnja aken sigra pergi mengoendang satoe sinshe toekang meliatin Hong-soei, siapa dibawa pergi ka tana koeboeran familienja, aken memili sebidang tana jang baek.
Demikianlah tiada sampe sepoeloe hari, semoea oeroesan jang berhoeboeng dengen pengoeboeran lajonnja Tji Sie soeda ber djalan beres dengen tiada koerang soeatoe apa. Waktoe mana, Him Hauw laloe kasi persen sedjoemblah oewang berikoet pakean pada itoe baboe-tete, dengen pesenan wanti-wanti soepaja ia itoe maoe berkerdja lebi ati-ati boeat merawatin sang poetra. Sedeng segala oeroesan roema tangga berikoet harta-benda, kombali diserahken pada mertoea lelakinja boeat dioeroes dan ditilik.
Samentara itoe, Loe Tiang telah njataken pada madjikannja ia hendak ikoet pergi bersama-sama, Siauw Hoa djoega tiada kebratan begitoepoen Him Hauw. Tapi kerna sang tempo ada begitoe pendek, orang tiada sempet boeat terlaloe memili hari, hanja ditetepken di pertengahan boelan Tjap gwee boeat brangkat djalan.
Koetika hari jang ditetepken soeda sampe Him Hauw dan Siauw Hoa masing-masing menoenggang saekor koeda, sedeng Loe Tiong jang toea di sepandjang djalan ganti-berganti menjewa djoli, begitoelah iaorang meninggalkan tempat kediamannja boeat menoedjoe ka kota radja, dengen traloepoet malem menginep siang meneroesken perdjalanan.
Soeatoe hari, selagi berada di perdjalanan, Siauw Hoa telah membilang pada Him Hauw katanja:
„Boetjin dan Tji-tji setaoe sebab apa boleh sampe berdiam di antara kawanan brandal, dari itoe Siauw Te pikir dalem perdjalanan kita, hendak singga sebentar di goenoeng Tjoei Taij San boeat mentjari taoe terang doedoeknja hal jang bener, tapi belon taoe apa Toako tiada merasa kebratan?“
„Itoelah ada satoe moestail boeat Gie Heng moesti taro kebratan,“ djawab Him Hauw dengen tjepet, „Hian Te poenja oeroesan jalah djoega mendjadi oeroesankoe sendiri, sedeng ini poen ada satoe hal jang amat penting, lagipoen Gie Heng patoet bersama-sama pergi menengokin Pek Boe, begimana Hian Te moesti oetjapken itoe perkataän setjara orang menagi ?“
Siauw Hoa mengatoerken banjak trima kasi atas perhatianoja itoe soedara angkat. Begitoelah iaorang meneroesken perdjalanannja dengen tiada beroleh halangan soeatoe apa, maka zonder merasa marika sekarang telah berada di bilangan Tjeng Tjioe Hoe dari provincie Sam Tjong. Di sitoe, iaorang moelai menanja pernanja goenoeng Tjoei Taij San, sembari landjoetken teroes perdjalanannja.
Di satoe lohor, atas pengoendjoekan orang jang marika berpapasan paling blakang, ternjata iaorang ini waktoe soeda sampe di bawah kaki goenoeng Tjoei Taij San. Marika brenti di sitoe sambil memandeng- mandeng dari atas koedanja, tapi tiada ada bajangan orang satoe poen jang tertampak.
„Menoeroet pengoendjoekan, njata sekali ini tempat ada Tjoei Taij San.“ berkata Loe Tiong, „tapi heran sekali kenapa soeda tiada ada orangnja?“
Baroe sadja Loe Tiong habis oetjapken ini perkataän, sigra djoega moentjoel keloear dari tempat semboenjinja bebrapa orang Liauw-lo, jang dateng mendeketin di hadepan itoe tiga orang, seraja menanja:
„Ada apakah jang kaoeorang hendak tjari di sini ?“
„Apakah di atas goenoeng ada orang jang bernama Wie Jong Tat? bales menanja Siauw Hoa.
„Itoelah ada kitaorang ampoenja kapala.“ menjaoet itoe Liauw-lo sembari menanja lagi, „ada keperloean apa kaoe moesti tanjaken dia?“
„Kaloe begitoe, akoe harep kaoeorang soeka toeloeng pergi merapportken pada Taij Ong,“ kata lagi Siauw Hoa, „bilang Hong Hoe Siauw Hoa maoe ketemoe !“
„Oh, kiranja Hong Hoe Kongtjoe,“ berkata si Liauw lo dengen amat girang, s„oeda sekean lama kitapoenja Taij Ong ada mengharep - harep. Marilah, akoe pergi merapportken ka atas goenoeng.“
Sehabisnja beakata, sala satoe Liauw - lo sigra djoega seperti lari berlaloe dari sitoe dan sebentar lagi ia soeda berada di roeangan Tjoe Gie Thia, mengadep Wie Jong Tat, sambil membilang katanja :
„Harep Taij Ong mendapet taoe, bahoea di kaki goenoeng sekarang ini ada dateng doea orang gaga dengen menoenggang koeda, serta diïkoetin oleh saorang boedak toea, mengenalken dirinja ada Hong Hoe Siauw Hoa dan hendak minta berdjoempa dengen Taij Ong.“
Wie Jong Tat djadi merasa sanget girang, ia sigra prenta bawa dateng toenggangannja, kerna ia sendiri aken toeroen goenoeng boeat menjamboet. Samentara Liauw-lo jang trima itoe prenta, zonder berajal soeda lantas bawa dateng koedanja sang Taij Ong. Begitoelah dengen satoe kali lompat, Jong Tat soeda berada di poendaknja sang toenggangan, langsoeng dilariken menoedjoe ka bawah goenoeng.
Koetika sampe pada pertengahan goenoeng, Liauw-lo jang masi menoenggoe di bawah goenoeng telah oendjoekin pada Siauw Hoa, katanja:
„Liat, itoelah ada kitapoenja Taij Ong jang dateng menjamboet sendiri!“
Kedoea orang moeda itoe sigra djoega mengangkat kapalanja dan memandeng ka atas, sekoetika iaorang djadi merasa amat terprandjat, kerna tiada mendoega bahoea di antara golongan penjamoen bisa terdapet orang moeda jang beroman begitoe tjakep. Tapi iaorang lantas berbareng toeroen dari koedanja, berdiri menoenggoe di samping djalanan. Sedeng dalem hatinja Siauw Hoa soeda berpikir, mengapa iboenja tiada hendak perdjodoken sadja entjinja pada ini orang moeda dan itoe toch bisa dibilang satoe pasangan jang sembabat betoel, Apabila Wie Jong Tat soeda dateng deket, ia dapet pandeng parasnja Siauw Hoa jang ampir mirip dengen sang entji, lekas djoega ia bisa mengenalken; begitoe poen setelah ia memperhatiken romannja Him Hauw, ternjatalah itoe orang djoega mempoenjai roman jang melebiken dari orang kebanjakan. gaga serta angker. Diam-diam dalem hatinja djadi berpikir sezaja berkata saorang diri :
„Ja,“ tiada sala orang bilang: „Di bawahnja satoe kapala perang jang gaga-perkasa, tiada nanti bisa terdapet soldadoe jang lemah!“ Pasti djoega ini orang moeda mempoenjain kebisaän dan kegagahan loear biasa.“
Boeroe boeroe ia lompat toeroen dari toenggangannja, sedeng Siauw Hoa lebi doeloe telah madjoe ka depan, sambil berkata dengen membri hormat angkat kedoea tangannja, berkiongtjioe:
„Bahoea Lo Boe dan Ke Tji soeda mendapet Taij Ong ampoenja pertoeloengan, maka sampe sekarang masi bernjawa, soenggoe boedi itoe ada besar seoepama goenoeng jang terbesar, hingga soeker rasanja boeat membales.“
„Gie Heng soeda angkat Leng Tong sebagi iboe,“ djawabnja Jong Tat sembari bales hormat, maka Hian Te dengen akoe toch ada teritoeng seperti soedara sendiri, begimanalah moesti dioetjapken itoe perkataän tentang membales boedi ?“
Sehabisnja berkata begitoe, dengen djeridji menoendjoek pada Him Hauw, Jong Tat menanja poela pada Siauw Hoa:
„Siapakah adanja ini satoe Eng Hiong?“
„Inilah ada saorang hartawan dari bilangan Ouw Kong, residentie Gak Tjioe Hoe, afdeeling Peng Kang Koan, bernama Him Hauw alias Joe Hok, bekas Boe Kie Djin, djoega ada teritoeng sala satoe Eng Hiong jang ternama.“ Demikian saoetnja Siauw Hoa: „Sedari Siauw Te menjingkirin diri boeat hindarken bahaja, atas kemoerahannja Siauw Te dapet menoempang dalem gedongnja, kemoedian dia djoega telah pergi bersama-sama Siauw Te boeat mentjari orang gaib serta menoentoet ilmoe kesaktian. Sekarang ini kitaorang lagi berniat hendak menoedjoe ka kota radja boeat masoek soldadoe.“
Dengen mengadep pada Him Hauw, itoe kapala brandal membri hormat dengen mengangkat kedoea tangannja, sembari berkata:
„Njatalah Djin Heng ada saorang gaga perkasa lagi boediman, maäfken jang Siauw Te soeda berlakoe koerang hormat.“
„Siauw Te ada saorang goblok jang kebetoelan sadja perolehken itoe satoe gelaran jang ampir tiada berarti, soenggoe merasa maloe sendiri boeat menerima Djin Heng ampoenja poedjian demikian roepa,“ begitoelah saoetnja Him Hauw sembari dengen lekas membales hormat, „mana bisa seperti Djin Heng jang mempoenjai kebisaän dan kepandean loear biasa.“
Kemoedian sesoedanja saling merenda poela, iaorang lantas bersama sama menoenggang koedanja masing-masing boeat menoedjoe ka atas goenoeng. Apabila sampe di depan Tjoe Gie Thia, ketiga orang itoe lantas toeroen dari toenggangannja dan dateng ka itoe roeangan, atawa setelah saling membri hormat lagi, iaorang laloe pada berdoedoek, seraja membitjaraken sedikit tentang soeal-soeal sebegimana orang baroe bertemoe moeka. Sampe achir - achirnja Siauw Hoa membilang pada kedoea orang itoe:
„Hareplah kedoea Heng Tiang soeka berdoedoek sebentar, Siauw Te aken pergi djoempaken doeloe pada Ke Boe.“
Wie Jong Tat membri titah pada iapoenja sala satoe Liauw-lo, aken sigra mengantarken Hong Hoe Kongtjoe masoek ka roeangan blakang; kebetoelan waktoe mana Ie Sie Hoedjin sedeng doedoek bersama Tiang Hoa Siotjia, iseng-iseng mengobrol ka timoer dan ka barat. Tempo Siauw Hoa soeda masoek ka dalem, sembari melangka pintoe ia membilang dengen soeara tangisannja:
„Anak jang doerhaka seminggat dari roema dan berdiam di peloearan, pagi-sore tida bisa menoenggoeïn orang toea, soenggoe kedosaän begitoe ada besar sekali !
Ie Sie dengen sang poetri tempo menampak Siauw Hoa, pengrasaän sedih dan girang dateng bergantian, boeroe-boeroe iaorang sama bangoen berdiri dari tempat doedoeknja boeat memapak. Dan Siauw Hoa lebi doeloe djoempaken sang iboe dengen berloetoet bebrapa kali, kemoedian baroe ketemoeïn entjinja berloetoet satoe kali Samentara itoe Loe Tiong poen telah dateng djoempaken iapoenja kedoea njonja - madjikan, dengen mendjalanken kehormatan sebegimana pantesnja.
„Sedari boedakmoe jang toea ikoet minggat dari roema, ampir poetoes harepan aken bisa bertemoe poela, tapi tiada, bisa disangka ini hari bisa ketemoeken Tjoe-boe dan Siotjia di ini tempat,“ demikianlah berkata Loe Tiong dengen soeara piloe, „soenggoe inilah ada satoe kemoedjoeran jang tiada terhingga !“
Hoedjin angkat bangoenin itoe boedak toea jang setia, sambil berkata:
„Ja, kitaorang soeda menjoesaken kaoe sampe moesti alamin banjak kesengsaraän dan ketjapean selama mengikoet anakkoe lari minggat, lagipoen kaoe soeda oendjoek kesetiaän begitoe besar, sehingga anakkoe sampe sekarang tiada koerang soeatoe apa. Kaoepoenja djasa ternjata boekan ketjil adanja, kitaorang harep nanti aken bisa berboeat apa-apa boeat membales padamoe !“
Sehabisnja berkata, Hoedjin prenta iapoenja boedak prempoean aken bawa itoe boedak toea pergi makan dan minoem. Dan apabila di sitoe tida poela ada laen orang ketjoeali marika bertiga, Hoedjin lantas tjeritaken halnja Wie Jong Tat telah menoeloeng marika berdoea, serta angkat soempa mengakoe iboe dan soedara, serta perlakoeken iaorang sama seperti sanak - soedara sendiri.
„Tapi Wie Jong Tat jang masi beroesia amat moeda, mempoenjai kegagahan dan roman begitoe tjakep serta loear biasa,“ berkata Siauw Hoa, „heran sekali apa sebab boleh tjeboerken diri dalem golongan kawanan brandal?“ „Sebetoelnja dia djoega ada berasal toeroenan panglima perang,” kata Ie Sie Hoedjin „berdiam di sini djoega ada boeat samentara waktoe, aken menoenggoe tempo jang baek boeat dia boleh bergerak menjampeken maksoed hatinja. Tetapi tiada taoe sekean lama ini kaoe ada berdiam di mana ? Dan sekarang berniat hendak pergi ka mana?”
Siauw Hoa laloe menoetoerken satoe-persatoe tentang segala apa jang soeda terdjadi atas dirinja, sampe pada niatan jang ia bersama Him Hauw hendak menoedjoe ka kota radja.
Koetika le Sie dengen Tiang Hoa soeda denger penoetoerannja Siauw Hoa prihal dirinja Him Hauw, iaorang djadi berkata dengen pengrasaän kagoem:
„Kiranja di doenia masi djoega bisa terdapet manoesia jang berhati begitoe moelia! Dan patoet sekali kitaorang bersama-sama pergi di loear boeat mengatoerken trima kasi padanja.”
Demikianlah dengen mengikoetin Siauw Hoa, le Sie bersama Siotjia kita lantas dateng ka Tjoe Gie Thia, di mana Siauw Hoa terlebi doeloe soeda sampe, sembari mengasi taoe pada Him Hauw halnja iapoenja iboe dan entji hendak dateng mengatoerken trima kasi.
Him Hauw djadi sanget terkedjoet dan berkata dengen soeara goegoep:
„Gie Heng ada poenja kebaekan apatah, brani menerima Leng Tong Pek Boe ampoenja oetjapan trima kasi? Oh, Hian Te, hareplah selekasnja soeka memegat aken Pek Boe oeroengken itoe niatan.“
Belon habis Him Hauw berkata kata, Hoedjin di depan dan Siotjia di blakang, kedoeanja soeda sampe di sitoe. Hoedjin dateng lebi deket sambil membilang pada Him Hauw:
„Lantaran nasib tjilaka, seroema tanggakoe hadepin bintjana heibat, sampe merembet djoega kapada Hian Tit boeat tertjere dari bini dan terpisa dari anak. Itoe semoea meloeloe hendak membelah anakkoe, serta ingin menoeloeng soeamikoe bisa balik poelang kemari. Och, boedi sedemikian besar jang ditanggoeng oleh kitaorang seroema tangga, tiada tjoekoep terbales hanja dengen oetjapan di bibir, maoepoen kandoengan di dalem pikiran!“
Berbareng dengen habisnja ini perkataän, itoe iboe, poetri dan poetra, keliatan soeda pada djatoken dirinja berloetoet di hadepan Him Hauw.
Ripoe amat keadaännja Him Hauw itoe tatkala, dengen tergopoh gopoh ia poen lekas toeroet berloetoet di lante, seraja berkata :
„Kaloe Siauw Tit moesti trima Pek Boe, Siotjia dan Kongtjoe ampoenja kehormatan begitoe roepa, itoelah bakal mengoerangin Siauw Tit poenja, oemoer; moehoen sanget Pek Boe sekalian soeka lantas bangoen !“
Begitoelah koetika sesoedanja kedoea fihak saling menjodja, orang lantas pada bangoen berdiri, sedeng Hoedjin kombali mengoetjapken trima kasi pada Him Hauw, kemoedian dengen berpaling pada Jong Tat, Hoedjin membilang :
„Soekalah anakkoe prenta orang boeat sediaken medja perhidangan aken mendjamoe Him In Djin.“
„Ja, inilah memang ada mendjadi anak poenja kewadjiban,“ mendjawab Jong Tat, „kaloe perloe, Boetjin dan Hian-moaij boleh tinggalken ini tempat.”
Hoedjin bersama poetrinja poen lantas moendoer dari sitoe dan balik poeiang ka blakang. Samentara bebrapa orang Liauw-lo soeda mengatoer beres seboeah medja perdjamoean, di mana kemoedian itoe ketiga orang moeda laloe doedoek makan-minoem dengen penoe kegoembirahan, sebab satoe sama laen keliatannja poen ada amat meresep; apalagi marikapoenja pertjakepan dan peroendingan tenga makan-minoem, tentang soeal-soeal dari ilmoe perang dan ilmoe silat, ternjata tjotjok betoel pendapatannja, inilah semingkin menambaken kerapetan bagi marikapoenja pengrasaän dan batin.
Sampe djaoe malem, baroelah ini perdjamoean berachir. Tatkala mana, Siauw Hoa membilang pada Him Hauwho:
„Siauw Te hendak masoek ka dalem boeat beromong-omong poela lebi djaoe dengen Boetjin, harep Heng Tiang poenja maaf jang Siauw Te soeda tida menemenin setjoekoepnja.“
„Ja, ini toch ada satoe keharoesan jang Hian Te wadjib berboeat, saoetoja Him Hauw.“
Saorang Liauw lo itoe tempo soeda menoenggoe dengen palita di tangan, begitoelah sesoeda kombali pamitan pada Him Hauw dan Jong Tat, laloe Siauw Hoa ikoetin itoe Liauw-lo djalan menoedjoe ka blakang.
Samentara Jong Tat jang merasa begitoe meresep pada tetamoenja, menoeroet sang napsoe, tadinja ia hendak doedoek teroes disitoe boeat temenin Him Hauw, minoem lagi arak atawa bertjakep tjakep. Sebaliknja adalah sang hati tiada mengidzinken, kerna koeatir bisa mendatengken orang poenja ketjoerigaän dan tjemboeroean di hari blakang. Demikian dengen pengrasaän berat sang Taij Ong kepaksa antarken djoega Him Hauw ka kamar tetamoe boeat mengaso, sedeng ia sendiri kemoedian lantas balik poelang dalem kamar tidoernja. Ia tiada bisa lekas tidoer, pikirannja selaloe melajang-lajang pada pertemoeannja dengen itoe kedoea anak moeda. Achir-achir ia harep, di hari kemoedian moedah - moedahan Allah perdjodoken dia pada sala satoe di antara itoe doea pemoeda. Him Hauw atawa Siauw Hoa?
XXXVII.
Him Joe Hok di kota radja masoek
soldadoe. Ong Siauw Hoe di
lapangan pertandingan meng-
oendjoek kebisaännja.
Tetekala Hong Hoe Siauw Hoa soeda berada di pasanggrahan blakang, atawa sewaktoe berada berdoea sadja dengen sang iboe, diam-diam Siauw Hoa telah membilang pada Ie Sie:
„Tji-tji sekarang toch soeda beroesia tjoekoep, sedeng Wie Jong Tat ada mempoenjai kegagahan loear - biasa dan beroman amat tjakep, lagipoen telah melimpaken boedi pada kitaorang, mengapalah Boetjin tiada hendak merangkepin Tji - tji ampoenja perdjodoan padanja? Boekanlah ini djoega ada satoe pasangan jang setimpal betoel?“
„Ha, ha,“ berkata Ie Sie sembari ketawa, „ketahoeilah, bahoea Wie Jong Tat poen melaenken ada saorang prempoean jang telah menjaroe lelaki. Sedeng tadinja kaloe dia itoe ada satoe lelaki toelen, iboemoe toch tiada aken berdiam di sini sampe sekean lama, kerna daripada nama kehormatan mendjadi noda, adalah lebi baek djiwa terbinasa!“
Oh, soenggoe tiada bisa disangka, .jpg)
| HONG HOE TẠNG HOA |
IE SIE |
Hoedjin lantas menoetoerken asal-oesoelnja Jong Tat jang mempoenjai nama Goei Jong Go dan sebagi penoetoep tjeritanja Hoedjin berkata lebi djaoe:
„Sekarang ini Beng Lee Koen soeda mati, maka hari kemoedian kapan kaoe soeda bisa menoeloeng ajahmoe balik poelang di negri sendiri serta beroleh satoe kebesaran, kaoë moesti ambil itoe gadis boeat istrimoe, baroelah apa jang terkandoeng dalem tjitakoe djadi terkaboel. Akoe taoe betoel Jong Go itoe selaen gaga - perkasa djoega tjerdik serta bidjaksana, hingga dia tentoe bakal bisa mendjadi satoe istri jang baek dan njonja roema jang pinter.
Mendenger begitoe, Siauw Hoa djadi merasa heran tertjampoer kaget, dengen setjara kesoesoe, ia laloe menanja lagi:
„Begimana Boetjin bisa dapet taoe Beng Sie soeda meninggal?”
Ie Sie kombali moesti tjeritaken halnja Lauw Ke Pek telah membawa satoe pasoekan soldadoe negri dateng memoekoel ini goenoeng dan kena tertawan, dari pengakoean siapa, orang baroe bisa mengetahoei hal kematiannja Beng Sie dengen djalan memboeang diri dalem soengi. Sambil menoetoerken ini hal, Hoedjin laloe ambil keloear itoe soerat pengakoean dari Lauw Ke Pek, kasiken pada sang poetra boeat dibatja. Apabila Siauw Hoa soeda batja habis itoe soerat, dalem hatinja seperti baroe sadja dapetken seroepa penjoeloeh, jang membikin segala apa mendjadi terang bagi ia.
„Di mana Lauw Ke Pek sekarang berada?” achirnja Siauw Hoa menanja.
„Tempo dia itoe baroe dapet ditangkep entjimoe lantas sadja hendak memboenoe mati padanja.” djawab Ie Sie, „tapi Jong Tat menjega dengen sanget, kerna koeatir perboeatan begitoe bisa menambaken kemorkahannja sri-baginda; dari itoe, banja soeda dikoeroeng sadja dalem pendjara di bawah tana, soepaja dia bisa rasaken sedikit siksaän.”
„Ja. itoe bangsat jang berhati kedjem, memang pantes dikasi rasa siksaän begitoe,” berkata lagi Siauw Hoa, „tapi Beng Sie jang soeda mengorbanken djiwanja boeat goena familie Hong Hoe, soenggoe kesian dan ketjiwa sekali!”
„Dari itoe, kapan di hari blakang kaoe bisa dapetken pangkat kebesaran,” kata lagi Ie Sie lebi djaoe, „kaoe haroes tiada loepaken boeat sebrapa bisa mintaken koerniaän dari satoe gelaran kemoeliaän boeat Beng Sie jang wafat. Begitoe kaoe djadi teritoeng bisa menjoekoepin itoe kewadjiban tentang membales orang poenja kebaekan.”
Demikianlah teroes-meneroes ini iboe dan poetra asik beromong - omong segala kedjadian jang berhoeboeng dengen keadaän marika, apa - kata bagi orang jang soeda terpisa sebegitoe lama, hingga djam ampat baroelah masing-masing pada masoek tidoer.
Besok paginja, sesoeda bangoen dari tidoernja, menjoetji moeka dan tjit njawak serta berpakean beres, Siauw Hoa laloe dateng poela ka Tjoe Gie Thia, di mana lebi doeloe soeda ada Him Haow bersama Jong Tat lagi doedoek bertjakepan dengen goembira.
Sesoedanja orang saling membri hormat, laloe masing-masing mengambil tempat doedoek, tiada lama lagi medja perhidangan poen soeda disediaken, maka tiga orang ini lantas pinda poela berdoedoek dengen hadepin medja santapan, serta moelai makan dan mminoem dengen seneng. Dalem begitoe, kedengeran Wie Jong Tat telah menanja lagi:
„Dji-wie poenja maksoed sekarang hendak pergi ka mana?”
Siauw Hoa lantas tjeritaken prihal ia menerima titah goeroenja, hendak menjaroe nama palsoe pergi ka kota radja boeat toeroet masoek soldadoe, kemoedian berichtiar sebisanja aken menoeloeng ajahnja balik poelang dalem negri.
„Ja, akoe djoega soeda denger prihal itoe soerat - soerat plekat mentjari orang gaga tadinja memang beraniat hendak pergi ka kota radja boeat masoek soldadoe, tapi, kerna koeatir baginda, poenja kemorkahan atas perboeatankoe, jang bisa djadi nanti berbalik menjilakaken djiwa sendiri, maka akoe djadi oeroengken itoe niatan,” demikian katanja Jong Tat, „dan sekarang Dji- wie soeda ambil ketetepan dateng dalem kota radja, itoe lah bisa dipastiken tentoe bakal kesampean apa jang diharep, kaloe begitoe, akoe harep Dji-wie aken tiada loepa mintaken ampoen boeat akoe, agar soepaja akoe bisa terbebas dari kedosaan serta ketrimaan boeat ikoet perang bersama-sama, boeat mana akoe soeka membawa pasoekankoe sendiri madjoe sebagi barisan paling depan aken hadepin moesoe, dengen begitoe akoe djadi bisa berkerdja aken perolehken pahala boeat meneboes dosakoe jang soeda - soeda Samentara atas Dji- wie poenja boedi pertoeloengan, tentoe tiada terloepa boeat selama-lamanja.”
„Wie Heng jang soeda mengoendjoek boedi begitoe besar dengen perlakoeken Hoedjin, iboe dan anak, melebiken dari kepantesan, kitaorang menghargaken tinggi sekali,” begitoelah berkata Him Hauw dan Siauw. Hoa dengen soeara berbareng, „kaloe sadja kitaorang sampe tertjapai apa jang dikandoeng dalem hati, tentoelah dengan sebisa-bisanja Kitaorang nanti mintaken itoe keampoenan di hadepan sri - baginda, serta Djin Heng bisa ketrimaan boeat ikoet perang bersama-sama kerna dengen begitoe, boekan sadja Djin Heng nanti bisa oendjoek kesetiaan aken membelah negri, tapi djoega kita-orang poen djadi dapetken satoe bantoean jang amat berharga.
Wie Jong Tat djadi amat girang setelah mendenger ini perkataan, kemoedian ia membilang lagi pada Siauw Hoa:
„Itoe hari Lauw Ke Pek sesoeda kena ditangkep, sampe sekarang masi terpendjara dalem pemboeian tana boeat dia rasaken sedikit siksaan, atas kedjahatannja. Dan dia itoe adalah mendjadi Hian Te poenja sala satoe moesoe jang teroetama, brangkali Hian Te ada pikiran maoe liat padanja?”
„Kemaren Siauw Te poen baroe mendapet denger ini hal dari Boetjin,” kata Siauw Hoa, „baeklah, kaloe Heng Tiang tiada kebratan, soeka toeloeng soeroe dia keloear kemari, memang Siauw Te ingin sekali meliat padanja.”
Jong Tat lantas prenta orang - orangnja aken sigra pergi bawa dateng Lauw Ke Pek kemari, begitoe tiada antara lama, bebrapa orang Liauw-lo keliatan telah bawa dateng itoe orang tawanan. Dati djaoe Siauw Hoa memandeng Lauw Ke Pek jang berada dalem keadaän: ramboet koesoet, moeka mesoem, kaki telandjang, sedeng tangan ada terpasang borgolan, hingga roepanja ampir mirip seperti itoe setan djahat dalem achirat. Maka Siauw Hoa jang memang terkenal ada saorang berhati moerah dan boediman, meliat ini keadaän serta mengenang aken itoe semoea kedjadian doeloe-doeloenja, tiada merasa dalem hatinja sigra terbit seroepa pengrasaän sedih dan terharoe. Kemoedian ia membilang pada Ke Pek:
„Kesian amat Lauw Tjiok Tjoe! Perboeatan jang keterlaloean dari hari- hari jang liwat, siapa njana sekarang toch bisa hadepin ini kesengsaraän, maka itoe, manoesia idoep di doenia djanganlah berlakoe keliwatan.“
Adapoen Lauw Ke Pek sedari terpendjara sampe sekarang ini, selaen dari moesti trima itoe siksaän jang tiada enak, djoega ia belon perna bisa meliat langit dan matahari. Ini hari, koetika baroe sadja dapet pandeng terangnja hari, sigra ia dapetken antara tiga orang jang berdoedoek di atas itoe, sala satoenja ada Hong Hoe Siauw Hoa dan kerna mengharep boleh dapetken pertoeloengan, maka dengen meloepaken maloe, ia sigra madjoe ka depan, sembari memanggil katanja:
„Hong Hoe Hian Heng, ketahoeilah, bahoea itoe hari jang Siauw Tjhoen Teng terbit kebakaran, sebetoelnja Siauw Te tiada taoe satoe apa, kerna djoestroe berada di roemanja Gwa-ma. Begitoepoen halnja Lo Pek memoekoel Tiauw Sian dan kena tertangkep atawa menoeroet wartanja San Tong Soen Boe, ada dibilang telah menaloek pada moesoe, itoe semoea ada oeroesan dalem keradjaän, Siauw Te toch tida bisa ditoedoeh ada toeroet tjampoer. Samentara prihal memoekoel ini goenoeng, itoe toch ada mendjalanken kewadjiban atas titahnja sri-baginda. Maka apa jang tertoelis di soerat pengakoehan, bohong belaka sebab tiada koeat menanggoeng rangketan, biarlah Djin Heng tiada anggep sebetoelnja, kesianilah aken nasib Siauw Te... .., Terkoeroeng dalem pendjara tana, setiap hari tjoema dapet makan satoe kali dengen tiada ada apa-apanja. Makan, tidoer dan boeang aer hanja di itoe satoe tempat. Tiada menampak langit dan tiada terliat matahari. Idoep tiada boleh, mati poen tiada bisa! Och, Hian Heng, siksaan jang dirasai, soenggoe berat sekali, maka oendjoekinlah kemoerahan, agar Siauw Te bisa terbebas dan poelang di kota radja. Seroema-tanggakoe tentoe rata-rata bersoekoer tiada habisnja.”
(Aken disamboeng).
„Ach, Lauw Tjiok Tjoe,” berkata Siauw Hoa dengen pengrasaän tiada tega, „kaoe poenja hati ternjata sanget kedjem dan berbisa. Djika sekarang kaoe dilepasken poelang nistjajalah kaoe nanti terbitken poela laen gloembang jang terlebi heibat boėat ketjilakaännja kitaorang. Ja, maskipoen kaoe berhati begitoe kedji, tapi akoe tiada aken bisa merasa tega meliat kaoe dalem ini keadaan.”
Berkata sampe di sini, Siauw Hoa laloe berpaling pada Wie Jong Tat dan setjara orang memoehoen, ia berkata:
„Soedilah apa kiranja dengen memandeng Siauw Te poenja moeka, Heng Tiang maoe kasi sedikit kelonggaran padanja. Bebasken dia dari pendjara bawah tana, hanja ganti koeroeng sadja di sala satoe kamar kosong dengen kaki-tangan zonder borgolan, toch dia tiada aken gampang minggat dari sini, begitoe djoega setiap hari, pagi dan sore, kasiken dia makan kenjang dan pakean lebi baek dari apa jang ada sekarang ini. Dengen begitoe, Siauw Te aken menerima Heng Tiang poenja pengasian dan boedi boekan ketjil.”
„Kaloe Hian Te soeda poenja hati begitoe moelia dan batin pemoerah,” berkata Jong Tat dengen roepa girang, „moestail Gie Heng berbalik moesti mendjadi saorang jang kedjem dan tiada poenja pri-kamanoesiaän.”
Berbareng habisnja ini oetjapan, Jong Tat lantas keloearken prenta soepaja ampat orang Liauw -lo bergiliran siang - malem lakoeken pendjagaän atas dirinja Lauw Ke Pek, jang moelai ini hari dikoeroeng sadja dalem kamar kosong. Makan dan pake wadjib dikasiken setjoekoepnja pada setiap harinja di waktoe pagi dan sore, serta orang dilarang oendjoekin kekasaran atawa kebengisan pada ini orang tahanan.
Apabila Ke-Pek soeda mendenger itoe Taij Ong ampoenja prenta satoe - persatoe pada Liauw - lonja, dalem hati djadi merasa amat bersoekoer, seraja dengen mengoetjapken trima kasi ia berkata lagi pada Siauw Hoa:
„Djin Heng poenja batin jang moelia soeda bisa meloepaken segala permoesoean lama, Allah tentoe nanti gandjarken keberkahan sebaliknja aken Siauw Te jang berbatin boesoek, memang pantes trima ini matjem siksaän, tepi sekarang maoe menjesel toch soeda kasep!”
Siauw Hoa laloe berdiri dari tempat doedoeknja dan angkat bangoenin Ke Pek dari berloetoetnja, serta prenta Liauw-lo aken toentoen padanja bawa ka itoe kamar kosong jang telah disediaken, djoega dipesen aken ambilin aer boeat ia menjoetji badan dan ganti pakean. Begitoelah moelai itoe hari Ke Pek djadi dapetken soeatoe perobahan jang boekan ketjil, ia tiada lagi rasaken siksaän begimana ketjil djoega, malahan ampir tiada beda ia ada mendjadi tetamoe dari goenoeng terseboet, maka ia sekarang merasa menanggoeng boedi besar dari Siauw Hoa, siapa tadinja ia ada begitoe moesoehin dan satronin dengen berbagi-bagi djalan jang tiada patoet.
Samentara itoe, Siauw Hoa, Him Hauw dan Jong Tat, masi teroes doedoek makan minoem dengen bersoekatjita. Itoe Taij Ong kombali membitjaraken prihal Beng Siotjia lakoeken pemboenoean dan kemoedian binasaken djiwa sendiri dengen memboeang diri dalem aer. Him Hauw dengen hadepin Siauw Hoa telah mengalem katanja: „Sesoenggoenja Hian Te ampoenja familie bisa dibilang beroentoeng djoega, kerna bisa mendapetken satoe Beng Siotjia jang mempoenjai hati keras serta bersetia dan djarang bisa terdapet kadoeanja poela gadis sematjem itoe. Sebaliknja dengen terdjadinja ini hal, mendjadi Hian Te tentoe bakal mengambil Lauw Siotjia sebagi istri kawin jang pertama“.
„Sesoedanja Beng Sie bisa memegang kesetiaän dan membelah kesoetjian dirinja begitoe roepa, seharoesnja akoe poen tiada lajik menika poela boeat seoemoer idoep. Lagipoen tentang halnja Lauw Sie, itoe toch malaenken ada beroepa seperti satoe perdjandjian maen-maen di satoe waktoe, tambahan dia itoe tiada lebi ada poetrinja sala satoe moesoekoe jang paling besar, tjara begimana ini perangkepan djodo bisa diharep terdjadinja,“ demikian Siauw Hoa telah menjaoet atas perkataännja itoe soedara angkat, „akoe pikir, biarlah di hari blakang mengambil sadja saorang goendik, boeat menjamboeng toeroenan serta merawatin kedoea orang toeakoe, sedeng itoe kedoedoekan sebagi bini pertama ditinggal kosong aken membales kebaekannja Beng Sie. Demikianlah adanja Siauw Te ampoenja maksoed hati.“ „Beng Sie soeda meninggal, Hian Te toch tiada perloe moesti ambil itoe tjara,“ berkata Him Hauw, „sama sekali tiada ada djahatnja boeat kaoe nanti kawinin poela satoe bini kawin jang sah.“
„Heng Tiang poenja perbilangan memang betoel,“ djawab poela Siauw Hoa, „tapi itoe melaenken menoeroet Siauw Te poenja angen angen sadja. Begitoe djoega hal mengambil goendik, akoe toch moesti toenggoe sampe ajah soeda balik poelang kemari, atawa sesoeda mendjalanin kaboengan tiga taon bagi Beng Sie, baroelah mengatoer ini oeroesan, begitoe baroe bisa dibilang tjara perboeatannja satoe lelaki sedjati.“
Wie Jong Tat djadi memoedji-moedji seraja berkata :
„Oh, boeat Hian Te, soeami dan istri, soenggoe boleh dibilang ada satoe soeami jang boediman dan istri jang setiawan, jang djarang terdapet tandingannja di ini doenia!“
„Itoepoen melaenken ada mendjadi kewadjibannja sesoeatoe manoesia,“ membales Siauw Hoa, „maka Heng Tiang poenja poedjian bisa dibilang melebiken dari jang sebenernja. Tapi besok Siauw Te aken lantas brangkat menoedjoe ka kota radja.“
„Sebetoelnja akoe berniat hendak menahan Dji- wie bebrapa hari lagi di sini,” berkata sang Taij Ong, „tapi koeatir nanti bisa membikin kepiran pada oeroesan masoek soldadoe jang temponja soeda deket, memang baek kapan besok kaoeorang sigra brangkat djalan.„”
„Itoe hari, orang makan-minoem sampe lohor baroe boebar, sedeng Siauw Hoa sigra berdjalan masoek ka pasanggrahan blakang, boeat kasi slamet tinggal pada iboe dan entjinja atas iapoenja brangkat di hari esok.
„Kaoepoenja pergi ini, anakkoe,”. berkata Ie Sie Hoedjin, „haroeslah berlakoe ati - ati. Kaloe kaoe bisa perolehken kemenangan, serta bersama ajahmoe balik poelang ka negri sendiri, bolehlah kemoedian lantas mengambil Jong Tat sebagi istrimoe.”
„Dalem oeroesan perkawinan,” djawab Siauw Hoa, „biarlah di blakang hari sadja kitaorang nanti membitjaraken lebi djaoe.”
Sehabisnja berkata, Siauw Hoa laloe keloear poela dan dateng di Tjoe Gie Thia, di mana ia panggil dateng Loe Tiong di hadepannja.
„Kaoepoenja oesia jang begitoe tinggi, akoe kira lebi baek traoesa ikoet padakoe boeat pergi ka kota radja,” begitoelah Siauw Hoa membilang pada boedak toeanja.
„Biarpoen begitoe,” saoet Loe Tiong, „hamba toch wadjib selaloe mengikoet pada Kongtjoe, mana brani menampik tjoema takoet tjape.”
„Djangan. Loe Tiong,” Jong Tat toeroet menjega, „waktoe moesim dingin begini, orang toea sematjem kaoe tiada koeat menaban hawa dingin di kota radja, dari itoe biarlah kaoe tinggal sadja di sini. Sedeng boeat gantimoe akoe nanti soeroe doea orang pengikoetkoe jang boleh diandelin boeat mengikoet kaoepoenja Kongtjoe pergi ka kota radja Marika itoe ada bernama Lie Beng dan Teng Soan, radjin berkerdja serta tahan menanggoeng tjape, lagipoen masi moeda dan koeat, hingga kaloe di perdjalanan ada tertampak bahaja apa-apa, marika djoega bisa membantoe dengen tenaganja, tiada seperti kaoe jang tentoe tiada berdaja sama sekali sebab terlaloe toea.”
Berbareng habis oetjapken ini perkataän, Taij Ong kita lantas panggil dateng Lie Beng dan Teng Soan, jang sebentar lagi kedoea orang terseboet soeda berada di sitoe, serta lebi doeloe membri hormat pada ketiga pemoeda jang berdoedoek di atas Tjoe Gie Thia. Him Hauw dan Siauw Hoa memperhatiken orang poenja roman dan keadaän, maka ia dapetken kedoea orang itoe ada beroemoer belon tjoekoep tigapoeloe taon, dadanja lebar sedeng pinggangnja boender, satoe tanda iaorang moestinja mempoenjai tenaga besar berikoet sikep sebagi orang jang bernjali besar.
Wie Jong Tat lebi doeloe menoetoerken: tentang iapoenja kemaoean pada Lie Beng dan Teng Soan, kemoedian ia landjoetken perkataannja :
„Ja, kaoeorang haroeslah berlakoe jakin dan ati-ati boeat ikoetin ini Hong Hoe Kong-tjoe dan Him Siang Kong brangkat ka kota radja, di blakang hari akoe tentoe nanti mengasi banjak persenan boeat kaoerang poenja ketjapean itoe.”
Lie Beng dan Teng Soan menerima ini titah dengen seneng hati, sembari kemoedian sama-sama berlaloe dari sitoe.
Besoknja di waktoe masi pagi, Wie Jong Tat soeda sediaken seboeah medja perdjamoean jang lengkep, boeat mendjamoe Him Hauw dan Siauw Hoa sebagi peringetan membri slamet djalan; begitoelah ketiga pemoeda itoe sama doedoek makan - minoem boeat sekoetika lamanja.
Samentara Siauw Hoa kemoedian telah masoek kombali ka pasanggrahan blakang, boeat hatoerken slamet berpisa pada iboe dan entjinja.
„Kaloe Hian Te sampe bisa hadepin kemoedjoeran di medan pengoedjian examen,“ sekoenjoeng - koenjoeng Tiang Hoa Siotjia kedengeran membilang, „Gie Tjie djoega ingin ikoet perang bersama-sama boeat menoeloeng pada Hoetjin.“
„Tji-tji toch melaenken ada saorang prempoean.“ djawab Siauw Hoa dengen roepa sedikit terprandjat, „apalagi itoe gloembang dari aer ombak tiada bisa disingkirin. Begimana Tji-tji boleh pergi bersama-sama?“
„Akoe djoega hanja hendak menjoekoepin sadja sedikit tentang pri-kebaktian dari satoe anak terhadep orang toeanja,“ kata lagi Sio-tjia kita, „koeatir apa sama segala ombak dan gloembang? Ja, Hian Te, kaoe moesti merapportken ka hadepan sri-baginda boeat akoe boleh toeroet perang, sedeng laen - laennja hal ada teritoeng oeroesan di blakang, jang tiada perloe moesti dipikirin sekarang.“
„Baeklah, kapan Tji - tji soeda tetepken niatan begitoe,“ achirnja sang ade kepaksa membri sanggoepan, seraja berkata poela lebi djaoe: Tapi Loe Tiong jang toea biarlah boeat samentara ini ditinggal sadja di sini, aken bantoe melajanin Boetjin serta Tji-tji, soepaja dia traoesa moesti ikoet anak boeat alamin segala kesengsaraän dan ketjapean di perdjalanan.“
Hoedjin trima baek itoe pikiran dan Siauw Hoa setelah kombali oetjapken slamet tinggal, sigra djoega berdjalan keloear dari sitoe dan dateng lagi di Tjoe Gie Thia di mana bersama Him Hauw laloe masing-masing menoenggang koedanja, sedeng Lie Beng dan Teng Soan dengen menenteng boengkoesan di poendaknja ada djalan mengikoet dari blakang. Begitoelah orang berame-rame menoedjoe ka bawah goenoeng, dengen Wie Jong Tat mengantarin sampe ka djalanan prapatan.
„Djangan loepa, Hian Te,“ kombali memesen Jong Tat koetika orang hendak berpisaän, „kaloe sadja Hian Te sampe bisa terloeloes dalem oedjian, moesti mintaken keampoenan sehingga Gie Heng diperkenanken boeat madjoe perang bersama-sama, serta dapet djalan mendiriken pahala boeat meneboes kedosaän jang soeda-soeda.“
„Siauw Te seroema tangga jang telah menerima Heng Tiang ampoenja boedi besar, sedeng merasa tiada ada djalan boeat bisa membales,” djawab Siauw Hoa, „masakah boeat ini satoe pesenan, Siauw Te brani meloepaken serta tiada mengerdjaken dengen sesoenggoe-soenggoenja hati.”
Demikian kemoedian sesoeda kedoea fihak saling angkat tangan membri hormat laloe pada berpisaän, di mana Jong Tat sigra balik poelang ka Tjoei Taij San, samentara Him Hauw, Siauw Hoa berikoet kedoea pengikoetnja lantas mengambil djalan menoedjoe ka kota radja dengen spoed.
Pada pertengahan dari boelan Tjhia-gwee, baroelah marika bisa sampe di kota radja, di mana iaorang telah tjari dan sewa satoe roema ketjil dari pendoedoek di itoe tempat. Apabila semoea ini soeda mendjadi beres, boeroe-boeroe marika menoelis soerat rekest boeat masoek soldadoe, dalem mana, Him Hauw tentoe sadja telah membri ketrangan sebetoelnja tentang nama, asal-oesoel dan tempat kelahirannja serta kediamannja sekarang. Sebaliknja Siauw Hoa ada membri ketrangan bahoea ia ada berasal dari residentie Gak Tjioe Hoe, afdeeling Peng Kang Koan, bernama Ong Siauw Hoe alias Siong Hoa, beroesia delapanblas taon. Lebi djaoe masing - masing poen sediaken satoe boengkoes oewang sekedar boeat blandja menoelis oentoek orang-orang dalem kantoor Peng Po.
Begitoelah pada esoknja setelah dahar pagi, kedoea pemoeda terseboet laloe keloear dari tempat kediamannja, menanja - nanja sampe dapet tjari itoe kantoor dari departement peprangan, di sitoe iaorang lantas memasoekin rekestnja jang kemoedian oleh orang dari kantoor terseboet ditjatet dalem boekoe satoe-persatoe dengen beres, baroelah marika balik poelang lagi ka tempat menginepnja, bersedia dan menoenggoe datengnja waktoe dari pemboekaän examen.
Samentara itoe, adalah Lee Beng Tong di satoe hari dapet pikiran, bahoea sekean lama soerat-soerat plekat seloeroe negri soeda disiarken, tapi belon tace adakah sang toenangan soeda dateng masoekin namanja, atawakah belon? Maka ia lantas titah sala satoe orangoja aken pergi ambil bawa dateng itoe boekoe tjatetan dari nama-namanja orang jang hendak masoek soldadoe.
Koetika orang soeroean itoe soeda balik kombali dan serahken boekoe jang diminta, Beng Tong laloe preksa satoe - persatoe dengen teliti, tempo dapet liat sampe pada bagian di mana ada tertjatet itoe nama Ong Siauw Hoe, dalem hatinja djadi terbit sangkahan jang itoe tentoenja ada Hong Hoe Siauw Hoa ampoenja nama samaran. Kemoedian ia lantas bawa itoe boekoe tjatetan masoek ka dalem, oendjoekin pada So Hoa sembari membilang dengen soeara mirip bisikan :
„Ini satoe nama Ong Siauw Hoe alias Siong Hoa, moestinja ada nama palsoe dari Hong Hoe Long!“
„Begimana Siotjia bisa mendoega begitoe?“ tanja So Hoa.
„Kaloe itoe satoe hoeroef „Siong“ dilaloeken, tidakah kita aken dapetken satoe seboetan dari „Hong Hoe Siauw Hoa“? Lagipoen oesianja ada tertjatet delapanblas taon, samentara orang jang dateng bersama- sama dia ada bernama Him Hauw, djoega berasal dari afdeeling Peng Kang Koan, siapa telah perna beroleh gelaran Boe Kie Djin, tentoenja dia itoe sedikitnja bisa dipastiken ada saorang jang gaga - perkasa, maka itoe soeda brani bersama-sama dateng masoek soldadoe dan djoega dia itoe moestinja ada mendjadi soeami kita ampoenja sobat baek.“
„Ja, bener sekali sebegimana Siotjia ampoenja doegaän,“ berkata So Hoa, „akoe harep bahoea itoe tiada bakal meleset lagi.“
Sang hari ternjata berdjalan begitoe pesat sebentar sadja itoé tempo jang soeda ditetepken boeat pemboekaan examen keliatan telah dateng deket sekali. Tiga bari sebelonnja itoe, di waktoe pagi sedeng sri-baginda lagi doedoek bersemajam di tachta kera- djaan, Lee Beng Tong telah madjoe mengadep sembari merapport katanja:
„Bahoea di taon jang berselang Pihe telah mengeloearken titah boeat mengoempoel orang-orang kosen dengen ditetepken di ini taon boelan Dji-gwee tanggal satoe hendak dilakoeken pemboekain. examen. Sekarang itoe tempo soeda sampe, maka Sin harep Pihe aken sigra menetepken orang jang wadjib mendjadi kapala examen, agar ini perkerdjaan bisa berdjalan beres.”
„Ja, ini gerakan semoea ada berasal dari Keng ampoenja voorstelan,“ bersabda baginda Seng Tjong, begitoe djoega segala pembesar militair ada di bawah penilikan dan pengoeasaannja Peng Po, maka ada soeroep sekali kapan Keng jang mendjadi kapala examea, masakah moesti dipili poela laen orang?“
„Menjaboet dan memili orang-orang gaga, haroeslah dengen keadilan dan kedjoedjoeran sepenoe-penoenja, baroe bisa diharep boeat memperolehken orang jang berkebisaan sedjati,” demikian Beng Tong merapport lagi, „seande melaenken satoe orang sadja jang mengepalai, itoelah gampang aken orang menoedjoe ka djalanan jang menjimpang; maka itoe, Sin harep Pihe soeka wadjibken poela satoe-doea orang mantri besar boeat sama-sama menilik atas ini perkerdjaän, soepaja hasil jang didapet bisa memoeasken serta tiada sampe menerbitken tjelahän di blakang.”
„Kaloe Keng soeda berkoeatir sampe begitoe djaoe,” bersabda poela sri - baginda sambil mengalem, „baeklah, Tim aken oetoes lagi doea orang mantri besar boeat sama-sama lakoeken penilikan.“
Berbareng itoe, baginda lantas menitah pembesar Tong Tjin Sie bernama Siang Gie Sian dan To Tjat Gie Soe bernama Joe Taij Boet boeat pegang itoe kewadjiban, sembari memesen katanja:
„Ini oeroesan memili orang - orang gaga, seanteronja Tim soeda serahken pada Lee Koen Giok, maka sekarang Keng berdoea jang diwadjibken bersama-sama pergi boeat lakoeken penilikan, tapi dalem sesoeatoe tjara tentang pemilian, adalah semoea menoeroet poetoesan dari Lee Koen Giok, samentara Keng berdoea biarlah djangan oendjoekin tangan sedikit djoega.“
Kedoea mantri itoe menerima ini titah dengen baek, sedeng persidangan itoe poen sigra ditoetoep, baginda keizer moedoer masoek ka dalem astananja, begitoe djoega sekalian mantri-mantri berbareng pada berla- loe dari kraton.
Koetika soeda berada di loear, kedoea mantri itoe laloe samperin pada Lee Beng Tong, seraja membilang:
„Taij Djin ada mendjadi kapala examen jang pertama, hareplah soeka lantas keloearken soerat pembrian taoe, soepaja sekalian candidaat bisa bersedia. He Khoa berdoea pada nanti tanggal Dji-gwee Tjhe-it, tentoe bersama-sama dateng ka lapangan besar.“
Beng Tong oetjapken trima kasi, kemoedian lantas balik poelang ka gedongnja, di sitoe dengen tiada memboeang tempo lagi ia sigra mengatoer itoe soerat pembrian taoe, aken mewartaken pada sekalian orang jang soeda masoekin namanja, soepaja pada tanggal Dji-gwee Tjhe-it di waktoe pagi - pagi, masing-masing orang haroes membawa marikapoenja gendewa dan anak pana, dateng ka lapangan boeat menoenggoe giliran masing-masing aken madjoe mengoedji kebisaannja. Baroe sadja ini soerat pembrian taoe dikeloearken, sesoeatoe orang jang hendak toeroet examen, rata-rata pada bikin persediaän dan menoenggoe datengnja itoe hari, boeat menjaksiken tjara begimana kapala examen melakoeken itoe pengoedjian.
Lekas djoega itoe tempo jang ditoenggoe-toenggoe soeda mendatengin, di waktoe malemnja Siauw Hoa telah membilang pada Him Hauw:
„Besok pagi djam lima, kitaorang perloe dateng ka lapangan aken menjaksiken begimana permoelaännja ini examen, serta liat djoega begimana adanja Lee Peng Po ampoenja roman dan keadaän, jang dalem oesia begitoe moeda soeda mempoenjai kepandean loear biasa.“
Itoe malem iaorang tidoer lebi siang dari biasa, sedeng besoknja waktoe hari masi fa- djar iaorang telah bangoen, tjoetji moeka salin pakean dan dahar sedikit sarapan, baroelah bersama menoenggang koedanja masing-masing dateng ka itoe lapangan. Di sitoe marika titah Lie Beng dan Teng Soan aken toenggoeïn toenggangannja, sedeng iaorang sigra dateng di deket Jan Boe Thia boeat menanti kedatengannja kapala examen.
Tiada antara lama, Siang Gie Sian dan Joe Taij Boet keliatan telah sampe lebi doeloe, begitoe djoega bebrapa banjak orang-orang dan oppas - oppas dari Peng Po beroentoen-roentoen soeda mendatengin, hingga membikin keadaän di Jan Boe Thia sekarang moelai rame, dengen Siang Gie Sian dan Joe Taij Boet berdoedoek di atasnja.
Koetika moelai terang tana, orang dapet denger tiga kali soeara bom jang menderoeh. berbareng bebrapa orang oppas keliatan telah dateng membri rapportan ka itoe roeangan Jan Boe Thia, katanja:
„Harep Dji-wie Taij Djin mendapet taoe, bahoea Lee Peng Po lagi mendatengin !“
Itoe kedoea kapala examen pembantoe apabila mendenger ini rapportan, sigra djoega marika bangoen dari tempat doedoeknja dan toeroen ka bawah Jan Boe Thia, berdiri menoenggoe di sitoe. Sesaät berselang. Lee Peng Po soeda sampe, disamboet dengen tjara sepantesnja oleh kedoea mantri terseboet, samentara Beng Tong boeroe - boeroe toeroen dari djolinja, sembari membilang dengen lakoe hormat:
„Soenggoe berat sekali boeat He Khoa moesti menerima Dji - wie Lo Sianseng ampoenja penjamboetan demikian roepa.“
„Soeda sepantesnja He Khoa berdoea moesti mengambil ini tjara, terhadep Lo Taij Djin sebagi pembesar seatasan.“
Kemoedian dengen saling merendah, ketiga orang itoe laloe bersama naek ka atas Jan Boe Thia. Lee Beng Tong berdoedoek di kiri, sedeng Siang dan Joe doea mantri ambil tempat doedoek di bagian kanan.
Apabila orang soeda disoegoeken thee, Beng Tong kedengeran berkata poela pada kedoea mantri itoe :
„Harep Dji - wie Lo Sianseng ampoenja pengoendjoekan ini pengoedjian tjara begimana hendak dimoelaiken.“
„Dalem hal melakoeken examen boeat bagian militair oemoemnja ada mendjadi kekoeasaännja Peng Po,“ berkata Siang Gie Sian, „apalagi Taij Djin telah diangkat sebagi kapala examen jang pertama, tentoe sadja sesoeatoe peratoeran boeat pengoedjian ada atas Taij Djin poenja poetoesan, He Khoa berdoea hanja wadjib toeroet menjaksiken sadja.“
„Sesoeda Dji-wie Lo Sianseng membilang begitoe, baeklah,“ berkata Beng Tong, „He Khoa kepaksa mengambil kelantjangan sendiri.“
Dalem begitoe, ia djadi berpikir dalem hatinja dan berkata saorang diri:
„Orang-orang jang hendak toeroet di pengoedjian ada begitoe banjak, tjara begimana bisa dilakoeken pengoedjian satoe-persatoe, dari itoe, tidakah lebi baek akoe keloearken sadja satoe soeal jang soelit agar soepaja jang tiada mempoenjai kemampoean merasa gentar sendiri atawa moendoerken diri?”
Setelah berpikir begitoe, Beng Tong lantas membilang pada pembesar Koen Tjin Sie katanja:
„Bahoea peprangan di moeka aer, paling dioetamaken jalah ilmoe kebisaän memana, maka ini hari terlebi doeloe aken diadaken perlombahan memana;djikaloe pana jang pertama bisa mengenaken djitoe, baroelah rang boleh teroes memana sampe tiga pana, sebaliknja bila jang pertama meleset, orang tiada diïdzinken lagi boeat memana teroes. Kapan ketiganja pana bisa kena djitoe, baroelah orang dibri idzin aken toeroet mengadoe kebisaän dari ilmoe maen sendjata, dari sitoe bila ternjata, iapoenja kebisaän beroleh pilihan, maka orang boleh toeroet dalem oedjian karang-mengarang soeal ilmoe peprangan djalan menjoerat. Tetapi, prihal perlombahan maen pana, sekarang moesti diatoer boeat satoe perwatesan dari doea-ratoes tindakan, sedeng papan boeat djoedjoehan anak- pana tiada boleh lebi lebar dari oekoeran satoe ello setenga, tenga-tenga mana diadaken satoe boenderan mera, kapan orang bisa kenaken djitoe pada itoe boenderan, baroelah diïdzinken boenjiken tamboer, sebaliknja kaloe tiada kena djitoe pada boenderan mera, maski soeda mengenaken papannja, itoe belon teritoeng djitoe dan tiada boleh diboenjiken tamboer.”
Koen Tjin Sie trima itoe titah dengen membawa bebrapa orang, laloe moelai atoer itoe semoea sebegimana perbilangannja Beng Tong. Koetika ini perkerdjaän rampoeng, hari poen soeda terang betoel.
„Hian Te,” tiba tiba kedengeran Him Hauw berkata pada Siauw Hoa dengen berbisik, „kaoepoenja roman maskipoen betoel ada tjakep, tapi ternjata tiada bisa tandingin Lee Taij Djin, jang keliatan mempoenjai koelit badan begitoe poeti mirip saldjoe, matanja jang tjeli ampir seperti ombak moesim Tjhioe.”
„Ja,” djawab Siauw Hoa, „dalem oesia toedjoeblas taon, dia berbareng bisa mereboet gelaran Sam Goan, sedeng dalem tempo begitoe pendek bisa menandjak sampe mendjadi minister, itoelah memang belon perna terdapet orang seperti dia, jang bisa dibilang ada satoe naga di antara manoesia, begimanalah Siauw Te brani berbandingan dengen dia?”
Selagi iaorang beromong-omong, keliatanlah Koen Tjin Sie telah mengatoer beres itoe wates-wates berikoet segala persediaän boeat perlombahan maen pana. Soeda itoe Koen Tjin Sie laloe oetjapken dengen soeara njaring di hadepan orang banjak tentang poetoesannja kapala examen satoe-persatoe.
Itoe orang-orang jang hendak toeroet examen, koetika meliat perwatesan boeat lepasan pana ada begitoe djaoe, sedeng gendewa pana jang tersedia keliatannja ada berat kira-kira doearatoes kati, sebagian besar djadi merasa tiada mampoe aken bisa memana sampe begitoe djaoe, boeat djangan harep bisa toedjoe betoel ka itoe boenderan mera, demikianlah soeda kedjadian boekan sedikit orang jang kepaksa tinggalken itoe lapangan dengen oeroengken maksoednja toeroet examen.
Samentara itoe, Koen Tjin Sie telah menoeroet atoeran seoemoemnja bagi examen militair, begitoelah pertama-tama dimoelai dari candidaat-candidaat bagian kota radja dan daerahnja boeat madjoe lebi doeloe ka itoe perlombahan. Dan orang lakoeken ini sampe lohor, baroelah Beng Tong dengen kedoea mantri itoe balik poelang ka gedongnja masing-masing.
Besoknja, orang kombali meneroesken itoe perlombahan pana boeat candidaat bagian kota radja berikoet seloeroe provincie Tit-Lee. Bagian mana, di itoe hari djoega soeda rampoeng semoea dan di antara sebegitoe banjak orang jang telah toeroet examen, melaenken ada tiga orang sadja jang baroe bisa memana djitoe satoe pana.
„Sesoenggoenja,” berkata Beng Tong pada kedoea mantri itoe dengen tarikan napas, „boeat dapetken kepandean jang aseli ada teramat soeker!”
„Ja, itoelah bener sekali,” saoet kedoea mantri terseboet dengen berbareng.
Kemoedian orang lantas pada bangoen berdiri dan dengen tiga kali soeara bom, semoea orang jang berkoempoel di lapangan pada boebaran. Sedeng koetika soeda berada di tempat menginepnja, Him Hauw berkata pada Siauw Hoa:
„Itoe Lee Peng Po boekan sadja ada saorang jang beroman tjakep, tapi djoega amat tjerdik serta bisa mengatoer perkerdjaän tjepet dan ringkes. Dia mengadaken atoeran sedemikian, jalah soepaja orang jang tiada mempoenjai kebisaän dengen kemaoean sendiri oendoerken dirinja.”
„Dengen menetepken ini atoeran, itoepoen ada boeat ringkesken tempo.” djawab Siauw Hoa, „memanglah dengen begitoe ada mengoendjoek ketjerdikannja.”
Hari katiganja, di waktoe pagi-pagi sekali, orang banjak soeda berkoempoel poela di itoe lapangan. Adapoen kerna letaknja tempat ada djaoe, maka djoega orang-orang jang masoek soldadoe dari laen-laen provincie ada terlebi sedikit poela, hingga perlombahan jang dilakoeken bisa berdjalan lebi tjepet, atawa dalem satoe hari bisa dipreksa rampoeng satoe provincie lebi.
Sampe pada tanggal Dji-gwee Tjhe-sie, orang bakal sampe pada bagian bilangan Ouw Kong. Him Hauw dan Siauw Hoa jang setiap hari dateng di lapangan boeat meliat orang mengadoe pana, maka itoe sore setelah mengetahoei bakal sampe pada gilirannja, marika memesen pada Lie Beng dan Teng Soan soepaja bersedia aken besok pagi dateng di lapangan dengen kelengkepan.
Samentara itoe, Beng Tong itoe sore setelah balik poelang ka gedongnja, diam-diam ia bisikin pada So Hoa katanja:
„Besok pemereksaän examen bakal sampe pada gilirannja Gak Tjioe Hoe, tapi belon taoe begimana ada romannja Hong Hoe Long?”
„Hong Hoe Long berbadan tinggi delapan ello lebi,” djawab So Hoa, „moekanja djiroes, alisnja seperti naga dan matanja tjeli; pendek, dia itoe gampang sekali boeat dikenalin.”
Beng Tong tjatet betoel dalem hatinja.
Begitoelah pada besok paginja, kombali Beng Tong bersama kedoea mantri Siang Gie Sian dan Joe Taij Boet, soeda berada di Jan Boe Thia. Di mana boeat bermoela perlombahan pana dilakoeken oleh orang-orang dari laen-laen residentie dalem bilangan Ouw Kong, sedeng di waktoe sesoedanja dahar pagi, baroelah dateng gilirannja boeat candidaat-candidaat dari residentie Gak Tjioe Hoe dan afdeeling Peng Kang Koan.
Him Hauw bersama Ong Siauw Hoe itoe tempo soeda berdiri menoenggoe di satoe samping, dengen membekel lengkep anak pana berikoet boesoernja.
Sebentar lagi, kedengeran orang soeda kaokin namanja Boe Kie Djin, Him Hauw alias Joe Hok. Maka Him Hauw poen sigra madjoe ka depan, berloetoet di hadepan sang kapala examen, samentara Lee Beng Tong apabila soeda memandeng orang poenja roman jang keliatannja ada begitoe gaga dan angker, djadi memoedji katanja:
„Kaoe ini ada satoe Boe Kie Djin, serta sekarang telah dateng masoek soldadoe tentoenja ada teritoeng satoe orang gaga boekan sembarangan, maka itoe biarlah kaoe berjakin soenggoe-soengggoe boeat memana.”
Him Hauw hatoerken trima kasi, seraja berlaloe dari itoe roeangan dateng ka garisan perwatesan; satoe tangan memegang gendewa Biauw Kim Kiong, dengen tangan laennja memasang betoel anak pana, kemoedian laloe melepasken dengen dibarengin satoe soeara seroean katanja: „Kena!”
Sang anak pana melajang dan menantjep betoel pada itoe boenderan mera, soeara tamboer poen sigra kedengeran gemoeroeh sekali. Dan Him Hauw dengen merasa amat girang serta goembira, pasang poela anak pana jang kadoea, begitoe dilepas itoe anak pana kombali kena djitoe pada boenderan mera. Demikian poen bagi anak pana jang katiga sama sekali tiada meleset barang sedikit, hingga membikin orang-orang jang meliat rata-rata pada mendengerken soeara sorakan berikoet tepokan tangan jang rioeh sekali, antara mana ada djoega jang membilang:
„Sedari dilakoeken perlombahan sampe sekarang, tjoema terdapet ini satoe orangjang bisa mengenaken djitoe ketiga pananja; sesoenggoenja dia itoe bisa dibilang ada satoe Eng Hiong jang sedjati!”
Sesoeda itoe, dengen kegoembirahan penoe dan aermoeka bersri-sri, Him Hauw dateng poela ka Jan Boe Thia dan berloetoet di sitoe sembari katanja:
„Dengen mengandel atas Taij Djin ampoenja pendongahan, Boe Kie beroentoeng bisa mengenaken djitoe ketiga pana!”
Beng Tong poen toeroet merasa girang, bangoen berdiri dari tempat doedoeknja membales dengen separo hormat:
„Him Kie Djin mempoenjai kebisaän demikian tinggi, hari blakang poen bakal mendjadi mantri sekeradjaän, perloe apa moesti mendjalanken kehormatan begitoe roepa, apalagi He Khoa toch beroesia masi moeda. Bangoenlah, dan selandjoetnja biarlah djalanken sadja kehormatan setjara terhadep pada orang sepantaran sadja.”
Him Hauw kombali manggoetin kapalanja seraja berkata:
„Biarpoen Taij Djin memesen begitoe, tapi masakah Boe Kie brani ambil kelantjangan begitoe boeat semata-mata tiada hargaken pembesar tinggi.”
Sehabisnja oetjapken ini perkataän, Him Hauw laloe moendoer dari sitoe, sedeng Koen Tjin Sie kedengeran telah kaokin lagi nama Ong Siauw Hoe.
Apabila Siauw Hoa mendenger nama itoe dipanggil, dengen tiada berajal ia poen lantas madjoe ka depan, samentara Beng Tong dari djaoe-djaoe soeda memperhatiken orang poenja roman, jang bener sekali ternjata anak moeda itoe ada mempoenjai alis seperti naga dan bermata amat tjeli, dalem hatinja diam-diam djadi berpikir dengen terharoe katanja:
„Och. apakah kaoe bisa mengetahoei, bahoea boeat goena kaoe, istrimoe soeda berkerdja dengen segala ichtiar dan segala ketjapean hati, maka sampe ini hari baroelah satoe sama laen bisa saling bertemoe moeka. Aken tetapi, apakah pantes akoe moesti soeroe dia berloetoet di hadepankoe?”
Demikianlah koetika menampak Siauw Hoa soeda dateng deket, boeroe-boeroe ia lantas bangoen dari kedoedoekannja dan membilang katanja:
„Ong Siauw Hoe! Hanja boleh lantas pergi memana dan traoesa dateng berdjoempa!”
Tapi Ong Siauw Hoe madjoe djoega berloetoet di sitoe seraja berkata:
„Itoelah koerang adil, Siauw Djin masakah brani berlakoe sembarangan boeat permaenken adat-istiadat seoemoemnja.”
Kendati Beng Tong merasa tiada tega aken soeroe itoe bakal soeami berloetoet di hadepannja atawa berniat ia hendak angkat bangoenin sendiri, toch semoea tiada bisa kerna dengen berlakoe begitoe, berarti melanggar peradatan semoestinja. Ia tjoema bisa angkat tangan jang agaknja seperti orang menjega dan berkata:
„Harep Ho Han boleh lantas bangoen! Memandeng aken kaoepoenja roman, tentoenja ada mempoenjain kemampoean tjoekoep sebagi tiangnja negri. He Khoa meloeloe berkerdja goena negri boeat perolehken orang-orang gaga, dari itoe tiada perloe moesti berkoekoeh dengen itoe segala peradatan. Laen kali kapan berdjoempa, hareplah tiada dipake lagi itoe kehormatan berloetoet di hadepankoe.”
Ong Siauw Hoe merasa sanget bertrima kasi di dalem hatinja, sedeng Beng Tong kedengeran membilang lagi:
„Soeda, pergilah sekarang aken dengen bersoenggoe-soenggoe hati melepasken pana, soepaja pengharepan tiada djadi ketjiwa.”
Ong Siauw Hoe oetjapken trima kasi, langsoeng toeroen ka bawah.
Sesoeda Ong Siauw Hoe berlaloe, Beng Tong baroe balik doedoek di tempatnja. Siang Gie Sian dan Joe Taij Boet berbareng telah mengalem katanja:
„Sesoenggoenja Taij Djin ada satoe mantri bidjaksana jang bisa berlakoe manis dan merendah pada sesoeatoe orang pande, maskipoen dia itoe ada deradjat rendah.”
„Itoelah memang ada satoe keharoesan bagi kita,” djawab Beng Tong, „kaloe ternjata itoe orang memang ada poenja kebisaän, siapa djoega, tiada perdoeli berada di golongan civiel maoepoen sebaliknja di golongan militair, toch semoea bakal teritoeng sebagi kitapoenja kawanan sedjabat, boekankah ketjiwa bila terhadep marika tiada bisa perlakoeken itoe tjara hormat sebagi tetamoe?”
Orang-orang di kedoea samping jang lagi toeroet menjaksiken itoe pengoedjian, tatkala meliat ini keadaän rata-rata pada memoedji katanja:
„Satoe kemoedjoeran bagi seantero rajat, maka bisa moentjoel ini satoe pembesar jang berboedi, pemoerah dan bisa menghormat!”
Begitoe djoega Ong Siauw Hoe koetika meliat itoe kapala examen ada berlakoe begitoe roepa padanja, dalem hati djadi merasa amat bersoekoer dan menamba boekan sedikit bagi itoe kenapsoean hendak perolehken nama kebesaran. Begitoelah ia lantas mengambil gendewa dan dengen ati-ati melepasken anak pananja menoedjoe pada itoe boenderan mera.
Iapoenja ketiga anak pana beroentoen-roentoen telah menantjep djitoe pada itoe boenderan, sedeng kemoedian dengen membalikin badan ia lepasken lagi tiga pana, jang djoega semoea mengenaken djitoe pada tempat jang ditoedjoe, hingga inilah membikin antero orang jang berada di itoe lapangan, sampe jang berdiri dan menjaksiken dari roeangan Jan Boe Thia pada dengerken soeara sorakan jang boekan maen gemoeroehnja. Tepokan tangan dari sana-sini kedengeran seperti mertjon rentetan jang sampe lama djoega baroe sirep.
„Ilmoe memana begini roepa,” berseroe orang banjak dengen soeara berbareng, „soenggoe djarang bisa diketemoeken!”
Siang dan Joe doea mantri djoega dengen sorot moeka bersri-sri telah berkata:
„Ada mempoenjai kebisaän begini roepa, soeda pasti bakal bisa mereboet itoe gelaran jang termoelia!”
Tiada bisa disangkal lagi Beng Tong ampoenja kegirangan dan bersoekoer melebiken lipet-ganda dari laen-laen orang. Ia maoe pertjaja itoe bakal soeami tentoe aken terloeloes dalem oedjian paling tinggi.
Sesoedanja iapoenja anem anak pana anteronja mengenaken djitoe, Ong Siauw Hoe laloe dateng poela ka Jan Boe Thia aken djoempaken kapala examen. Di mana Lee Beng Tong telah membilang katanja:
„Ong Siauw Hoe, biarlah seteroesnja kaoe maoe berjakin boeat mereboet gelaran Tjiong Goan!”
Siauw Hoe poen sigra djatoken dirinja berloetoet di sitoe sembari berkata:
„Itoepoen melaenken mengharep Taij Djin ampoenja kemoerahan dan toendjangan,”
Lee Beng Tong tjepet bangoen berdiri, berbareng telah membilang katanja:
„Tadi djoega soeda dipesen aken djangan djalanken poela kehormatan begitoe roepa terhadep He Khoa.”
Ong Siauw Hoe mengatoerken maäf beroelang-oelang, berikoet djoega oetjapan banjak trima kasi, laloe kemoedian moendoer dari sitoe dan membilang pada Him Hauw dengen soeara bisikan:
„Lee Taij Djin soenggoe bisa berlakoe hormat dan merendah pada orang sebawahan. tapi itoe sebaliknja membikin hatikoe merasa koerang seneng.”
„Ja, Lee Taij Djin memang keliatan ada orang jang tiada bertabeat angkoe," saoetnja Him Hauw, „tetapi diapoenja perlakoean terhadep Hian Te, ternjata ada lebi loear biasa. Ditilik dari sini, orang bisa ambil kepastian bahoea kaoe tentoe bakal terloeloes dalem oedjian jang paling tinggi.”
XXXVIII.
Istri jang bidjaksana meloeloesken soeami
dalem oedjian tinggi. Boe Tjiong
Goan mendjadi Goan Swee me-
moekoel Tiauw Sian.
Itoe sore, Beng Tong setelah balik poelang ka gedongnja atawa sesoedanja doedoek dahar malem, bersama So Hoa iaorang masoek dalem kamarnja. Dan koetika tiada ada laen orang poela di itoe kamar, Beng Tong membilang pada So Hoa:
„Amat bisa djadi Ong Siauw Hoe itoe ada nama samaran dari Hong Hoe Long, sebab iapoenja roman ada mirip sebegimana Tji-tji seboet kemaren.”
Lebi djaoe, Beng Tong poen menoetoerken apa jang telah kedjadian di lapangan pertandingan baroesan, djoega prihal ia merasa berat moesti trima hormatnja itoe toenangan, achirnja Beng Tong tiada loepa bitjaraken prihal Him Hauw jang djoega mempoenjai kebisaän loear biasa, serta tiada sala tentoe ada sala satoe sobat baek dari bakal soeaminja.
„Ja, akoe nanti ichtiar sebrapa bisa,” achirnja Beng Tong berkata sebagi penoetoep tjeritanja, agar soepaja kedoea orang itoe bisa loeloes dalem oedjian paling tinggi, asal sadja tiada sampe melanggar keadilan.”
„Siotjia mempoenjai batin begitoe soetji dan boedi pekerti jang amat djoedjoer,” berkata So Hoa, „bisa diharep Hong Hoe Long tentoe beroleh segala kemenangan dan kemoedian bisa dilangsoengken ini perdjodoan dengen sampoerna.”
„Tetapi, Allah poenja takdir begimana, itoelah kita masi belon bisa mendoega-doega dengen pasti,” berkata Beng Tong.
Begitoelah seteroesnja setiap hari Beng Tong dateng ka itoe lapangan boeat lakoeken kewadjibannja, pagi pergi dan sore poelang. Sampe pada tanggal Tjhe-pek, adoean pana dari tigablas provincie antero soeda berdjalan beres. Dari mana terdapetlah satoe djoemblah atas 378 orang jang bisa memana djitoe satoe atawa doea pana, ketjoeali ada ampat orang jang bisa terloeloes betoel-betoel jaitoe Ong Siauw Hoe dari bilangan Ouw Kong residentie Gak Tjioe Hoe, jang soeda kenaken djitoe anem pana: Boe Kie Djin Him Hauw mengenaken djitoe tiga pana; masi ada lagi orang bernama Ong Hauw, berasal dari provincie Kong Tong, residentie Kong Tjioe Hoe, beroemoer doeapoeloeampat taon, telah mengenaken djitoe tiga pana; lagipoen ada saorang soldadoe dari barisan tentara berkoeda di bilangan Bong Ko, bernama Hek Eng Lam, beroesia doeapoeloe-tiga taon, djoega soeda bisa memana djitoe ketiga pananja pada itoe boenderan mera.
Paginja dari tanggal Tjhe-kauw, setelah itoe ketiga kapala examen berkoempoel di lapangan pertandingan, sigra djoega mengeloearken prenta soepaja itoe ampat orang jang terloeloes, aken lebi doeloe mengoedji dalem hal kebisaän tenaga, blakangan baroe mengoendjoekin marikapoenja kepandean maen sendjata.
Berbareng dengen dikeloearken ini pembrian taoe, Beng Tong lantas prenta bebrapa orang soldadoe aken pindaken itoe gelangan batoe peranti tantjepan kebesaran Goan Swee, taro di depan Jan Boe Thia. Ini gelangan batoe jang besar, beratnja kira-kira anemratoes kati. Dao Koen Tjin Sie dengen soeara njaring telah berseroe di hadepan orang banjak, katanja:
„Siapa di antara orang-orang jang loeloes dalem oedjian maen pana, bisa mengangkat ini gelangan batoe terpisa dari tana sedikitnja tiga ello, serta berdjalan dengen tjepet tiga tindakan, baroelah dia itoe bisa teritoeng loeloes djoega dalem oedjian kebisaän tentang kekoeatan!”
Pertama-tama adalah gilirannja Ong Siauw Hoe jang haroes lakoeken itoe pengoedjian lebi doeloe, begitoelah orang liat anak moeda kita soeda madjoe ka depan, menggoeloeng tangan badjoenja, laloe masoekin kedoea tangannja dalem gelangan itoe serta angkat naek ka atas dengen dibarengin satoe soeara „naek !”. Itoe gelangan batoe keliatan djadi terangkat tinggi kira-kira tiga ello lebi, dengen tjara begitoe Siauw Hoe bertindak sampe ada anem-toedjoe tindakan, baroelah ia taro kombali gelangan terseboet di atas tana, serta dateng poela di Jan Boe Thia boeat membri hormat pada kapala examen. Iapoenja moeka tiada keliatan ada beroba mera, napasnja djoega tetep seperti biasa dan kemoedian bangoen berdiri di satoe samping.
Orang kadoea adalah Him Hauw, jang sekarang keliatan soeda madjoe ka depan, mengangkat itoe gelangan batoe sebegimana tjaranja Ong Siauw Hoe baroesan. Itoe djoega bisa terangkat naek sampe ada tiga ello lebi, serta berdjalan boeat anem-toedjoe tindakan, baroe ja letakin lagi di atas tana. Sama seperti Siauw Hoe, Him Hauw djoega sama sekali tiada mengoendjoek perobahan sebegimana adanja orang jang berkerdja dengen tenaga paksaän.
Sesoeda ini, baroelah madjoe orang katiga jaitoe Hek Eng Lam. Ia ini ada berbadan koeroes serta tiada bertenaga terlaloe besar, maka ia tjoema bisa mengangkat itoe gelangan tiba tjoekoep tiga ello, serta menindak hanja tiga tindakan, tenaganja djadi keliatan habis dan terpaksa taro kombali itoe gelangan di atas tana. Dengen moeka beroba mera selebarnja dan napas tersengal-sengal, lebi doeloe ia dateng membri hormat di hadepan kapala examen, kemoedian lantas moendoer berdiri di tempatnja.
Sekarang dateng gilirannja Ong Hauw! Liat, dengen satoe tangannja ia naekin sedikit itoe gelangan batoe, baroe dengen ke doea tangannja ia masoekin pada moeloetnja gelang, dengen begitoe ia lantas angkat naek sembari berseroe satoe kali „naek!”. Itoe batoe jang berat ternjata soeda terpisa dari tana kira-kira ampat ello, di hadepan Jan Boe Thia, ia berdjalan boelak - balik sampe kira-kira doeapoeloe tindakan, baroelah ia poenja tenaga moelai keliatan habis. Tapi ia masi bisa lempar itoe batoe sedikit tinggi meliwatin kapalanja, berbareng dengen tjepet ia hindarken dirinja boeat tiada ketimpa.
Itoe gelangan keliatan naek tinggi kira-kira doeapoeloe ello, djatonja ka bawah ada mendengerken soeara gemoeroeh, hingga lapangan itoe djadi serasa tergeter, menoblos masoek ka tana sampe ada setenga ello lebi.
Orang - orang jang menjaksiken begitoe, rata-rata pada bersorak dengen soeara rioeh sekali kedengerannja, serta membri poedjian atas tenaga begitoe besar dan loear biasa: Samentara Ong Hauw dengen roepa bangga dan bersri-sri, sedeng aermoeka poen tiada oendjoek sorot mera, napas djoega tiada bersengal - sengal, dateng mengadep ka hadepan kapala examen dengen berloetoet.
Meliat ini keadaan, Lee Beng Tong djadi merasa terprandjat diam-diam dalem hatinja djadi berkoeatir, bahoea ini orang jang mempoenjai tenaga begitoe besar, bisa djadi nanti menangin Ong Siauw Hoe dan mereboet itoe gelaran jang pertama. Kemoedian ia lantas prenta Ong Hauw bangoen berdiri dan lebi djaooe ia membri titah pada keampat candidat itoe katanja:
„Sekarang kaoeorang berampat boleh tjoba oendjoekin masing-masing poenja kepandean maen sendjata, sedeng siapa jang tiada membawa koeda diidzinken boleh pindjem pake toenggangankoe.”
Koetika soeda mendenger ini prenta, Ong Siauw Hoe laloe mengambil satoe sendjata Hong Thian Kek dari rorak tempat sendjata dan toeroen dari Jan Boe Thia, sedeng Lie Beng soeda bawa dateng iapoenja koeda. Begitoelah dengen satoe kali lompat, Ong Siauw Hoe poen soeda berada di poendak koedanja, serta dengen tjepet lantas maenken itoe Hong Thian Kek, jang keliatan mirip naga perak moentjoel dari laoetan, begitoe gapa dan gesit sekali, meliatken satoe pemandengan jang indah. Sesoeda maenken sendjatanja sekoetika lama, Siauw Hoa laloe lompat toeroen lagi dari koedanja dan dateng mengadep pada kapale examen.
Him Hauw mengambil doea boeah toembak pendek, melompat ka blakang koeda jang dibawa oleh Teng Soan; lariken koedanja ka tenga lapangan, serta moelai maenken itoe sepasang toembak jang keliatan mirip sebagi doea ekor naga sedeng bermaen di moeka aer, atawa sepasang boeroeng Hong sedeng melaloeï koempoelan kembang-kembang. Sesoeda maenken habis satoe djalan, Him Hauw laloe lompat toeroen dari toenggangannja dan mengadep ka hadepan Lee Peng Po serta Siang dan Joe kedoea mantri.
Samentara Hek Eng Lam jang tiada membawa pengikoet telah toentoen sendiri koedanja dateng di deket Jan Boe Thia, mengambil satoe toembak pandjang sembari lompat ka atas koedanja, ia poen mengoendjoekin permaenan toembaknja, jang ternjata maski iapoenja kebisaan prihal itoe tjoekoep mateng, tapi sajang iapoenja tenaga sedikit koerangan, hingga tiada bisa sebanding dengan Ong Siauw Hoe dan Him Hauw ampoenja kegagahan dan kekosenan.
Apabila dateng gilirannja Ong Hauw, kerna ia ini tiada membawa toenggangan, maka satoe soldadoe telah bawaken boeat ia, itoe koeda Tjeng Tjong Ma kepoenjaan Lee Peng Po boeat dipindjem pake. Ong Hauw mengambil satoe golok besar Kioe Nie Pat Khwan Taij Kham To, jang beratnja ada delapanpoeloe kati, menoenggang itoe koeda serta dengen tiada berajal sigra maenken itoe golok, jang kedengeran bersoeara sebagi tioepannja angin dan terpoeter - poeter mirip rodanja kreta. Setelah ia maenken habis sang golok dalem anempoeloeampat djalan; baroelah ia balik kombali ka Jan Boe Thia, toeroen dari toenggangannja, letakin poela itoe golok di tempatnja, kemoedian dateng mengadep dengen berloetoet di hadepannja itoe ketiga kapala examen, dengen Beng Tong masi sadja berslempang Ong Hauw nanti bisa kalaken toenangannja dan mereboet itoe gelaran Boe Tjiong Goan.
Sesoedanja Ong Hauw moendoer poela ka tempatnja, maka dimoelaiken lagi pemereksaan tentang kebisaan dan kepandean maen sendjata dari laen-laennja orang jang djoega soeda memana djitoe satoe of doea pana. Tapi boeat ini soepaja tiada makan tempo banjak, biarlah kita traoesa seboetken satoe persatoe, kerna poen tiada ada kedjadian apa-apa jang loear biasa.
Segala pendapetan dan kesoedahan dari itoe pengoedjian, Beng Fong menjatet satoe- persatoe dalem boekoe dengen terang dan djoedjoer zonder berat sebela:
Itoe hari djoega, examen bagian militair soeda selese dan Lee Peng Po lantas keloearken pembrian taoe, bahoea siapa-siapa jang tela loeloes dalem oedjiannja, besok pagi masing-masing moesti membawa sendiri perabot toelis selengkepnja, dateng berkoempoel dalem kantoran Peng Po aken dibikin pengoedjian dalem hal kepandean karang-mengarang.
Demikianlah itoe sore, semoea orang pada boebaran dan balik poelang ka tempatnja masing-masing.
Satoe malem soeda liwat dengen tiada kedjadian apa-apa jang penting. Besoknja, di waktoe masi amat pagi, Siang Gie Sian dan Joe Taij Boet berbareng telah dateng ka kantoran Peng Po, jang disamboet dengen sepantesnja oleh Beng Tong. Kemoedian dengen diboenjiken bom, ketiga kapala examen itoe keliatan soeda berdoedoek di roeangan kantoor besar, serta moelai menjotjokin satoe - persatoe dari nama-namanja candidaat examen dengen orangaja, baroe dibagi-bagiken pada masing-masing dari adanja kalimat karangan jang haroes dikerdjaken.
Pintoe lantas ditoetoep baek, sedeng itoe ketiga orang besar berdoedoek di bagian atasan dari kantoor terseboet, mengawas dengen teliti aken menilik djangan sampe ada jang bisa lakoeken ketjoerangan atawa penipoean, baek dengen djalan tiroean maoepoen dengen djalan pindjem tangan orang laen bagi toelisannja.
Pertama sekali adalah Ong Siauw Hoe jang telah bisa dateng antarken iapoenja karangan ka hadepan kapala examen. Beng Tong memereksa serta membatja itoe karangan dengen teliti, maka ia dapetken boekan sadja Siauw Hoe poenja boeah kalam tjoekoep bagoes, tapi djoega iapoenja toelisan ada amat sampoerna dan teges. Dalem hatinja merasa boekan maen poenja girang, sebab kenjataän betoel itoe bakal soeami bisa dibilang saorang Boen Boe Tjoan Tjaij.
Samentara itoe, sesoeda ampir semoea orang mengantarken karangannja, Ong Hauw djoega telah kasi kombali itoe goeloengan kertas, kiranja dia ini sama sekali tiada mengarti mata soerat, kerna itoe kertas jang diantarken olehnja kosong belaka. Meliat begini, Siang Gie Sian dan Joe Taij Boet lantas membilang pada Beng Tong:
„Ong Hauw poenja ilmoe pana tjoekoep bagoes, sedeng iapoenja kebisaän Boe- ge ternjata ada amat loear biasa, sajang sekali dia tiada mengenal soerat.“
Beng Tong diam-diam merasa amat bersoekoer dalem hati, kerna gelaran Tjiong Goan sekarang ternjata ampir tiada bisa lari dari Ong Siauw Hoe.
Itoe hari djoega, pemereksaän examen atas ilmoe soerat djadi selese dan inipoen berarti seantero examen soeda berdjalan beres. Kemoedian ketiga kapala examen sama moendoer masoek dalem kantoran bagian blakang boeat mempertimbangken dan bermoefakatan aken menetepken orang-orang jang terloeloes, sedeng satoe djoeroetoelis, telah bersedia aken sigra menoelis nama-nama itoe di atas satoe papan plekat.
Poetoesannja, adalah: Ong Siauw Hoe beroleh gelaran Boe Hwee Goan, Him Hauw djato pada nama kadoea, Hek Eng Lam katiga dan Ong Hauw mendapet nama kaämpat sedeng selebinja adalah terpili boeat gelaran Boe Tjin Soe, jang sama sekali djadi berdjoemblah sembilanpoeloeanem nama.
Besok paginja, itoe papan plekat sigra dioemoemken di depan kantoor Peng Po, samentara ketiga kapala examen terseboet laloe bersama-sama dateng di kraton Kim Loan Tian mengadep sci-baginda, sembari merapport katanja:
„Sin sekalian menerima titah boeat memili dan menjaboet sembilanpoeloeanem nama Boe Tjin Soe di antara sekalian orang jang dateng masoek soldadoe, sekarang soeda melakoeken beres itoe perkerdjaän dan dengen ini mempersembahken boekoe tjatetan dari adanja nama-nama candidaat jang terloeloes, moehoen Pihe soeka. Lebi djaoe Sin sekalian mengharep Pihe soeka lantas menetepken harinja boeat toeroen sendiri ka lapangan aken lakoeken pengoelangan examen, soepaja dari sitoe bisa dipili dan menetepken siapa jang wadjib dianoegrahken gelaran Boe Tjiong Goan.”
Baginda titah saorang Thaij Kam aken trima itoe boekoe serta simpen doeloe, kemoedian baginda wadjibken Peng Po aken keloearken soerat pembrian taoe, bahoea ditetepken tanggal Dji- gwee Tjap-go pagi-pagi, baginda bakal toeroen sendiri di lapangan boeat memili Boe Tjiong Goan.
Setelah menerima itoe titah, Lee Beng Tong lantas moendoer dan berlaloe dari Kim Loan Tian, serta kemoedian mengeloearken itoe soerat pembrian taoe.
Itoe koetika, semoea Boe Tjin Soe jang baroe terloeloes, bersama-sama telah dateng boeat djoempaken marikapoenja kapala examen. Sedeng Beng Tong diam-diam soeda memesen pada So Hoa, katanja:
„Baeklah sebentar lagi Tji - tji pergi semboeni di blakang Pian boeat mengintip apakah betoel dia itoe ada Hong Hoe Long ?”
Sehabisnja membilang begitoe, Beng Tong lantas berdjalan keloear seraja memerenta pada orangnja soepaja silahken sadja Ong Hwee Goan sendiri masoek bertemoe sedeng jang selebinja boleh disoeroe poelang dengen dihatoerken trima kasi.
Orang jang diprenta poen sigra berdjalan keloear boeat menjampeken perbilangannja sang madjikan, begitoelah tiada lama kemoedian itoe sekalian orang-orang gaga pada berlaloe dari sitoe, ketjoeali Ong Siauw Hoe sendiri jang telah berdjalan masoek ka dalem dengen mengambil djalan dari pintoe samping.
Koetika mana, Beng Tong soeda bangoen berdiri dari tempat doedoeknja boeat menjamboet, tapi Siauw Hoe boeroe - boeroe djatoken dirinja boeat berloetoet sembari mengoetjap:
„Begimana Boen He brani tjapeken Lo Taij Djin boeat menjamboet!”
„Beng Tong tjepet madjoe ka depan, angkat bangoenin pada Siauw Hoa seraja berkata :
„He Khoa masi beroesia terlaloe moeda, biarlah digoenaken sadja itoe kehormatan setjara biasa kaloe berdjoempa. Laen kali, harep tiada pake lagi kehormatan begitoe roepa, jang bisa bikin He Khoa tiada berseneng hati.”
„Tetapi Boen He mana brani berlakoe lantjang boeat memperkosa peradatan oemoem,” berkata Ong Siauw Hoe seraja bongkokin badannja.
Lee Beng Tong hendak silahken itoe anak moeda berdoedoek setjara antara tetamoe dengen toean roema, tapi Siauw Hoe keras menolak serta kemoedian ambil tempat doedoek di samping. Sedeng apabila sesoedanja minoem setjangkir aer thee jang disoegoeken, Beng Tong berkata:
„Ja, Lian Heng nanti di tanggal Dji-gwee Tjap-go, sri-baginda aken toeroen di lapangan boeat lakoeken penilikan sendiri, maka biarlah Lian Heng soeka berlakoe ati-ati dengen kegiatan penoe, sedeng He Khoa aken sebrapa bisa berichtiar soepaja Lian Heng bisa perolehken itoe gelaran Tjiong Goan.”
Siauw Hoe tjepet bangoen dari doedoeknja, membri hormat dengen angkat kedoea tangannja, sembari hatoerken trima kasi, katanja:
„Menerima In Soe ampoenja pertoendjangan demikian besar, Boen He tiada taoe djalan begimana boeat membales.”
„Soeda njata Lian Heng memang mempoenjai kepandean dan kebisaan jang haroes dihargaken,” djawab Beng Tong, „maka ada mendjadi kewadjibankoe aken seboleh-bolehnja berdaja agar itoe segala kebisaan tiada djadi ketjiwa. Dari itoe, boekan pantes bagi Lian Heng moesti oetjapken trima kasi begitoe roepa.”
Sampe di sini, boeat tiada mengganggoe orang poenja tempo lebi lama, Siauw Hoe lantas berpamitan, samentara Beng Tong soeda membilang poela:
„Sedianja He Khoa hendak menahan Lian Heng doedoek makan- minoem, tapi kerna berkoeatir dengen ini tjara nanti menerbitken orang poenja sangkahan djelek, baeklah ini niatan ditoenda sadja sampe di laen hari begitoe Lian Heng soeda dapet reboet itoe gelaran Tjiong Goan, sekalian boeat menghatoerken slamet.”
„Beroelang-oelang telah trima In Soe ampoenja sokongan, membikin Boen He mengoetang boedi boekan ketjil,” berkata Siauw Hoe sembari hatoerken trima kasi, „soeda begitoe, masi sadja hendak disoegoeken perdjamoean, soenggoe Boen He rasanja tiada koeat boeat menerima.”
Beng Tong lantas menitah orangnja aken sigra bawa dateng Ong Loja ampoenja koeda toenggangan. Dan sebentar lagi, itoe orang jang diprenta keliatan soeda balik kombali bersama -sama Siauw Hoe poenja koeda, serta menoenggoe di bawah oendakan dari roeangan terseboet, Samentara Beng Tong telah mengangkat tangan membri hormat, seraja berkata pada Siauw Hoe:
„Harep Liam Heng boleh menoenggang koeda dari sini boeat poelang.”
„Oh,” berkata Siauw Hoe dengen terprandjat, „tjara begimana Boen He brani berlakoe begitoe tiada taoe adat!”
„Kaoe dan akoe ampir bersamaän oemoer, maka boleh persetan pada itoe segala peradatan jang terlaloe banjak tjingtjong,” berkata Beng Tong sambil toentoen Siauw Hoe toeroen ka bawah oendakan dan paksa ia itoe sigra menoenggang koedanja. Lagi sakali anak moeda kita tjoba menampik, tapi Lee Peng Po tiada tinggal diam, malah roepanja keliatan seperti hendak angkat Siauw Hoe naek ka poendaknja koeda.
Achirnja, kerna slempang bisa menerbitken orang poenja rasa koerang seneng hati, Siauw Hce tiada brani berkeras lebi djaoe, hanja dengen apabolehboeat ia mengatoerken maaf katanja:
„Sesoedanja In Soe berkeras djoega dengen itoe kemaoean. Boen He kepaksa berlakoe koerang adat.”
Berbareng dengen ini oetjapan. Ong Siauw Hoe kombali membr hormat dengen membongkokin badannja. langsoeng lompat naek ka blakangnja sang toenggangan. Dalem begitoe, Beng Tong kedengeran soeda membri prenta pada orangnja aken silahken Ong Loja berdjalan keloear dari pintoe besar. Sebaliknja Siauw Hoe dengen lekas telah kasi sebetan pada koedanja dengen itoe tjamboek di tangan, teroes dari pintoe iringan dan poelang ka tempat menginepnja.
Samentara itoe, Beng Tong telah moendoer masoek ka dalem, dari sana bersama-sama So Hoa, ini kedoea soeami-istri balik poelang ka kamarnja sendiri.
„Ja, bener sekali,” kata So Hoa kemoedian. „itoe orang moeda tiada sala sedikitpoen ada Hong Hoe Long! Ach, lantaran siapa ampir sadja badankoe terkoeboer dalem peroetnja ikan. Siotjia, sesoenggoenja kaoe ini mempoenjai keangetan besar dalem pri-ketjintaän!”
„Tetapi, dia toch tiada lebi pandeng akoe seperti satoe moerid terhadep sang goeroe,” djawab Beng Tong. „inilah bikin hatikoe rasanja peri tertjampoer piloe. Biarlah nanti di hadepannja sri-baginda, akoe berdaja sebrapa bisa sampe dia itoe bisa pegang kebesaran dari satoe Djendraal perang, demikianlah baroe hatikoe bisa dapetken kepoeasan.”
„Batin begitoe moelia, sesoenggoenja soeker didapet selaen daripada Siotjia saorang,” memoedji So Hoa dengen roepa terharoe.
⁂
Bebrapa hari soeda berlaloe dan sekarang orang sampe pada tanggal Dji-gwee Tjap sie
Itoe malem, pada djam mengoetaraken poekoel tiga, soeda moelai terdenger dipasang bom pertama, djam ampat disamboeng dengen bom kadoea. Samentara pintoe kota djadi terpentang besar, agar soepaja sekalian Boe Tjin Soe jang baroe loeloes, bisa lebi siang dateng berkoempoel di lapangan boeat menanti kedatengannja sri-djoendjoengan.
Djam lima dilepasken bom katiga, Lee Peng Po doedoekin djolinja menoedjoe ka kraton dan koetika ia sampe di pintoe Ngo Boen, keliatan di sitoe soeda sampe lebi doeloe itoe kedoea mantri Siang dan Joe, jang sigra dateng menjamboet padanja. Kemoedian bersama-sama berdjalan masoek ka dalem kraton aken mengadep sri baginda.
„Sekalian Boe Tjin Soe jang terloeloes, rata-rata telah pada berkoempoel di lapangan,” demikian katanja ketiga kapala examen itoe dengen berbareng sesoeda mendjalanken kehormatan selajiknja, „maka hareplah Pihe soeka dateng ka sana boeat lakoeken oedjian pengabisan” Baeklah, Keng sekalian boleh brangkat lebi doeloe, sebentar Tim aken menjoesoel ka sana.
Beng Tong bersama kedoea pembantoenja lantas berlaloe poela dari Kim Loan Tian naek djoli menoedjoe ka lapangan. Samentara baginda telah prenta iapoenja pengiring aken sediaken kendaraän, begitoelah kemoedian baginda telah berdoedoek di itoe kendaraän kebesaran dengen diïkoetin oleh sekalian mantri - mantri civiel dan militair, langsoeng rame rame brangkat djalan, sesoeda lebi doeloe dipasang tiga kali bom besar.
Setelah sampe di depan pintoe kota, kombali kedengeran lagi tiga kali seara bom, sedeng koetika soeda masoek di lapangan, ketiga kapala examen keliatan telah dateng menjamboet sri baginda dengen berloetoet di tana. Seng Tjong titah marika itoe boleh bangoen berdiri. serta dateng teroes di depan Jan Boe Thia baroe toeroen dari kendaraännja dan berdoedoek di korsi kebesaran.
Sekalian mantri- maniri sesoeda dateng berdjoempa poela, laloe pada berdiri baris di kedoea samping. Baginda idzinken Beng Tong boleh berdoedoek di bagian bawah samentara semoea Boe Tjin Soe jang baroe loeloes, satoe-persatoe telah dateng mengadep, serta kemoedian berdiri di satoe samping sebela bawah.
Antara sebegitoe banjak mantri - mantri, terdapetlah pangkat See Taij Gie Soe bernama Ie Siang Keng, jang soeda bisa kenalin Ong Siauw Hoe itoe ada iapoenja keponakan sendiri, jang telah menjaroe pake nama palsoe. Diam-diam dalem hatinja merasa sepoeloe bagian ampoenja girang, tapi ia tiada brani berlakoe gegaba aken lantas madjoe berkenalan dengen Siauw Hoe.
Samentara itoe, baginda telah keloearken titah soepaja ini pengoedjian dilakoeken poela sama seperti tjara jang soeda berdjalan. Demikianlah dengen menoeroet soesoenan jang tertjatet di itoe boekoe dari candidaat-candidaat jang terloeloes, Koen Tjin Sie kaokin namanja sang Hwee Goan. Berbareng itoe, keliatanlah Ong Siauw Hoe telah madjoe berloetoet di hadepannja sri-baginda.
Meliat itoe Hwee Goan ampoenja roman, baginda soeda merasa seneng dalem hati dan maoe pertjaja bahoea sesoenggoenja dia ini ada satoe orang kosen sedjati, sigra djoega baginda titah aken Siauw Hoe lantas tjoba oendjoekin kebisaannja memana.
Siauw Hoe bangoen dari berloetoetnja. toeroen ka bawah Jan Boe Thia, serta moelai memana sebegimana pertama ia soeda lakoeken. Dengen berdepan ia mengenaken djitoe tiga pana pada itoe boenderan mera, sedeng dengen membalikin badan djoega ia telah kenaken djitoe tiga pana lagi, totaal anem pana, hingga inilah membikin sri-baginda dengen aermoeka bersri-sri, membilang pada iapoenja kedoea ferdana mantri :
„Sesoenggoenja Lee Koen Giok ada mempoenjai pemandengan jang awas betoel, soeda bisa memoengoet Boen Seng jang begitoe berkebetoelan, siapa poenja ilmoe pana ternjata loear biasa sekali”
„Memang tiada sala, djika diliat sadja dari romannja,” Tjo Sin Siang, Kie Seng Tek toeroet bitjara, „ternjata Ong Siauw Hoe boekan ada orang sembarangan, di hari kemoedian dia kebanjakan bakal mendjadi orang termoelia !”
Seng Tjong poen membenerken itoe perbilangan.
Samentara itoe, Him Hauw, Hek Eng Lam dan Ong Hauw, masing-masing poen soeda lepasken lagi pana dan kenaken djitoe ketiga pananja. Dan tiada lama poela, itoe sembilanpoeloeanem Tjin Soe, antero soeda djalanken marikapoenja giliran tentang memana, antara mana, ada djoega jang bisa kenaken djitoe doea anak pana, atawa poen ada jang hanja satoe pana sadja, ketjoeali lima orang jang sama sekali pananja meleset ka tempat kosong.
Soeda itoe, lantas dimoelai poela tentang tjara mengadoe kekoeatan dengen mengangkat gelangan besi, jang sebegimana diketahoei adalah Ong Hauw sendiri jang teritoeng paling koeat di antara sekaliannja.
Kemoedian baginda laloe titah silahken Ong Siauw Hoe, Him Hauw, Hek Eng Lam dan Ong Hauw berampat dateng di hadepannja. Pada marika baginda telah bersabda:
„Meliat kaoeorang berampat ampoenja kebisaan dan ilmoe pana ampir berbandingan, Tim berniat hendak serahken gelaran Tjiong Goan pada Ong Siauw Hoe, serta kemoedian diangkat mendjadi Goan Swee, tapi siapa jang merasa koerang poeas, bolehlah tjoba bertanding dengen sendjata padanja. Boeat ini, orang melaenken boleh oeadjoek kebisaannja setjara aloes, tiada boleh setjara garang atawa sampe menerbitken loeka dan binasaken djiwa tandingannja. Siapa jang melanggar bakal terhoekoem berat!”
Ong Siauw Hoe menerima itoe titah, laloe toeroen ka bawah Jan Boe Thia, mengambil satoe Hong Thian Kek sedeng Teng Soan lantas membawa dateng koedanja, dengen apa Siauw Hoe lantas menoenggang, serta lariken tenga-tenga lapangan, kemoedian dengen mengatjoeng itoe sendjata ia berseroe katanja:
„Akoe soeda trima titah aken tjoba mengadoe kebisaän dengen Sam Wie Lian Heng, maka barang siapa jang merasa koerang poeas, hajolah, boleh lekas madjoe kemari boeat mentjoba!”
Him Hauw jang memang ingin sekali aken bisa meliat Ong Siauw Hoe perolehken itoe gelaran Tjiong Goan dan kemoedian terangkat mendjadi Goan Swee, tentoe sadja ia soeda tiada maoe tjoba bertanding dengen itoe soedara angkat, maka keliatanlah Hek Eng Lam soeda menoenggang koedanja dengen membekel seboeah toembak. Ia mendjoerah pada Ong Siauw Hoe sembari membilang katanja :
„Boeat goenanja nama kemoeliaän apabolehboeat Siauw Te aken tjoba bertanding dengen Lian Heng, hareplah soedi maäfken.”
Siauw Hoe poen membales hormat dan menjaoet katanja:
„Ja, dengen seneng hati Siauw Te aken menerima Lian Heng ampoenja adjaran.” Hek Eng Lam lantas petjoet koedanja madjoe ka depan, angkat toembaknja toesoek menoedjoe ka arah oeloe-atinja Siauw Hoe, berbareng mengoetjap: „Maaf!”
Siauw Hoe menangkis dengen iapoenja Hong Thian Kek, sambil bales menjerang satoe Kek pada Hek Eng Lam, demikianlah kemoedian kedoea orang itoe djadi saling bertaroeng dengen seroe; koetika soeda berperang ada kira - kira doeapoeloe djoeroes lebi, ternjata masi djoega belon keliatan ada jang menang dan kala. Dalem hatinja Ong Siauw Hoe jang berkoeatir Ong Hauw ada gaga perkasa, maka djika ia moesti bertaroeng dengen Hek Eng Lam lebi lama, tenaganja djadi moesti dikorbanken terlebi banjak, hingga terhadep pada Ong Hauw ia aken tiada bisa goenaken tenaga setjoekoepnja, inilah djadi berarti satoe keroegian boeat ia, dari itoe ia perloe selekasnja bisa poekoel moendoer pada Hek Eng Lam.
Begitoelah setelah berpikir begitoe, Siauw Hoe lantas keloearken seantero tenaga dan kebisaännja, berperang lagi kira- kira ada blasan djoeroes, sigra djoega Hek Eng Lam keliatan moelai keteter, iapoenja permaenan toembak pelahan-pelahan djadi kaloet serta tiada sanggoep menangkis lebi lama, laloe ia balikin koedanja lari menoedjoe ka samping kiri, sembari berseroe katanja:
„Ja, sesoengoenja Lian Heng ada poenja kebisaän bagoes dalem tiara maenken sendjata, Tjiong Goan biarlah diserahken padamoe, Siauw Te tiada hendak bereboétan lebi djaoe poela.”
„Kaloe begitoe, hareplah Lian Heng tiada berketjil hati,“ berkata Siauw Hoe dengen membongkokin badannja, berbareng dengen soeara keras ia berseroe lagi katanja:
„Siapa jang merasa koerang poeas, lekaslah madjoe kemari, kaloe tiada, akoe aken lantas poenjaken itoe gelaran Tjiong Goan!”
„Sabar doeloe !” Ong Hauw berkaok, „akoe mendatengin !”
Berbareng itoe, ia sigra mengambil sebilah golok besar, sedeng orang soeda antarken di hadepannja itoe koeda toenggangan. Ia lompat di atas koeda dan madjoe ka depan, zonder banjak bitjara lagi sigra djoega ia atjoeng goloknja membatjok ka atas kapalanja Ong Siauw Hoe,
„Oh, begitoe tjepet !” membentak Siauw Hoe sembari menangkis itoe serangan dengen iapoenja Hong Thian Kek.
Sebaliknja Ong Hauw dengen sengit beroentoen membatjok teroes sampe lima kali batjokan dan goloknja itoe keliatan beroepa sebagi matjan boeas hendak menerkam korbannja. Sambil menangkis orang poenja serangan, Siauw Hoe berpikir dalem hatinja:
„Sesoenggoenja dia ini ada mempoenjai tenaga loear biasa besarnja.”
Kemoedian Siauw Hoe poen lantas bales menjerang, hingga di sitoe djadi terbit satoe peprangan jang seroe sekali. Dan apabila soeda berdjalan doeapoeloe djoeroes lebi, keliatan Ong Hauw semingkin lama berperang semingkin bertamba kekoeatannja. Maka orang banjak jang menjaksiken ini pertandingan, sebagian besar saling membilang satoe sama laen:
„Sajang amat Ong Siauw Hoe jang mempoenja ilmoe pana begitoe gaib, ini kali bakal djato dalem tangannja Ong Hauw !”
Samentara itoe, orang soeda berperang sampe ada tigapoeloe djoeroes lebi, Siauw Hoe jang tiada oengkoelan melawan lebi lama pada Ong Hauw jang bertenaga besar, pikir dalem hatinja ada lebi baek ia goenaken Popwe boeat menangkep padanja. Lantas ia balikin koedanja dan lari menoedjoe ka sepandjang tepi Jan Boe Thia sembari berseroe katanja:
„Lian Heng, kapan kaoe brani mengoedak sampe di sini, baroe akoe mengakoe kaoe ada satoe Eng Hiong sedjati!”
„Ha, ha,” berkata Ong Hauw sembari membentak, „sedeng kaoe tiada takoet padakoe, masakah sebaliknja akoe moesti merasa gentar padamoe dengen tiada brani memboeroe!”
Sehabisnja berkata, langsoeng Ong Hauw madjoeken koedanja boeat mengoedak, samentara Siauw Hoe dengen tangan kanannja laloe merogo dalem kantongnja kasi keloear itoe Ang Kim Tat So dan lempar ka oedara, berbareng ia membalikin badannja seraja membilang dengen soeara njaring :
„Lian Heng, djangan tjoema maoe mengoedak sadja. Liat akoepoenja Popwe soeda dateng!”
Mendenger itoe perkataan „Popwe” Ong Hauw djadi amat terprandjat. Ia lantas brentiken koedanja, angkat kapala memandeng ka atas, maka ia dapet liat segoeloeng sinaran terang ada menoetoepin kedoea matanja dan selagi ia belon bisa pikir apa - apa, satoe soeara kedengeran berboenji, berbareng dirinja kena teriket djato dari atas koeda. Sedeng Siauw Hoe boeroe-boeroe lompat toeroen dari koedanja, menggape dengen ia poenja tangan satoe kali, itoe tali Ang Kim Toat So sigra djoega soeda balik poelang padanja serta disimpen poela dalem kantong, laloe kemoedian dengen kedoea tangannja, Siauw Hoe angkat bangoenin Ong Hauw.
„Berhoeboeng dengen nama kebesaran, Siauw Te kepaksa soeda berlakoe koerang hormat,” berkata Siauw Hoe dengen membri hormat seraja mengangkat kedoea tangannja, „hareplah Lian Heng soeka maäfken.„”
Saking maloenja, Ong Hauw poenja selebar moeka djadi keliatan mera, tapi ia menjaoet djoega katanja:
„Itoelah masa kenapa! Boeat mereboet nama gelaran, siapa djoega bila mempoenjai Popwe, bakal tiada begitoe goblok boeat tiada menggoenaken.”
Setelah oetjapken ini perkataän, sigra djoega ia dateng mengadep di hadepan sri - baginda dengen berloetoet, sedeng Seng Tjong idzinken ia boleh bangoen berdiri, kemoedian silahken Ong Siauw Hoe dateng lebi deket sigra menanja:
„Baroesan kaoe telah goenaken barang apa boeat tangkep Ong Hauw!”
„Itoelah ada seroepa tali jang dikasi nama Ang Kim Toat So, berasal miliknja dewa jang telah pertapaken itoe barang sekean lama,„” begitoelah djawabnja Siauw Hoe dengen lakoe hormat, „kapan itoe tali dilepasken, lantas djoega mengeloearken sinaran terang, serta bisa menangkep panglima moesoe di antara seratoes tindakan.”
„Kaloe bener itoe ada barangnja dewa.” menanja poela Seng Tjong dengen hati bersangsi, „tjara begimana boleh djato dalem tanganmoe?”
„Hareplah Pihe mendapet taoe.” menjaoet lagi Siauw Hoe, „bahoea Sin bersama Him Hauw ada mengangkat soedara. Kira-kira tiga taon berselang, dapet denger Hong Hoe Goan Swee telah ditawan oleh moesoe dengen menggoenaken kesaktian dari ilmoe siloeman, maka Sin berdoea senantiasa bertoekaran pikiran dan beranggepan, bahoea moesoe ada mengandel pada ilmoenja jang gaib, barang tentoe orang aken tiada bisa goenaken dengen betoel diapoenja kegagahan biar begimana tinggi sekalipoen. Lantaran ini, Sin berdoea laloe ambil kejakinan mentjari orang sakti di antara goenoeng - goenoeng jang besar dan beroentoeng bisa bertemoe dengen orang gaib jang soeka toeroenken ilmoe pada Sin berdoea, lebi djaoe serahken djoega bebrapa matjem Popwe boeat Sin berdoea toeroen goenoeng aken hadepin moesoe, soepaja bisa berdiriken pahala bagi negra serta bantoe meringanken Pihe poenja kerepotan.”
Baroe sadja Siauw Hoe menoetoerken beres iapoenja hal-ichwal, Beng Tong tjepet madjoe mengadep dan oedjarnja :
„Oh, Kiong Hie, Pihe! Sesoenggoenja soeker sekali boeat bisa dapetken orang sematjem Ong Siauw Hoe, jang dalem oesia begitoe moeda soeda bisa mengandoeng pikiran soetji berikoet pri-kesetiaän sepenoenja. Menoentoet ilmoe tiga taon lamanja, pastilah diapoenja ilmoe telah berhasil baek dan bisa membri adjaran pada sekalian moesoe atawa poenaken sang Jauw To poenja berbagi-bagi Popwe. Dari itoe, Sin harep Pihe soeka lantas serahken itoe tanggoengan jang berat pada Ong Siauw Hoe.”
Koetika tadi mendenger Siauw Hoe poenja penoetoeran, terlebi doeloe baginda telah merasa amat girang, sekarang kombali mendapet denger Beng Tong poenja poedjian, soeda semingkin menambaken kegirangannja, maka dengen sorot moeka bersri-sri baginda bersabda :
„Ja, ini semoea ada dari Keng poenja kejakinan jang loear biasa, maka bisa didapetken saorang panglima jang begini loear biasa dan boleh diharep itoe bangsa Tiauw Sian jang sombong dan garang lekas bisa ditaloekin.”
Kemoedian selakoe menghiboer, baginda membilang pada Ong Hauw:
„Kaoepoenja tenaga kekoeatan ada melebiken dari kebanjakan orang, djoega pantes sekali boeat terpake.”
Ong Hauw berkali-kali hatoerken perkataän merendah, oepama oendjoekin iapoenja kebodoan. Samentara itoe, baginda titah aken orang meneroesken poela itoe oedjian pengoelangan atas kebisaän dan kepandean maen sendjata dari sembilanpoeloeanem Tjin Soe jang terloeloes. Paling pengabisan baroelah orang lakoeken pengoedjian tentang ilmoe kebisaän prihal soerat-menjoerat. Sampe pada koetika matahari soeda dojong ka barat, ini pemereksaän examen baroe rampoeng seanteronja. Dan baginda pesen aken semoea candidaat soepaja besok pagi pada dateng berkoempoel di kraton boeat mendenger poetoesan. Sesoeda itoe, dengen diiringin oleh sekalian mantri - mantrinja baginda balik poelang ka dalem astana, samentara Beng Tong poen soeda kombali ka gedongnja sendiri, di mana dengen diam-diam ia menoetoerken pada So Hoa prihal Hong Hoe Siauw Hoa bersama Him Hauw telah pladjarin ilmoe kesaktian, maka perginja ini kali boeat memoekoel Tiauw San, pasti bisa diharep aken beroleh kemenangan, hingga membikin So Hoa jang mendenger djadi merasa amat girang.
Samentara itoe, le Siang Keng jang merasa slempang Lauw Tjiat nanti bisa mengetahoei resianja Siauw Hoa, maka itoe ia soeda tiada brani kenalken sang keponakan sekalipoen dalem hati ada sanget kepingin, tjoema diam-diam ia bisa merasa bersoekoer saorang diri, kerna ada harepan itoe keponakan dapetken kemadjoean bagoes dalem oedjiannja.
Besok paginja, Seng Tjong bersemajam di tachta keradjaän, silahken itoe sembilan-poeloeanem orang Tjin Soe dateng mengadep di depan kraton sedeng Thaij Kam telah keloearken itoe papan plekat koening dan gantoeng di satoe tjagat tenga - tenga kraton, pada mana ada tertjatet: Ong Siauw Hoe loeloes dalem oedjian pertama dengen perolehken gelaran Tjiong Goan; kadoea, Him Hauw dengen gelaran Pong Gan: katiga, Hek Eng Lam dengen gelaran Tham Hoa, sedeng Ong Hauw kerna sama sekali tiada mengenal mata soerat, lia terloeloes pada bagian klas doea sebagi Tjin Soe satoe, dan selebinja jang sembilanpoeloeanem nama semoea terloeloes sebagi Boe Tjin Soe.
Orang-orang jang terloeloes lantas pada bersama sama mengatoerken trima kasi, sedeng baginda kedengeran telah mengeloearken titah poela sembari bersabda:
„Bahoea sekalian Boe Tjin Soe jang terloeloes, menoeroet biasa wadjib membikin pasiar tiga hari di seloeroe straat dalem kota, tapi kerna sewaktoe Tiauw Sian lagi oendjoek kegarangannja, sedeng taon jang baroe berselang telah dititah San Tong Soen Boe menjediaken praoe praoe perang ketjil dan besar, sebanjak bisa dimoeatin oleh anempoeloeriboe balatentara, lagi soeda diprenta memili dan menjaboet 60 000 soldadoe aer dari seloeroe negri dan itoe semoea soeda disediken dari sekean waktoe, maka sekarang Tim menetepken tanggal Dji-qwee Dji-tjap-dji boeat lantas madjoeken balatentara, mendjadi temponja soeda terlaloe kesoesoe, biarlah boleh traoesa dilakoeken itoe pasiaran. Kapada Ong Siauw Hoe dikasi persen satoe stel pakean perang. dengen diangkat djadi Tjeng Tang Taij Goan Swee merangkep kebesaran Biat Liok Taij Tjiang Koen, berikoet anoegrahan sebilah pedang Siang Hong Po Kiam, serta mempoenjai kekoeasaän penoe dalem oeroesan balatentara. Kapada Him Hauw dibri koerniaan sebagi Liong Djiang Tjiang Koen merangkep djadi Tjo Sian Hong; Hek Eng Lam mendjadi Joe Sian Hong, sedeng Ong Hauw diwadjibken mendjadi Hok Wie Saij; sembilanpoeloeanem Boe Tjin Soe laennja semoea diangkat mendjadi panglima pembantoe boeatikoet perang bersama-sama.”
Apabila ini firman soeda dikeloearken, Ong Siauw Hoe laloe madjoe ka depan, memake itoe pakean perang jang dikoerniaken oleh sri-baginda, djoega gantoengin itoe tjap kebesaran Goan Swee di badannja; menantjep kembang mera di atas kapala dan trima anoegrahan tiga tjangkir arak dari baginda sendiri, Him Hauw dan Hek Eng Lam poen telah gantoengin di badannja itoe tjap kebesaran Tjo dan Joe Sian Hong, menantjep kembang mera, serta masing masing-minoem tiga tjangkir arak pembrian baginda, begitoepoen Ong Hauw telah trima tiga tjangkir arak dan memake kembang mera.
Sesoeda itoe oepatjara dilakoeken beres, sri-baginda lantas moendoer masoek ka dalem astana, dan sekalian mantri-mantri poen pada boebaran. Samentara sesoeda orang berada di loear pintoe Ngo Boen, Ong Siauw Hoe membilang pada sekalian panglima itoe:
„Ja, Liat-wie Lian Heng, baek sekali kaloe dari sini kitaorang lantas bersama-sama koendjoengin Nio Sin Siang dan Lee In Soe.”
Semoea panglima membenerken ini perkataän, begitoelah iaorang laloe bersama-sama menoedjoe ka gedongnja Joe Sin Siang, serta hatoerken iaorang poenja maksoed kedatengan pada penggawal pintoe.
Koetika itoe, djoestroe Nio Siang lagi doedoek iseng-iseng dengen Keng Hoedjin sembari beromong - omong, keliatanlah saorang boedak prempoean dateng merapport katanja:
„Tjeng Tang Goan Swee, Ong Siauw Hoe, dengen membawa sekalian panglima ada lagi menoenggoe di loear boeat djoempaken Thaij Soe berserta Lee Kho-ja.”
„Ini hal sama sekali tiada bersangkoetan dengen akoe, biarlah Beng Tong sadja disoeroe pergi keloear.”
Sang boedak prempoean poen sigra berdjalan masoek ka dalem aken mewartaken pada Beng Tong, jang djoestroe itoe waktoe memang kitapoenja Siang Sie belon lama poelang dari kraton, lagi bitjaraken pada So Hoa tentang halnja nanti tanggal 22 Djigwee hendak gerakin balatentara. Datenglah itoe boedak prempoean jang merapport katanja:
„Ong Goan Swee bersama sekalian panglima lagi hendak berdjoempa. Thaij Soe pesen aken Kho-ja sendiri boleh pergi ketemoeken marika.”
„Baeklah,” saoet Beng Tong, „sebentar akoe aken keloear."
.jpg)
| HONG HOUW LAUW JAN TJOE |
HONG TE |
XXXIX.
Menanggoeng voorstel aken membri ke-
merdikaän pada Tjoei Taij San.
Mengeloearken firman boeat
angkat Jong Tat mendjadi dibaw
Sian Hong
Tatkala Lee Beng Tong soeda dateng di pertengahan gedong, sigra djoega ia menitah orangnja aken oendang sadja Ong Goan Swee sendirian boeat bertemoe, sedeng jang laennja disilahken boleh poelang doeloe dengen dihatoerken banjak trima kasi.
Orang jang menerima ini prenta lantas dateng di loear boeat menjampeken pesenannja sang madjikan, samentara itoe Beng Tong telah prenta lagi aken orang sigra memboeka pintoe besar boeat silahken Ong Goan Swee masoek ka dalem. Tetapi Siauw Hoe ternjata soeda berdjalan masoek dari pintoe samping kanan.
Beng Tong tjepet bangoen dari tempat doedoeknja boeat menjamboet dan Siauw Hoe boeroe-boeroe madjoe berloetoet sambil membilang:
„Begimana Boen Seng brani tjapeken In Soe boeat menjamboet!”
„Oh, Lian Heng,“ berkata Beng Tong sambil angkat bangoenin pada Siauw Hoe, „apa perloenja moesti mendjalanken kehormatan begini roepa”
„Menoeroet peradatan seoemoemnja, orang wadjib menghargaken itoe kehormatan dari jang rendah terhadep pada jang tinggi,” djawab Siauw Hoe, „dan Boen He orang apa, maka brani melanggar itoe atoeran.”
Beng Tong berniat hendak mengambil sikep setjara antara toean roema dengen tetamoenja. Tapi Siauw Hoe kebratan boeat trima, hanja telah ambil tempat doedoek di samping. Dan selagi orang minoem thee jang disoegoeken, Beng Tong soeda berpikir dalem batinja:
„Biarpoen soeami istri masi belon bisa bersama satoe tempat tidoer, tapi masakah tiada boleh doedoek berkoempoel sambil minoem arak?”
Begitoelah sesoeda berpikir demikian, Beng Tong lantas prenta orangnja aken sigra sediaken satoe medja perdjamoean; aken tetapi Siauw Hoe dengen oetjapken trima kasi kombali telah menampik katanja
„Satoe moestail, sebelonnja Boen Seng bisa hadiaken apa-apa atas In Soe ampoenja boedi- kebaekan, begimana berbalik sekarang moesti trima In Soe poenja koerniaan atas satoe medja perdjamoean?”
„Ha, ha,” katanja Beng Tong dengen ketawa, „kaoe dan akoe ampoenja oesia toch ampir bersamaän, maka biarlah kita anggep sadja satoe sama laen seperti sobat sepantaran, djanganlah terlaloe banjak pake atoeran.”
Siauw Hoe tiada mendjawab poela atas itoe perkataän, hanja telah membilang lagi:
„Boen He minta Soe Boe bisa keloear kemari, boeat trima Boen He ampoenja pembrian hormat”
„Dalem brapa hari ini istrikoe ada koerang enak badan,” berkata Beng Tong, „biarlah diadaken sadja kesempetan di laen hari boeat bertemoe.”
Tiada lama, medja perhidangan soeda disediaken beres, maka kedoea orang moeda itoe laloe sama doedoek hadepin medja terseboet. Dalem begitoe, Beng Tong kedengeran telah membri inget pada Siauw Hoe:
„Kapan Lian Heng soeda mengepalaï pasoekan balatentara, haroeslah di sepandjang djalan bisa memegang atoeran keras, melarang betoel-betoel boeat sesoeatoe soldadoe mengganggoe keamanan rajat negri. Lagipoen haroes bisa menjinta pada semoea balatentara, agar di waktoe perloe marika itoe nanti soeka mengorbanken segala apa boeat membela, dengen begitoe tiada soeker boeat kita bisa harepken kemenangan, samentara pada koetika mendapet kemenangan, djanganlah berlakoe tjerobo, hanja moesti lakoeken pemereksaän jang amat teliti kapan moesti mengoedak pada moesoe. Sesoeatoe anoegrahan maoepoen hoekoeman moesti digoenaken keadilan zonder memili boeloe. Djoega djangan diloepa, bahoea Allah senantiasa mempoenjai kemoerahan hati maoepoen di mana sadja, maka itoe apabila beroleh kemenangan, sebrapa bisa andjoerken moesoe boeat menaloek, daripada moesti membikin binasa terlaloe banjak djiwa manoesia. Ini bebrapa fatsal. adalah penting sekali aken diperhatiken oleh sesoeatoe orang jang mengapalaken pasoekan sewaktoe madjoe di peprangan.”
Ong Siauw Hoe mengatoerken trima kasi dan membilang:
„In Soe ampoenja pembitjaraän jang mirip emas berketi, Boen He tentoe perhatiken soenggoe-soenggoe dan tiada aken beralpa barang soeatoe saät djoega.”
Koetika soeda minoem melaloeï tiga djalan, Siauw Hoe laloe berpamitan sambil oetjapken trima kasi, katanja:
Boen He selamanja tiada tahan minoem banjak, maka biarlah sekarang sadja Boen He moehoen pamitan.”
Lee Beng Tong djadi berpikir dalem hatinja, belon taoe hari kapan marika baroe bisa idoep berkoempoel sebagi soeami - istri, maka sekarang begimanalah moesti liwatken ini tempo baek dengen begitoe sadja, seharoesnja ia bisa landjoetken makan - minoem sampe sepoeasnja, boeat saling mengoendjoek itoe pengrasaän tjinta maski dengen djalan samar.
„Djanganlah terlaloe berkoekoeh pada segala peradatan,” katanja kemoedian, „dari itoe ini hari kitaorang moesti minoem sampe mabok.”
Ong Siauw Hoe djadi oeroengken niatannja dan berdoedoek teroes hadepin medja perdjamoean. Samentara itoe, So Hoa jang lagi mengintip di blakang Pian, diam-diam merasa piloe saorang diri, kerna terkenang bahoea lantaran Siauw Hoe hingga dirinja sampe djato di sini, begitoe djoega ampir sadja djiwanja djadi korban di dalem aer.
Dalem keadaän begitoe, kebetoelan Joe Nio dan Tek Tjia poen sampe di itoe tempat, seraja menanja pada So Hoa:
„Hoedjin di sini lagi liat apa ?” „Jalah lagi meliat soeamikoe doedoek berdjamoean dengen Boe Tjiong Goan, Tjeng Tang Taij Goan Swee, Ong Siauw Hoe.”
„Oh, ja,” katanja kedoea goendik dari Khong Djia San, „kitaorang djoega kepingin meliat begimana adanja itoe Boe Tjiong Goan.”
Berbareng dengen oetjapken ini perkataän, marika dateng lebi deket dan memandeng keloear dari renggangnja Pian, sekoetika lama dengen berpaling pada So Hoa, iaorang membilang lagi:
„Ong Tjiong Goan soenggoe ada saorang moeda beroman tjakep dan gaga sekali, njatalah soeamimoe mempoenjain pemandengan mata jang tadjem, soeda bisa poengoet satoe Boen Seng jang begitoe berharga, siapa di blakang hari pasti bisa perolehken kemoeliaän loear biasa, hingga soeamimoe poen bakal tetoeroetan mendapet moeka terang. Ja kaoepoenja soeami dari satoe anak sekolahan jang baroe beroesia delapanblas taon, telah bisa mempoenjai Boen Seng ampir seloeroe negri, soenggoe Hoedjin boleh dibilang ada beroentoeng amat.”
„Itoelah semoea melaenken mengandel pada sri baginda ampoenja redjeki, sedeng soeamikoe ampir tiada berarti apa-apa,” saoet So Hoa dengen ketawa. „betoel diapoenja roman di loear boleh dipandeng, tetapi peranginja ada sebaliknja, jang bisa bikin orang djadi djemoe dan membentji.„”
Kedoea goendik itoe djadi berpikir dalem hatinja, bahoea So Hoa njata ada satoe prempoean jang tiada taoe tjoekoep, poenja laki begitoe roepa masi koerang trima.
Koetika mana, lantaran merasa kikoek dengen adanja itoe perbedaän antara goeroe sama moerid, beroelang-oelang Ong Siauw Hoe minta ditoetoep itoe perdjamoean, tapi Beng Tong dengen ketawa dan paras bersri-sri memaksa djoega aken sang tetamoe doedoek teroes makan dan minoem.
Begitoelah itoe perdjamoean djadi berdjalan teroes dan tempo soeda merasaken ada anem bagian poenja mabok, Siauw Hoe berkoeatir dari maboknja nanti bisa membikin ia loepaken peradatan, dari itoe kombali dengen sanget ia minta permisi boeat poelang. Beng Tong titah orangnja aken sigra bawa dateng Ong Goan Swee ampoenja koeda toenggangan.
Sebentar lagi, itoe kueda telah dibawa sampe deket roeangan pertengahan terseboet.
„Harep Ong Lian Heng boleh lantas menoenggang koeda dari sini,” berkata Beng Tong.
„Tetapi” berkata Siauw Hoe, „moestail amat Boen Seng brani berlakoe begitoe koerang adjar, biarlah sampe di loear sadja baroe menoenggang koeda.”
Beng Tong keras djoega memegang maksoednja, dengen setjara memaksa ia toentoen Siauw Hoe ka atas koedanja Dan Siauw Hoe kerna tiada dapet djalan boeat menolak poela, apabolehboeat dengen hatoerken maäf ia kepaksa toenggangin koedanja di sitoe. Samentara Beng Tong prenta orang aken boekaken pintoe besar, adalah Siauw Hoe soeda memetjoet koedanja, serta berdjalan pergi dari pintoe samping kanan.
Tatkala Beng Tong telah balik ka dalem kamarnja, So Hoa menjamboet seraja berkata dengen bersenjoem:
„Njatalah Siotjia soeda berlakoe begitoe menjinta dengen oendjoek tjara perlajanan jang demikian anget”
„Aken tetapi,” djawab Beng Tong, „sekalipoen soeami-istri bisa doedoek koempoel makan-minoem, tapi toch satoe sama laen tiada dapet saling mengoendjoek pengrasaän masing-masing dengen setjara terang, itoelah soenggoe membikin hati djadi terharoe.” Tetekala Ong Siauw Hoe soeda balik poelang di Kong Koan, Him Hauw jang berdir menoenggoe di sitoe keliatan telah menjamboet dengen berloetoet katanja:
„Boat Tjiang tiada mengetahoei poelangnja Goan Swee, maka soeda tiada dateng menjamboet lebi djaoe, hareplah Goan Swee ampoenja maäf”
Siauw Hoe djadi sanget terprandjat, boeroe-boeroe ia lompat toeroen dari koedanja, djoega djatoken dirinja sama berloetoet di tana sembari membilang :
„Siauw Te bersama Heng Tiang, tiada beda sebagi soedara poetoesan peroet, tjara begimana moesti mendjalanken ini matjem kehormatan.”
„Hoeboengan prive tiada dapet dibawa ka oendang-oendang negri, kita sekarang ada terpetja antara Goan Swee dengen panglimanja, maka wadjib sekali moesti mendjalanken peradatan begitoe”
Sesoeda saling membri hormat poela, Siauw Hoe angkat bangoenin pada Him Hauw dan berkata lebi djaoe:
„Biar begimana djoega, kaloe Heng Tiang masi sadja mendjalanken kehormatan seperti baroesan, itoelah boekan tjaranja orang mengangkat soedara.”
Him Hauw memanggoet dan kedoea orang itoe laloe sama berdjalan masoek ka dalem Kong Koan, di mana sesoeda memboeka pakean kebesarannja, lantas masing-masing mengambil tempat doedoek Ong Siauw Hoe menoetoerken satoe persatoe prihal Lee Beng Tong ampoenja perlakoean terhadep dirinja.
„Memang betoel Lee Beng Tong ada saorang pemoerah dan tiada angkoe,” berkata Him Hauw, „tapi tjaranja berlakoe terhadep Hian Te, soenggoe boleh dibilang ada satoe kelangkahan.”
„Ja, ini djoega Siauw Te soeda merasa sedari bermoela,” saoet Siauw Hoe sebagi penoetoep itoe pembitjaraän.
Besok paginja, koetika masi baroe djam ampat, Siauw Hoe soeda bangoen, berpakean dan mengisi peroetnja, kemoedian dateng di kraton dengen niatan hendak madjoeken voorstel boeat mintaken keampoenan bagi Wie Jong Tat, serta keïdzinan aken ia itoe boleh ikoet perang bersama-sama. Itoe pagi djoestroe Lee Beng Tong dan Lauw Tjiat tiada dateng bersidang di kraton.
Sebentar lagi, sri-baginda Seng Tjong telah berdoedoek di tachta keradjaän, sedeng sekalian mantri soeda pada mengadep dengen oepatjara sebegimana lajiknja, maka Ong Siauw Hoe jang kemaren menampak baginda ada berlakoe begitoe manis padanja, dengen mengambil kebranian hati, sigra djoega ia madjoe mengadep dan membilang sembari berloetoet:
„Sin, Ong Siauw Hoe, hendak merapportken satoe hal, moehoen Pihe ampoenja keampoenan, baroe Sin brani mempersembahken“
„Ja, Keng terbebas dari segala kedosaän,” bersabda baginda, „bolehlah lantas toetoerken apa jang dimaksoedken.”
„Tempo hari Sin bersama Him Hauw dateng kemari boeat masoek examen,” demikianlah oedjarnja Ong Siauw Hoe, „tenga djalan melaloeï goenoeng Tjoei Taij San, kawanan brandal telah dateng memegat djalanan boeat merampok, tapi soeda kena dipoekoel moendoer oleh Sin berdoea; blakangan kapala brandal, Wie Jong Tat, telah toeroen sendiri dari goenoengnja, bertempoer dengen Sin sampe ada ratoesan djoeroes ampoenja lama, masi belon ketaoean mana jang menang dan mana jang kala, tapi dia soeda oendang Sin berdoea naek ka atas goenoeng dengen didjamoe sepantesnja. Di sitoe Sin baroe mendapet kenjataän, Wie Jong Tat ada saorang moeda jang beroesia toedjoeblas taon, romannja tjakep, selaen mempoenjai kegagahan djoega ada poenja ketjerdikan loear biasa, tadinja dia poen ada berasal toeroenan panglima perang. Waktoe membikin perdjalanan meliwatin Tjoei Taij San, dia soeda boenoe mati kapala brandal pertama bernama Han Houw, sedeng laskar-laskar brandal tempo meliat Wie Jong Tat ada amat gaga perkasa, dengen sanget marika lantas menahan padanja dan angkat dia mendjadi kapala marika. Sebaliknja Wie Jong Tat poen mengandoeng niatan dengen ambil tempat di itoe goenoeng, dia bisa pelahan pelahan mengoempoel soldadoe, aken kemoedian moehoen Pihe ampoenja kebebasan dan perkenan, soepaja dia boleh membawa antero pasoekannja, madjoe memoekoel Tiauw Sian, boeat dengen mendiriken pahala meneboes kedosaännja, serta perolehken soeatoe nama kemoeliaän. Maka koetika dia mendapet taoe Sin berdoea poenja maksoed hendak toeroet examen, dengen jakin minta Sin kemoedian soeka menjampeken tjita tjitanja ka hadepan Pihe. Demikianlah sekarang Sin madjoeken ini voortel, dengen pengharepan besar Pihe soeka mengaboelken dan dia aken trima mendjadi Sian Hong boeat madjoe di depan, kemoedian bertempoer mati-matian dengen moesoe. Hareplah Pihe ampoenja pertimbangaan!”
Mendenger begitoe, satoe pengrasaän panasaran jang tiada terkata mendadak berbajang di moekanja sri-baginda dan ia bersabda:
„Itoe kapala brandal, Wie Jong Tat, doeloe hari soeda boenoe mati oetoesan dari Heng Po, binasaken banjak djiwa soldadoe negri dan merampas anak-bininja Hong Hoe Keng bawa ka atas goenoeng, njatalah seterang-terangnja diapoenja maksoed berchianat pada negri, lagipoen atjapkali dia poekoel roesak pasoekan dari soldadoe negri di tempat-tempat jang berdampingan, itoelah semingkin njata boeat diapoenja tiada pandeng mata pada oendang-oendang negri. Tambahan poela dia soeda atoer tipoe tawan Lauw Ke Pek, jang sampe sekarang belon ketaoean tentang mati-idoepnja. Boeat itoe semoea soeda sekean lama Tim mengandoeng panasaran dalem hati, dengen niatan kapan Tiauw Sian soeda dikalaken, sigra djoega dengen pasoekan kemenangan berbareng membasmi Tjoei Taij San, menangkep Wie Jong Tat serta Hong Hoe Keng ampoenja anak-bini, dihoekoem tjintjang satoe persatoe, baroelah Tim poenja hati dengen begitoe bisa merasa poeas. Ja, itoelah ada satoe pesakitan besar dan kedosaän jang tiada dapet ampoen lagi, biarlah Keng djangan banjak bitjara poela tentang hal ini.”
„Boekannja Sin brani banjak moeloet,” berkata lagi Siauw Hoe sambil mantoekin kapalanja, „melaenken oleh kerna itoe hari Sin ada berdiam brapa hari di atas goenoeng, mendjadi dapet taoe dengen terang kaloe Wie Jong Tat sampe moesti menoeloeng anak-bininja Hong Hoe Keng, jalah tersebab menginget marika itoe meloeloe hadepin soeatoe fitenahan. Dan dia soeda angkat bininja Hong Hoe Keng mendjadi iboe, sedeng pada anak prempoeannja Hong Hoe Keng, Hong Hoe Tiang Hoa, ada mendjadi soedara angkat, dengen mengangkat persoempahan berat. Dia tinggalken marika di pasanggrahan blakang, samentara Wie Jong Tat sendiri berdiam di bagian loear, begitoe djoega telah diadaken larangan keras boeat sekalian Liauw lo, tiada diïdzinken boleh keloear masoek di itoe pasanggrahan blakang. Selaen itoe, prihal Lauw Kok Koe, Sin djoega dapetken ada diperlakoeken dengen baek dalem tjara terhadep tetamoenja, melaenken menoenggoe kapan dia soeda beroleh kebebasan, pasti aken lantas antarken Lauw Kok Koe balik poelang kemari, sama sekali tiada ada dilakoeken perkosahan maoepoen penjiksaän. Boeat itoe djoega, Sin perna bertemoe moeka dengen Lauw Kok Koe, demikianpoen Hong Hoe Keng poenja bini dan poetri, hingga Sin bisa mendapet taoe semoea apa dengen sedjelasnja. Apalagi Hong Hoe Keng poenja poetri teritoeng saorang gaga di antara golongan anak prempoean, kerna diapoenja ilmoe silat dan ilmoe sendjata tjoekoep bagoes, djoega soeda njataken maksoed hatinja hendak ikoet perang bersama-sama soepaja bisa menoeloeng ajahnja dan membela negri Demikianlah moehoen Pihe ampoenja kemoeraban hati agar mengasi djalan boeat marika bisa meneboes dosanja serta perolehken sedikit pahala.”
Mendenger ini perkataän, kombali terbit satoe perobahan di aer moekanja baginda Seng Tjong dan ia bersabda poela :
„Tidakah Keng ada satoe klompot dari Tjoei Taij San? Maka soeda maoe memvoorstelken sampe begitoe roepa!”
Alangkah terkedjoetnja Ong Siauw Hoe koetika mendenger ini perkataän, sampe kringet dingin mengoetjoer sekoedjoer badannja, dengen memanggoetin kapalanja beroelang-oelang ia membilang lagi :
„Dari sebab menginget dia dengen sedjoedjoernja hati hendak menoedjoe pada djalan jang bener, maka Sin brani madjoeken voorstel begitoe roepa, moehoen beriboe - riboe ampoen bagi Sin poenja kelantjangan ini.”
Meliat Siauw Hoe djadi begitoe ketakoetan, baroelah sorot moekanja sri-baginda berbalik djadi sabar lagi dan berkata:
„Soedalah, baroesan Tim tjoema berkata memaen. Tetapi sebelonnja Tjoei Taij San dapet dibasmi, Tim poenja panasaran tiada bisa linjap!”
Kemoedian Ong Siauw Hoe laloe moendoer ka satoe samping, sedeng dalem hati masi senantiasa berdebar. Ia sekarang baroe merasa, bahoea satoe kali baginda oendjoeken kemorkahannja orang aken bergoemeteran sekoedjoer badan dan semangat ilang rasanja seantero.
Tiada lama lagi, baginda Seng Tjong telah moendoer poelang ka dalem astana, sedeng Siauw Hoe poen balik kombali ka Kong Koan, di mana ia bertemoe dengen Him Hauw dan toetoerken satoe persatoe apa jang baroesan telah kedjadian dalem kraton berhoeboeng dengen iapoenja voorstelan.
„Sekarang Siauw Te pikir.” achirnja Siauw Hoe berkata lebi djaoe, „aken minta sadja Lee In Soe ampoenja pertoeloengan, boeat bantoe madjoeken voorstel di hadepan baginda, kaloe - kaloe pengharepan kita nanti bisa terkaboel.”
„Ach, itoelah tiada bisa djadi,” berkata Him Hauw, „Hian Te sekarang soeda bikin ini hal mendjadi gagal, baroe hendak, minta In Soe ampoenja bantoean; tentoe sekali dia aken merasa koerang seneng, bahoea tadinja kaoe soeda berlakoe lantjang dengen mengambil kemaoean sendiri dan zonder mengindahken padanja, tjara begimana dia nanti maoe bantoe madjoeken voorstel boeat goenamoe.”
„Boeat goenanja iboe dan entji, biarlah,” berkata Siauw Hoe poela, „dan Siauw Te tiada aken menjingkir dari oepat-tjatjinja Lee In Soe.”
Sehabisnja berkata, boeroe-boeroe Siauw Hoe mengisi peroetnja, kemoedian laloe menoenggang poela koedanja, langsoeng dateng sampe di gedongnja Nio Siang, di mana ia toeroen dari toenggangannja dan minta pada penggawal pintoe aken ia boleh bertemoe dengen Lee Peng Po.
Apabila trima ini rapportan dari orangnja, Lee Beng Tong poen lantas menitah boeat silahken Ong Siauw Hoe masoek bertemoe, atawa setelah sama berdoedoek dan minoem setjangkir thee, Beng Tong kedengeran moelai menanja :
„Tiada sari-sarinja Lian Heng poenja roman oendjoek roepa berdoeka, sebenernja apakah soeda terdjadi?"
Siauw Hoe lebi doeloe menoetoerken satoe persatoe prihal iapoenja voorstel dan koerang senengnja sri-baginda tadi pagi, serta kemoedian membilang djoega :
„Sebenernja, boekan Boen He sengadja melantjangin In Soe dengen mengambil kemaoean sendiri, hanja soeda terdjadi kerna tiada brani mengganggoe In Soe boeat ini oeroesan prive. Tapi sekarang setelah kedjadian begitoe roepa, apabolehboeat Boen He dateng djoega aken moehoen In Soe ampoenja kemoerahan hati, bahoea menginget Wie Jong Tat berserta anak - bininja Hong Hoe Keng dengen setoeloesnja hati hendak menoedjoe ka djalanan jang lajik, soekalah In Soe bantoe mintaken pada baginda soepaja maoe dikeloearken firman boeat membri keampoenan pada Tjoei Taij San serta idzinken marika itoe ikoet perang bersama sama."
Sesoedanja mendenger orang poenja antero penoetoeran, Beng Tong keliatan djadi terprandjat dan kemoedian berkata :
„Ja, Lian Heng, sesoenggoenja djoega kaoe soeda berlakoe amat lantjang! Sebagi satoe pembesar jang baroe terloeloes dan lagi boekan ada mantri besar dalem keradjaän, begimanalah boleh sembarang memadjoeken voorstel, oentoeng baek baginda ada berhati moerah dan sabar, soeda tiada djatoken kesalahan. Tjoba seandenja baginda soenggoe-soenggoe morka, tentoelah kaoe aken mendapet kedosaän besar sebagi satoe pembesar jang tiada berhak soeda gegaba keloearken perkataän sembarangan dengen tiada mengindah oendang - oendang negri. Ach, Lian Heng, ingetlah betoel - betoel aken di laen kali djangan ambil tjara begitoe poela !"
„Itoelah melaenken tersebab meliat Wie Jong Tat berserta Hong Hoe Keng poenja anak-bini ada bersoenggoe-soenggoe hati hendak membela negri, maka Boen He sampe berlakoe begitoe, kapan In Soe soeka membantoe, bisa diharep ini voorstel bakal ditrima, dengen begitoe Boen He poen djadi dapetken satoe pembantoe jang berharga boeat di medan perang, sebaliknja djanganlah In Soe moesti berkoeatir bakal terdjadinja soeatoe kegagalan atawa apa-apa jang tiada enak di blakang hari."
„Sesoeda Lian Heng bilang begitoe, tentoe djoega tiada ada kegagalan jang bakal terdjadi di hari kemoedian," achirnja Beng Tong membilang, „baeklah, Lian Heng boleh poelang doeloe, besok pagi He Khoa tentoe tjoba berkerdja sebrapa bisa, soepaja ini pengharepan sampe bisa terkaboel."
„Sedemikian roepa In Soe telah melimpaken boedi atas poendak Boen He, tentoelah aken tiada diloepaken boeat selama-lamanja," kata lagi Siauw Hoe dengen hatoerken trima kasinja, „sekalipoen moesti mendjadi sebagi saekor koeda, Boen He pasti aken lakonin djoega asal bisa membales boedi In Soe barang sedikit."
,,Semoea toch meloeloe ada boeat goenanja persobatan," berkata Beng Tong „perloe apa moesti dibitjaraken tentang hal pembalesan."
Kemoedian Ong Siauw Hoe lantas berpamitan dan balik poelang ka Kong Koan, sambil membilang pada Him Hauw dengen memoedji-moedji katanja:
„Lee In Soe soenggoe ada orang jang amat dermawan dan boediman, djarang sekali bisa ditjari kadoeanja poela di doenia."
Samenatara, itoe Beng Tong djoega telah balik masoek ka dalem seperginja Ong Siauw Hoe, di mana So Hoa soeda menjamboet jang membilang katanja:
„Baroesan akoe poen soeda mentjoeri denger seantero pembitjaraän, tapi kaloe baginda masi djoega tiada hendak mengaboelken, begimana moest iberboeat?"
„Boeat goenanja oeroesan dari mertoea prempoean," djawab Beng Tong, „besok akoe aken berlakoe mati-matian boeat madjoeken voorstel, sampe baginda maoe keboelken itoe permintaän, baroelah rasa hatikoe bisa merasa poeas."
Besok paginja seperti biasa, Beng Tong telah dateng di keradjaän, di mana Ong Siauw Hoe keliatan lebi doeloe soeda menoenggoe, sedeng tiada lama kemoedian Lauw Tjiat djoega ada dateng ka sitoe.
Djam lima precies. baginda Seng Tjong soeda berdoedoek di kedoedoekannja dan sekalian mantri-mantri beroentoen-roentoen telah masoek mengadep, sesoedanja pada mendjalanken kehormatan semoestinja, laloe berdiri baris di masing-masing poenja kalangan.
Itoe tempo, pembesar Tjip Tian Khoa telah madjoe ka depan, menjampeken firman baginda dan oedjarnja :
„Bahoea sekalian mantri, kaloe ada oeroesan bolehlah sigra madjoe merapportken, sebaliknja kaloe tiada ada apa-apa aken gra ini persidangan diboebarken." Baroe sadja habis ini oetjapan, Beng Tong lantas keloear dari tempatnja, madjoe berloetoet di hadepan sri-baginda, sembari oedjarnja :
„Sin ada poenja satoe hal jang hendak dirapportken!"
„Baeklah," bersabda Seng Tong, „dan Keng boleh bangoen serta toetoerken apa adanja itoe oeroesan?"
Beng Tong bangoen dari berloetoetnja dan berdiri di satoe samping, kemoedian membilang katanja:
„Sin soeda mendapet kabar jang memastiken, bahoea San Tong. Tjoei Taij San ampoenja kapala brandal, Wie Jong Tat, sesoenggoenja ada saorang moeda jang gaga-perkasa dan berbatin moelia. Dia meloeloe merampas miliknja segala pembesar seraka dan ambtenaar negri jang doerdjana serta orang-orang hartawan jang kedji. Sama sekali tiada perna mengganggoe pendoedoek negri jang baek. Pertama dia soeda merampas Hong Hoe Keng poenja anak-bini, tapi adalah dikasi tinggal dengen baek di atas goenoeng, begitoe djoega kemoedian setelah tawan Lauw Kok Koe, ada diperlakoeken dengen sepantesnja. Dengen apa, dia pikir kapan soeda menaloek atawa beroleh kebebasan dari Pihe, dia aken berdaja sebisanja boeat diriken sedikit pahala, agar bisa menoendjoekin pri-kesetiaännja. Dari itoe, hareplah Pihe soeka mengeloearken firman membri kebebasan padanja dan trima dia poenja menaloek, serta lebi djaoe perkenanken dia ikoet madjoe di peprangan, soepaja kemoedian bisa perolehken pahala aken meneboes kedosaännja. Demikian poen Hong Hoe Keng poenja poetri, Tiang Hoa, mengarti dalem ilmoe peprangan, biarlah dia djoega dibri idzin boeat boleh toeroet perang sama-sama, soepaja dapet manjoekoepin itoe kewadjiban tentang pri - kesetiaän dan keberbaktian Lagi sakali, Sin moehoen atas Pihe poenja kemoerahan hati, soedilah mengasi kesempetan aken marika itoe bisa perbaekin kedosaännja dengen mengaboelken dan trima baek Sin poenja voorstel ini."
Mendenger ini pembitjaraän, baginda Seng Tjong djadi ketawa seraja bersabda:
„Oh, ja, Lee Sianseng. Tim soeda taoe sampe baek. Inilah tentoe ada dari permintaännja Kwi Boen He, aken tetapi, begimana djoega ini oeroesan Tim merasa soeker sekali bisa dikaboelken." Adapoen dalem hatinja sri - baginda jang senantiasa ada bertrima kasi bagi Beng Tong poenja pertoeloengan jang soeda menjemboeken Thaij Houw dari soeatoe penjakit amat heibat, lagipoen ia soeda perhatiken dan selidikin dengen betoel bahoea itoe mantri moeda sesoenggoenja ada berhati doedjoer, setia dan berpikiran loeas, membikin iapoenja perindahan pada Beng Tong djadi semingkin besar, maka itoe sekarang baginda maoe keloearken ini perkataän memaen.
Tapi Beng Tong apabila soeda mendenger baginda poenja oetjapan, ia lantas berloetoet poela di djoebin, seraja berkata:
,,Sin boekannja soeda melakoeken Ong Siauw Hoe poenja permintaän, hanja sebetoelnja telah mendapet kepastian jang Wie Jong Tat boekan ada itoe kapala brandal sebegimana kebanjakan orang dari itoe golongan. Dan lagi ada satoe moestail bahoea Hong Hoe Keng maoe menaloek pada Tiauw Sian, melaenken ini soeda terdjadi dari penjerepan jang koerang terang di moeka aer. Dari itoe, Sin rasa tiada ada djahatnja aken kasi kesempetan pada Wie Jong Tat, serta Hong Hoe Tiang Hoa mentjari pahala boeat meneboes kedosaännja. Laen dari itoe sama sekali Sin tiada mengandoeng maksoed soeatoe apa. Begitoe djoega sedari Sin keloear memangkoe djabatan negri, bersama Gak Hoe telah adaken persoempahan jang selama lamanja tiada aken menerima orang poenja bingkisan maoepoen pembrian jang beroepa oewang dan harta - kekajaän, begimanalah sekarang dengen gampang maoe berboeat apa-apa tjoema dari permintaännja satoe orang, aken membikin oeroesan negri mendjadi kepiran. Maka itoe, dengen pengharepan sepenoenja biarlah Pihe tiada bertjoeriga hati sampe begitoe djaoe."
Seng Tjong menitah aken Lee Koen Giok boleh bangoen berdiri, serta panggil ia dateng lebi deket dan kemoedian membri inget katanja:
,,Ja, Keng toch ada saorang jang berpengliatan loeas dan pikiran pandjang, boeat segala hal tentoe bisa berpikir sampe baek. Di taon-taon jang berselang San Tong Soen Boe membri rapportan djelas, bahoea Hong Hoe Keng bersama iapoenja Sian Hong telah menaloek moesoe, serta kabarnja hendak mendjadi Tiauw Sian poenja pengoendjoek djalan boeat balik memoekoel Teng Tjioe. Samentara sekarang ini Hong Hoe Keng poenja poetri jang soeda bertempat di Tjoei Taij San sekean lama, sedeng Wie Jong Tat masi beroesia amat moeda, beroman tjakep dan gaga, siapa maoe pertjaja kapan marika itoe, oepama kajoe kering deket dengen api tiada nanti menjala, atawa tiada ada terdjadi itoe perhoeboengan gelap antara lelaki dan prempoean. Seande bener-bener ada terdjadi ini perboeatan, sedeng Hong Hoe Keng betoel-betoel soeda menaloek pada moesoe, maka dengen diperkenanken Wie Jong Tat bersama Hong Hoe Tiang Hoa ikoet perang, tiadakah haroes dikoeatirken marika itoe nanti bisa berbalik hati atawa lakoeken pembrontakan dan ini tentoe berarti djoega kemoesnaän bagi pasoekan kita seanteronja. Apa poela Wie Jong Tat itoe jang soeda tjeboerken dirinja dalem kalangan penjamoen, sedikit - banjak dia tentoe ketoelaran tabeat boeas sebegimana ada pada sekean banjak kawanan begitoe, hingga diapoenja kesetiaän dan ketoeloesan hati soeker diandelken, maka begimanalah boleh setjara gampang memake padanja? Lee Keng, tjobalah pikir lagi sakali dengen semateng-matengnja.”
„Maskipoen bener Pihe poenja pengliatan ada beralesan,” berkata lagi Beng Tong sembari mendjoera, „sebaliknja Sin ada berpendapetan laen, kerna menginget aken deradjatnja Hong Hoe Keng, jang toeroen - menoeroen selaloe memegang betoel nama kehormatan familienja, tiada bisa disangkal lagi diapoenja anak - bini tentoe tjoekoep mengarti aken segala pri-kesopanan dan kebedjikan, serta mengenal betoel wateknja sesoeatoe orang prempoean. Diapoenja poetra telah mendapet kabar lebi siang soeda lari minggat, itoelah meloeloe mengandoeng maksoed aken djangan sampe toeroenan familienja djadi terpoetoes, tambahan ada harepan boeat di blakang hari begitoe dapet koetika. baek, lantas bisa berdaja aken menjoetji bersi panasarannja sang ajah. Samentara anak prempoean dan istrinja Hong Hoe Keng, maski dapet kabar lebi doeloe, toch dengen anteng marika menoenggoe datengnja oetoesan, serta ridlah hati pasang dirinja boeat trima segala hoekoeman, itoelah bisa dibilang memboeang djiwa boeat membela kehormatan nama, tjara begimana boleh ditoedoeh bahoea marika maoe lakoeken itoe perboeatan hina dan menodaken. Sedeng djika hendak membitjaraken prihal diaorang poenja berdiam di antara sarangnja kaoem penjamoen, bisa didoega jang itoe Wie Jong Tat sedikitnja tentoe ada mendjadi marikapoenja sanak maoepoen kadang, hingga di sana marika tentoe diperlakoeken menoeroet kepantesan. Lebi djaoe tentang Lauw Kok Koe jang telah kena ditawan, marika tiada brani bikin binasa, itoelah boleh djadi tjoema ditahan sadja atawa boeat goenanja di blakang hari djadiken boekti aken menerangken panasarannja familie Hong Hoe Menginget aken ini semoea, maka dengen keridlahan hati, Sin menanggoeng dengen hoekoeman boenoe seroema tangga, seande poetrinja Hong Hoe Keng dan Wie Jong Tat setelah diperkenanken ikoet perang bersama-sama, tapi lantas berbalik hati dan brontak. Oh, Pihe, memang ada mendjadi Sin poenja kejakinan aken senantiasa berichtiar mentjari orang-orang pande boeat goenanja negri, begitoepoen tiada tega aken tinggal memandeng sesoeatoe orang bidjaksana moesti hadepin perlakoean jang tiada adil, dari itoe kepaksa Sin berlakoe bantahan dengen tiada bosen banjak bitjara.”
Baroe sadja Beng Tong habis berkata-kata, keliatanlah Goan Seng Houw, Lauw Tjiat keloear dari tempatnja madjoe mengadep di hadepan sri-baginda dan oedjarnja: Memang Lee Peng Po ampoenja pengliatan selaloe tiada perna kliroe, apalagi sekarang telah membri tanggoengan dengen djiwa seroema tangganja, hingga bisa dipertjaja W'ie Jong Tat serta laen - laennja tiada sampe terdjadi ada poenja hati berchianat; maka biarlah Pihe djangan sampe bersangsi lagi boeat mengeloearken firman membri kebebasan pada Tjoei Taij San, sambil idzinken marika boleh ikoet perang. Dengen begitoe. Sin poenja anak, Ke Pek, bisa djoega lantas balik poelang kemari. Inilah djadi bisa dibilang dengen satoe gerakan kedoea-doea fihak beroleh kebaekan.”
Mendenger begini, dengen berpaling pada Lee Beng Tong, baginda bersabda poela:
„Ja, Keng djoega meloeloe madjoeken orang-orang pande boeat goenanja negri, men- djadi tiada ada alesan aken Tim moesti mempersalaken Keng poenja diri, sekalipoen taro kata, Wie Jong Tat sekalian betoel - betoel kemoedian berchianat pada negri. Baeklab, ini voorstelan Tim trima perbaek zonder wadjibken Keng moesti menanggoeng risiconja!"
Berbareng sehabisnja oetjapken ini perkataän, baginda keloearken titah soepaja ambtenaar bagian Peng Po boleh lantas mengatoer itoe firman, mengandjoer Tjoei Taij San menaloek dengen perdjandjian marika marika terbebas dari segala kedosaännja jang soeda-soeda; begitoe djoega berbareng itoe Jong Tat diwadjibken membawa pasoekannja sendiri sebagi Joe Sian Hong.
Sedeng Hek Eng Lam jang tadinja diangkat ka itoe djabatan Joe Sian Hong, sekarang diganti mendjadi Joe Ek Khoa, begitoe poen Ong Hauw diangkat djadi Tjo Wie Khoa. Dan Hong Hoe Keng poenja poetri Hong Hoe Tiang Hoa dikoerniaken gelaran Tjeng Kok Hauw Lie, serta diperkenanken djoega boleh mengikoet madjoe di peprangan. Lebi djaoe, dalem firman aken diwadjibken Lauw Ke Pek boleh diantar poelang ka kota radja.
Tapi koetika Beng Tong mendenger ini seboetan Lauw Ke Pek boleh poelang ka kota radja, dalem hatinja timboel pengrasaän koerang seneng, sigra djoega ia madjoe ka depan dan berkata pada Lauw Tjiat:
„Kok Thio poenja pendapetan ternjata ada sedikit kliroe, Lauw Kok Koe trima titah boeat membasmi brandal, tapi sebagi satoe kapala perang berbalik sampe kena ditawan oleh itoe kawanan penjamoen, itoelah djadi berarti ada satoe kedosaän. Maka sekarang menoeroet pantes wadjib sekali dititah aken Wie Jong Tat boleh bawa Lauw Ke Pek sama-sama ikoet dalem barisan boeat madjoe perang, dari mana kemoedian diharep bisa berdiriken pahala aken meneboes kedosaän- nja, atawa sesoeda balik poelang kemari, menoeroet djasanja bisa djoega mendapet kenaekan pangkat. Tiadakah begini ada jang paling baek?'
Mendenger perkataännja Beng Tong ini, baginda djadi amat girang, seraja membilang pada Lauw Tjiat :
„Lee Koen Giok ampoenja perbilangan, sesoenggoenja ada betoel sekali.”
Berbareng itoe, baginda titah Ong Siauw Hoe dateng di hadepannja, pada siapa, Seng Tjong membri pesenan katanja:
„Lauw Ke Pek sekarang aken ditaro di bawah Keng poenja koeasa boeat ikoet perang bersama-sama soepaja dia djoega bisa mendiriken sedikit pahala.”
Ong Siauw Hoe trima baek itoe titah, sembari moendoer poela ka tempatnja. Dan tiada lama kemoedian, pembesar bagian Peng Po soeda menoelis beres itoe soerat panggil- menaloek serta persembahken ka hadepan sri-baginda, jang setelah memereksa satoe persatoe, sigra djoega taro tjap-keradjaän di atasnja. Laloe kemoedian dengen tiada memboeang tempo lagi, baginda oetoes pembesar Ho Po Tjoe Soe bernama Giauw Hong Eng bawa ini firman dan lantas brangkat ka Tjoei Taij San.
Ini Giauw Hong Eng, ada saorang jang telah beroesia lebi dari ampatpoeloe taon, mempoenjai pikiran pandjang dan selaloe berati-ati dalem segala perkerdjaännja. Boeat melakoeken ini titah, satoe kekoeatiran lebi siang soeda bersemi di hatinja, tapi kerna itoe ada atas titahnja sri-baginda, apabolehboeat ia trima djoega seraja berlaloe dari kraton.
Samentara Lauw Tjiat itoe tempo telah merasa girang dalem hatinja, lantaran menginget sang poetra bakal bisa lekas terlepas dari koeroengannja. Sedeng tempo persidangan soeda ditoetoep, boeroe - boeroe ia dateng di loear pintoe Ngo Boen, paranin Siauw Hoe dan djabat tangan orang meminta dan memoehoen katanja:
„Bahoea anakkoe jang koerang pengartian dan aleman, apabila soeda mengikoet Goan Hiong madjoe di peprangan, soekalah toeloeng dikasi kelonggaran, kemoedian kapan telah balik poelang kemari dengen perolehken sedikit pahala, Lo Hoe tentoe bisa pikir tjara begimana boeat membales orang poenja boedi.”
Dalem hatinja Siauw Hoe boekan maen poenja merasa getoen, kerna pikir ini toeabangka telah keniaja hingga ia seroema- tangga djadi tertjere bere dengen alamin boekan sedikit kesengsaraän, tapi sekarang berbalik hendak minta ia toeloeng liat-liatin sang poetra Oh, begimanalah ia nanti aken merasaï djikaloesaling bertoekar kedoedoekan? Tetapi Siauw Hoe tiada maoe boeroe-boeroe oendjoekin panasarannja, malah setjara terpaksa ia poen mendjawab djoega katanja: „Kok Koe mengikoet perang, soeda tentoe He Khoa nanti perlakoeken lebi baek dari- pada laen - laennja, inilah Kok Thio boleh traoesa koeatirken.”
Lauw Tjiat atoerken trima kasi, langsoeng berpisaän satoe sama laen. Ong Siauw Hoe balik poelang ka iapoenja Kong Koan dan ganti pakean kebesarannja. kemoedian doedoek beromong-omong dengen Him Hauw, sambil menoetoerken halnja Lee Bong Tong soeda bantoe madjoeken voorstel dengen menanggoeng sama djiwa dari seisi roema-tangganja, baroelah baginda maoe mengaboelken permoehoenan boeat panggil menaloek pada Tjoei Taij San. Tetapi Lauw Tjiat ada berpengaroeh amat besar, sedeng Ke Pek sendiri telah kenalin dirinja, maka djikaloe ia itoe moesti toeroet perang bersama-sama, haroeslah dikoeatirken bagi bintjana jang bakal terbit di laen hari Inilah sebabnja membikin Siauw Hoe merasa sedikit soesah dan tiada taoe begimana nanti moesti berboeat.
Selagi marika beromong-omong, sala satoe orangnja telah masoek merapport tentang kedatengannja Giauw Tjoe Soe, jang minta berdjoempa kerna ada soeatoe oeroesan penting jang hendak dibitjaraken berdepan dengen Ong Goan Swee.
Siauw Hoe poen tjepet keloear menjamboet, silahken itoe Tjoe Soe masoek ka dalem, setelah saling membri hormat laloe pada berdoedoek dalem tjara sebagi tetamoe dengen toean roema, atawa sesoedanja minoem setjangkir thee, Giauw Tjoe Soe ke- dengeran moelai berkata:
„He Khoa trima titah hendak pergi panggil menaloek Tjoei Taij San, tetapi, amat berkoeatir bahoea Wie Jong Tat itoe sebagi satoe kapala brandal, hatinja dan perboeatannja soeker ditaksir, hingga He Khoa poenja pergi ini bisa disangsiken lebi banjak bahaja daripada keslametan, maka itoe soeda dateng kemari boeat minta Goan Hiong poenja pertimbangan dan pengoendjoekan jang baek.”
„Ha,” berkata Siauw Hoe dengen sedikit kaget dan roepa keheranan, ini hal boekankah djoega ada dari He Khoa ampoenja voorstelan, maka kaloe Lo Taijdjin sampe hadepin bintjana apa-apa, He Khoa tentoe moesti menanggoeng dosanja. Ini sebab Lo Taijdjin boleh traoesa berslempang soeatoe apa, tanggoeng Taijdjin ampoenja keslametan bakal tiada terganggoe biarpoen seoedjoeng ramboet djoea.”
Maskipoen begitoe," berkata lagi Giauw Tjoe Soe, toch He Khoa ampoenja kekoeatiran masi tiada bisa linjap, kaloe Goan Hiong tiada kirim soerat ka sana boeat membri inget padanja.”
„Lo Taijdjin poenja pendapetan djoega betoel sekali,” mendjawab Siauw Hoe, „baeklah, He Khoa aken lekas mengirim sepoetjoek soerat ka sana, soepaja Lo Taijdjin bisa berseneng hati dan tiada hadepin bintjana apa-apa.”
Giauw Tjoe Soe oetjapken trima kasi seraja kemoedian berpamitan dari Siauw Hoe dan langsoeng brangkat poelang ka tempatnja. Samentara itoe, kitapoenja anak moeda setelah itoe Tjoe Soe soeda berlaloe, tiada lama berselang ia poen telah menoenggang koedanja, menoedjoe gedongnja Nio Siang boeat hatoerken trima kasinja pada Lee Peng Po.“
Adapoen Lee Beng Tong koetika telah sampe di gedongnja dari poelang bersidang di kraton, ia dapetken Nio Siang lebi doeloe soeda berada di sitoe, serta lagi doedoek beromong-omong dengen Keng Hoedjin dan So Hoa prihal oeroesan roema tangga; maka setelah membri hormat sebegimana biasa, Beng Tong toeroet berdoedoek di satoe samping.
„Pepata doeloe ada bilang: Kenal manoesia kenal moekanja, tiada kenal hatinja,“ begitoelah menjomel Nio Siang pada sang mantoe, „Wie Jong Tat soeda lama tjeboerken dirinja dalem kalangan kawanan penjamoen, hatinja soeker bisa dibade, tapi kaoe sebaliknja dengen gampang sadja maoe menanggoeng padanja dengen djiwa seroematangga. Seande nanti sampe terdjadi apa-apa jang koerang baek, bintjana bagi dirimoe boekan ketjil. Lagipoen Hong Hoe Keng poenja anak - bini berserta itoe Wie Jong Tat, sama kaoe boekan sanak dan boekan kadang, kaloe perkara kemoedian mendjadi terbalik, nistjaja kaoe aken sia-siaken djiwa seroema-tangga“
„Lantaran Siauw Saij soeda sel dikin dengen betoel, bahoea Wie Jong Tat bersama poetrinja Hong Hoe Keng, sesoenggoenja ada mempoenjai hati setia boeat membela negri, dari itoe Siauw Saij brani menanggoeng begitoe, lebi djaoe Siauw Saij maoe pertjaja bahoea di blakang hari tiada nanti bisa terdjadi hal-hal jang koerang baek.”
„Biarpoen betoel marika tiada sampe berbalik pikiran, tapi toch bagi kaoe tiada aken djadi begitoe bergoena,” berkata lagi Nio Siang, „laen kali, biarlah kaoe tiada lagi berlakoe begitoe gegaba.”
Beng Tong memanggoet dalem, seperti menandaken ia trima baek pesenannja itoe mertoea, sedeng tiada lama kemoedian, Beng Tong dengen So Hoa lantas minta permisi balik poelang dalem kamarnja sendiri.
„Kenapa ajah baroesan soeda gegerin kaoe sampe begitoe roepa?” tanja So Hoa apabila iaorang soeda berada dalem kamarnja. Lee Beng Tong poen lantas menoetoerken prihal ia dengen berkeras membri tanggoengan boeat kemerdikaän goenoeng Tjoei Taij San.
„Ja,” achirnja ia landjoetken perkataännja. „ajahmoe masa bisa mengetahoei ini hal jang akoe telah berkerdja meloeloe boeat goenanja oeroesan dari mertoea prempoeankoe, dari itoe dia soeda tjomelin dirikoe soeka terlaloe tjampoer taoe dalem laen orang poenja perkara.”
„Memang Siotjia poenja kejakinan haroes dipoedji,” berkata So Hoa.
Dalem begitoe tiba-tiba kelian saorang boedak prempoean telah masoek merapport katanja:
„Ong Goan Swee lagi menoenggoe di loear dan hendak minta berdjoempa.”
„Kebetoelan sekali dia soeda dateng,” berkata Beng Tong pada So Hoa, „memang akoe ada sedikit bitjara jang perloe membri inget padanja.”
Kemoedian dengen lekas Beng Tong lantas keloear dateng di roeangan pertengahan, titah orang-orangnja aken sigra memboeka pintoe besar boeat silahken Siauw Hoe masoek bertemoe, lebi djaoe poen membri pesenan aken semoea orangnja boleh pada menjingkir dari sitoe.
Koetika Siauw Hoe soeda mendjalanken kehormatan sebegimana lajiknja, laloe ia ambil tempat doedoek di samping, sedeng satoe boedjang ketjil telah dateng soegoeken aer thee, jang setelah orang minoem satoe tjangkir, atawa saling beromong tentang soeal jang tiada penting sebegimana djamaknja waktoe orang baroe bertemoean, kemoedian keliatan Ong Siauw Hoe bangoen berdiri dari tempat doedoeknja sembari mengatoerken iapoenja trima kasi boeat boedi pertoeloengannja Beng Tong.
Dan Beng Tong sesoedanja membales itoe oetjapan, laloe ia memesen katanja:
„Biarpoen baroesan baginda soeda keloearken firman Lauw Ke Pek boleh ikoet perang aken mendiriken sedikit pahala, tetapi Ke Pek itoe ada saorang jang berhati boesoek dan kedjem, sekali-kali tiada boleh dipake. Maka Lian Heng haroes terlebi doeloe membri peringetan pada Wie Jong Tat.”
XL.
Ong Goan Swee menjebrang laoetan madjoe perang Him Sian Hong memoedja pedang mendiriken pahala.
Tetekala Ong Siauw Hoe mendenger Beng Tong ampoenja perkataän itoe, ia laloe menanja tentang tjara begimana moesti berboeat?
„Ja, Lauw Ke Pek ada saorang berhati kedjem,” katanja Beng Tong, „kaoe haroes lebi siang membri inget pada Wie Jong Tat, soepaja dia boleh koeroeng sadja dengen rapi Lauw Ke Pek dalem seboeah grobak krangkengan, sebrapa bisa djangan sampe dia itoe dapet meliat sedikit sadja apa-apa jang terdjadi di loear krangkengan dan di bawa dengen tersemboenji betoel di antara pasoekannja. Sedeng kapan toeroen ka moeka aer, boleh disimpen betoel di tenga praoe, sebaliknja boeat diapoenja makan dan pake setiap hari didjaga betoel, djangan sampe ada kekoerangan.”
Adapoen dalem hatinja Ong Siauw Hoe jang sedari tadi merasa amat berkoeatir, kaloe Lauw Ke Pek dikasi lepas tentoé lantas bisa mengetahoei tentang iapoenja resia telah menoekar nama palsoe dan membawa balatentara aken memoekoe! Tiauw Sian. tiada bisa disangkal lagi ia itoe pasti tjari djalan boeat membri rapportan pada Lauw Tjiat, hingga kemoedian kedjadian iaorang aken lebi doeloe mentjari daja boeat bikin iapoenja gerakan djadi gagal. Sebaliknja kapan ia tiada lepasken pada Ke Pek, ia koeatir lagi apabila Lauw Tjiat dapet denger itoe hal, nistjaja aken mengadoe di hadepan sribaginda, hingga dirinja bakal tiada terloepoet dari kedosaän. bikin ia merasa serbasala dan alangkah girangnja setelah sekarang dapet denger Beng Tong poerja nasehat jang memang djoestroe tjotjok betoel dengen apa jang diboeat koeatir olehnja.
„In Soe poenja peringetan ini memang betoel sekali,” kemoedian Siauw Hoe berkata, „tetapi sebaliknja haroes dikoeatirken djoega apabila Kok Thio sampe dapet denger ini perkara, dia tentoe aken mengadoe pada baginda. hingga Boen Seng bakal tiada terloepoet dari kedosaän mempermaenken firman baginda. Begimanalah baeknja?”
„Itoelah Lian Heng boleh traoesa pikirin,” djawab Beng Tong, „kaloe sampe Lauw Kok Thio nanti bikin pengadoean apa-apa, He Khoa sendiri bisa atoer dan bikin perlawanan sehingga kaoe tiada hadepin kegagalan soeatoe apa.”
„Djika In Soe soeda maoe membantoe sampe begitoe roepa,” berkata Siauw Hoe dengen oetjapken trima kasi, „Boen He baroe brani lakoeken itoe tjara dengen leloeasa.”
„Berboeatlah dengen hati besar,” berkata Lee Beng Tong dengen membales trima kasi orang, „segala kedjadian jang bisa menjoesahken padamoe, He Khoa nanti oeroes sampe baek.”
Kemoedian Siauw Hoe laloe berpamitan dan balik poelang ka Kong Koan; pada Him Hauw ia menoetoerken satoe persatoe apa jang baroesan soeda dibitjaraken bersama Beng Tong, sembari ia membilang lebi djaoe:
„Djoestroe Siauw Te sedeng berkoeatir jang Lauw Ke Pek setelah mengetahoei asal-oesoel kita, nistjaja dia nanti aken bisa bikin gagal kitapoenja gerakan apabila dia itoe dilepasken, tetapi sekarang tiada njana In Soe lebi doeloe soeda membri peringetan begitoe, soenggoe inilah bisa dibilang seperti Toehan telah mengaboelken orang poenja kehendakan.”
„Ja,” berkata Him Hauw djoega dengen merasa amat girang, baeklah sekarang Hian Te lantas mengatoer itoe soerat boeat mengasi taoe pada Wie Jong Tat, soepaja oeroesan tiada mendjadi kepiran.”
Ong Siauw Hoe memanggoet, seraja kemoedian dengen ati-ati moelai doedoek menoelis itoe sepoetjoek soerat; dalem mana, antara laen-laen ia seboetken: Bahoea dengen firmannja sri-baginda, Wie Jong Tat diwadjibken selakoe Joe Sian Hong membawa pasoekan dari laskar-laskarnja sendiri, sigra brangkat djalan lebi doeloe dan menoenggoe di kota Teng Tjioe. Sedeng prihal Lauw Ke Pek, boleh dikoeroeng sadja dalem seboeah grobak krangkengan dengen antero tertoetoep rapet dan djaga ati-ati soepaja tiada sampe diketahoei oleh orang loear. Lebi djaoe Wie Jong Tat diperingetin boeat berlakoe manis atawa lakoeken penjamboetan dengen segala kehormatan pada oetoesan baginda jang bakal lekas sampe di itoe goenoeng, agar soepaja kombalinja ia nanti bisa membri pengoendjoekan baek di hadepan sri-baginda, etc etc.
Apabila soeda menoelis beres itoe soerat, Siauw Hoe lantas panggil dateng pada Lie Beng dan Teng Soan, serahken soerat mana pada marika, dengen dikasiken ongkos djalan setjoekoepnja, prenta iaorang aken sigra brangkat selekasnja menoedjoe ka Tjoei Taij San, boeat menjampeken di tangannja Wie Jong Tat sendiri.
Dengen menerima itoe soerat berikoet onkost djalan, zonder berajalan poela Lie Beng dan Teng Soan langsoeng brangkat djalan dengen menoenggang koeda Sang hari berdjalan amat pesat, sebentar sadja soeda sampe pada tanggal 21 Dji-gwee, maka di waktoe masi amat pagi, Ong Siauw Hoe telah masoek ka dalem kraton boeat berpamitan pada baginda Seng Tjong, sedeng sekeloearnja dari kraton teroes ia dateng koendjoengin poela Lee Beng Tong aken membri slamet tinggal.
Dalem pertemoean mana, kombali Beng Tong memesen dengen poma poma katanja:
„Kapan di waktoe beroleh kemenangan, sebisanja haroes mengandjoer boeat moesoe menaloek, djanganlah sekali-kali membinasaken terlaloe banjak djiwa manoesia tjoema tersebab menoeroet napsoe boeat dapetken kepoeasan hati.”
Ong Siauw Hoe berdjandji aken pegang betoel itoe nasehat dan setelah berdoedoek sedikit saät poela, lantas ia berpamitan dan berlaloe dari gedong Nio Siang, langsoeng kombali di Kong Koan; di mana bersama Him Hauw iaorang repot bikin persediaän serta bebena aken di esok pagi membawa balatentara brangkat djalan boeat madjoe perang.
Fadjar dari tanggal 22 Dji-gwee, Ong Siauw Hoe dengen sekalian panglima-panglimanja rata-rata soeda pada berkoempoel di lapangan besar, berikoet djoega itoe 60 000 soldadoe soldadoe. Dan koetika Goan Swee kita sesoedanja lakoeken beres itoe oepatjara sembajang bendera, lebi doeloe ia lantas tjaboet 5000 soldadoe serahken pada Him Hauw, boeat mengepalaken itoe pasoekan brangkat sebagi barisan di moeka, dengen dibri pesenan aken sepandjang djalan lakoeken penilikan keras, soepaja tiada saorang soldadoe djoega brani mengganggoe atawa bikin soesah pada berbagi-bagi pendoedoek.
Setelah menerima itoe titah, dengen membawa iapoenja pasoekan, Him Hauw poen lantas brangkat djalan lebi doeloe, sedeng Ong Goan Swee dengen iapoenja barisan besar dan teriring oleh sekalian panglima-panglimanja, tiada lama berselang djoega soeda meninggalken kota radja menoedjoe ka depan.
Bendera bendera berkibaran oepama menoetoepin matahari, toembak dan golok berdjedjeran sebagi oetan lebat, semoea bala-tentara keliatan begitoe berambekan mirip matjan matjan galak, samentara antero panglima-panglima tertampak barsemangat sebagi naga-naga angker. Sepandjang djaian senantiasa dilakoeken peniliran keras, oendang-oendang barisan selaloe terpegang betoel, hingga ini semoea keadaän tjoekoep mendatengken kesenengan dan kegoembirahan bagi pendoedoek-pendoedoek di mana sadja itoe pasoekan ada melaloeï.
⁂
Sjahdan terseboet Lie Beng dan Teng Soan, jang itoe hari setelah menerima titah dari Ong Siauw Hoe boeat antarken soerat pada Wie Jong Tat, iaorang lantas teroesken perdjalanannja dengen spoed, hingga tiada brapa hari marika poen telah sampe di Tjoei Taij San dan teroes naek ka atas goenoeng, dateng di Tjoe Gie Thia. Di sitoe, iaorang telah djoempaken sang Taij Ong, serta persembahken soerat dari Ong Siauw Hoe. Sedeng Wie Jong Tat apabila soeda membatja habis djadi merasa amat girang, sembari menitah orangnja aken sigra pergi ka pasanggrahan blakang boeat oendang le Sie Hoedjin dan Hong Hoe Sio tjia dateng berkoempoel di Tjoe Gie Thia boeat membitjaraken itoe hal. Sekoetika lama, itoe iboe dan poetri berbareng telah dateng, disamboet dengen hormat oleh kitapoenja Taij Ong, serta kemoedian masing-masing mengambil tempat doedoek selajikoja. Soeda itoe, Wie Jong Tat lantas hoendjoekin soerat dari kota radja, jang membikin itoe iboe dan poetri boekan maen soekatjitanja setelah membatja soerat terseboet.
„Oh, sesoenggoenja tiada sekali disangka jang sri baginda ada poenja hati begitoe moelia dan pemoerah, soeda soeka trima kita menaloek serta idzinken boleh ikoet perang,” begitoelah Hoedjin berkata dengen soeara boenga, „samentara anakkoe poen telah beroentoeng bisa trima anoegrahan sebagi Goan Swee. Ja, inilah ada satoe kemoedjoeran paling besar!”
„Tetapi,” Lie Beng dan Teng Soan berkata dengen ampir berbareng, „toch ini semoea boekan meloeloe ada kemoerahan hatinja sri-baginda, malah lebi betoel haroes dibilang semoea ada mengandel pada pembriannja Lee Peng Po, jang beroelang - oelang dan dengen sanget soeda madjoeken voorstel, sampe baginda keizer maoe keloearken ini firman.”
„Siapakah adanja itoe Lee Peng Po?” menanja le Hoedjin dengen keheranan, „jang soeda oendjoek boedi demikian roepa bagi kitaorang.”
„Lee Peng Po ada bernama Koen Giok, beroesia baroe delapanblas taon, orangnja tjakep dan manis sekali, keloearan dari Sam Goan,” saoetnja Lie Beng, „dan ada mendjadi Joe Tjaij Siang ampoenja mantoe. Lee Peng Po ada saorang bidjaksana jang berhati moerah, boediman dan tiada angkoe, mempoenjai kedjoedjoeran sedjati dan brani oetaraken peroendingan setjara teroes-terang, lagipoen paham betoel dalem ilmoe thabib, jang ternjata pada baroe-baroe ini dia soeda bisa menjemboehken Thaij Houw dari seroepa penjakit sanget berat. Lantaran mana, dengen tjepet dia bisa memangkoe itoe djabatan Peng Po Siang Sie begitoe ada lowongan, dengen dipertjaja dan dindahken betuel oleh sri-baginda."
„Ja, ja, iboe-bapa jang moedjoer dan berredjeki besar, maka bisa mempoenjai poetra begitoe matjem, satoe poedjonggo jang djarang terdapet sekalipoen di abad-abad jang laloe,” demikian achirnja Hoedjin menjataken poedjiannja.
Samentara itoe, Jong Tat soeda keloearken prenta panggil berhimpoen seantero Thauw-bak dari Tjoei Taij San; pada siapa, itoe Taij Ong menoetoerken halnja baginda keizer soeda keloearken firman membri kemerdikaän pada marikapoenja perkoempoelan, maka sekarang wadjiblah sekalian Thauw-bak selekasnja menjampeken ini warta pada masing-masing poenja laskar, membri inget jang moelai ini hari perkoempoelan marika bakal dihapoesken. Maka barang siapa di antara Liauw-lo Liauw-lo jang berniat poelang ka kampoengnja, boleh dikasi poelang dengen dibriken oewang dan barang-barang sekedarnja tjoekoep boeat marika menoentoet pengidoepan setjara halal, berdagang atawa bersawa sederhana oepamanja. Sebaliknja siapa-siapa jang hendak masoek soldadoe dan toeroet perang, boleh sigra merapportken namanja soepaja bisa tertjatet dalem boekoe.
Apabila ini prentahan soeda disiarken, lekas djoega orang dapet kenjataän, dalem sekean banjak laskar - laskar brandal, ampir separo jang minta poelang sadja ka kampoengnja, sedeng jang separo lebi besar kebanjakan soeka ikoet madjoe di medan peprangan. Begitoelah kemoedian sesoeda berselang doea hari, ini semoea keliatan telah berdjalan beres. Tiga hari poela soeda liwat, keliatan saorang djoeroe - kabar telah dateng membri rapportan tentang oetoesan baginda keizer laat-laatnja di hari besok tentoe soeda sampe di ini goenoeng.
Mendenger ini rapportan, Jong Tat lantas prenta aken orangnja sigra mengatoer dan memadjang bebrapa pintoe gerbang di antero sepandjang djalanan dari kaki goenoeng hingga ka atas, sedeng di bagian loear dan dalem dari Tjoe Gie Thia traoeroeng dirias indah dengen berbagi-bagi kaen mera berikoet tengloleng warna-warni. Begitoe djoega tiada loepa dibikin persediaän lebi siang boeat satoe pesta perdjamoean loear biasa. Agaknja orang hendak atoer sebrapa bisa ini tjara meroepaken soeatoe penjamboetan speciaal bagi kehormatannja itoe oetoesan dari sri-baginda keizer Seng Tjong.
Melaenken Sian Ang sendiri jang mempoenjai dendeman hati dengki dan chianat. Diam-diam ia soeda ambil poetoesan dalem hatinja, bahoea besok kapan ia pergi keloear berdjoempa dengen sang oetoesan, sewaktoe orang hendak bikin persediaän apa-apa, ia nanti lakoeken pengamoekan mendadak sampe terbinasanja itoe oetoesan, soepaja dengen begitoe Jong Tat poenja penaloekan djadi terhalang dan bersama siapa serta laen-laen Liauw-lo, iaorang bisa bertjokol teroes di atas goenoeng, toentoet selamanja itoe pengidoepan sebagi kawanan penjamoen jang berat dilepasken.
Begitoelah pada besoknja hari, Sian Ang telah membekel sebilah piso tadjem di badannja; samentara le Hoedjin dengen poetrinja ada doedoek berkoempoel di roeangan Tjoe Gie Thia.
Sebelon sampe tengahari, keliatan Liauw-lo telah dateng merapport bahoea oetoesan dari baginda keizer soeda ampir sampe deket perwatesan goenoeng Tjoei Taij San. Maka Wie Jong Tat dengen membawa ia-poenja soedara moeda Jong Pioe, serta sepoeloe orang Thauw-bak, sama-sama toeroen ka bawah goenoeng, sedeng koetika marika sampe di moeloet djalanan, kebetoelan Giauw Hong Eng poen djoestroe tiba di sitoe.
Jong Tat bersama sekalian orangnja lantas pada djatoken diri berloetoet di tana boeat menjamboet, samentara Giauw Tjoe Soe jang senantiasa mengandoeng perasaän takoet, boeroe - boeroe lompat toeroen dari toenggangannja sembari angkat bangoenin sekalian orang itoe dan berkata dengen soeara lemah-lemboet: „Baeklah nanti sadja dibatjaken firman sri-baginda sasoeda kitaorang berada di atas goenoeng.”
Jong Tat poen laloe silahken sang oetoesan menoenggang poela koedanja, sedeng ia sendiri bersama orang-orangnja mengikoet dari blakang bersama-sama menoedjoe ka atas goenoeng.
Adapoen Giauw Tjoe Soe maski soeda liat Wie Jong tat ada saorang moeda beroman tjakep dan mempoenjai boedi basa jang aloes, tetapi iapoenja pengikoet-pengikoet traoeroeng kebanjakan ada beroman bengis, djahat dan menakoetin, tiadalah heran kapan di sepandjang djalan dan saben waktoe ia selaloe mendjaga-djaga dengen ati-ati.
Tatkala iaorang dateng sampe di deket Tjoe Gie Thia, keliatanlah Ie Sie bersama anak prempoeannja ada menjamboet dengen berloetoet di depan pintoe sembari mengoetjap dengen soeara njaring:
„Prempoean jang berdosa, Hong Hoe Keng poenja bini, Ie Sie, membawa anak prempoeannja, Tiang Hoa, menjamboet Seng Tji. Moehoen beriboe ampoen atas kelambatan bolehnja dateng menjamboet!”
Giauw Tjoe Soe dari atas koeda membongkokin badannja, membales hormat sembari membilang:
„Hareplah Hoedjin dan Siotjia boleh sigra bangoen, nanti kaloe soeda berada di pertengahan Tjoe Gie Thia, baroe Seng Tji diboeka batja, dari itoe biarlah Hoedjin dan Siotjia boleh menoenggoe di sana.”
Berbareng oetjapken ini perkataän, sang oetoesan lantas toeroen dari koedanja dan bertindak masoek ka dalem Thia, di mana ia moelai boeka itoe boengkoesan jang berisi firman baginda; sedeng Wie Jong Pioe bersama sekalian Thauw-bak mengatoer beres medja sembajang Maka tertampak Ie Sie berloetoet di depan. Taij Ong kita dan Tiang Hoa Siotjia ada berloetoet di sebela blakang, sama-sama menoenggoe dibatjaken itoe firman.
Apabila Seng Tji soeda terbatja habis, semoea orang laloe pada mengatoerken trima kasi atas boedinja sri-baginda.
Sesoeda itoe, dengen soeara pelahan Ie Hoedjin memesen pada Jong Tat soepaja melajanin dengan tjara hormat dan ati-ati pada itoe oetoesan, sambil kemoedian dengen mengadep Giauw Tjoe Soe, Hoedjin membilang lagi:
„Harep Taij Djin amoenja maäf, djikaloe prempoean berdosa bersama anaknja terpaksa meninggalken ini tempat.”
„Ja,” saoet Giauw Tjoe Soe, „Hoedjin dan Siotjia memang pantes lantas moedoer dari sini, serta tiada perloe moesti tjapeken hati.”
Demikianlah le Sie bersama Tiang Hoa keliatan telah berdjalan masoek ka dalem dan teroes dateng di pasanggrahan blakang. Samentara sang oetoesan ada disilahken ber- doedoek pada kedoedoekan jang tertinggi, dengen ditemenin oleh Taij Ong kita jang mengambil tempat doedoek di pinggir, pada mana orang telah soegoeken aer thee. Tiada antara lama, medja perdjamoean poen soeda di sediaken rampoeng, maka orang lantas pinda berdoedoek boeat mengadepin medja perhidangan terseboet. Dan tentoe sadja Giauw Tjoe Soe disilahken berdoedoek di kapala medja, Jong Tat mengambil tempat di sebela kiri dan Jong Pioe mengapit dari kanan, sedeng sekalian Thauw-bak ambil bagian sebela bawah.
Samentara Giauw Tjoe Soe poenja bilang blas pengikoet dan pengiring djoega tiada ketinggalan telah disediaken laen medja perhidangan, jang diladenin oleh bebrapa banjak laskar-laskar brandal. Di mana orang moelai makan dan minoem dengen goembira.
Tetapi biarpoen begitoe, toch Giauw Tjoe Soe masi tiada bisa linjapken iapoenja pengrasaän koeatir, tiada satoe saät djoega ia liwatken zonder membikin pendjagaän; ia-poenja mata selaloe mengawasin dengen titi sekali atas sesoeatoe gerakan dari orang-orang jang berada di sekiternja.
Tempo soeda makan dan minoem sekoetika lamanja, Giauw Tjoe Soe lantas sadja hendak meninggalin itoe medja perdjamoean, tetapi dengen hormat dan sanget, Jong Tat bersama Jong Pioe berikoet sekalian Thauw bak, menjega dan menahan boeat orang maoe doedoek makan minoem sampe sepoeas poeasnja.
Giauw Tjoe Soe jang tiada dapet alesan boeat selaloe menampik orang poenja permintaän, kedjadian kombali ia berdoedoek teroes sembari landjoetken itoe makan-minoem. Kombali Jong Tat pertama - tama soeda menjoegoeken setjangkir arak di hadepannja sang oetoesan, samentara Sian Ang dalem tempo begitoe, adalah soeda berpikir dalem hatinja seraja berkata sendirian :
„Kalpe ini waktoe tiada lantas toeroenin tangan, maoe toenggoe sampe kapan lagi?” Begitoelah ia lantas bangoen berdiri dari tempat doedoeknja, toeang setjangkir arak, dengen belaga berlakoe hormat ia madjoe ka depan, sembari berkata:
Hamba djoega dateng membri hormat dengen setjangkir arak!”
Giauw Tjoe Soe jang sedari bermoela doedoek makan - minoem. tiada satoe saät djorga lepasken intjerannja pada sesoeatoe orang jang ada doedɔek bersama-sama ampoenja gerakan, maka ia poen soeda bisa dapet pandeng Sian Ang poenja aermoeka jang ada mengandoeng sorot dari napsoe memboenoe, serta saben-saben telah mengawasin dirinja sedari pertama berdoedoek, hingga dalem hatinja Tjoe Soe tiada dapet-tiada soeda bersemi seroepa pengrasaän bertjoeriga atas segala gerakannja itoe Thauw-bak. Demikian tatkala meliat Sian Ang dateng menjoegoeken arak, tentoe sadja ia berdjaga-djaga dengen awas betoel betoel. Ia bangoen berdiri boeat menjamboet itoe tjangkir arak, tapi sebelon sempet orang menjamboet, Sian Ang sceda djatoken itoe tjangkir di atas tana, hingga djadi petja berarakan, berbareng dengen tangan kanannja ia menarik orang poenja lengan badjoe, sedeng tangan kirinja ia keloearken dari pinggangnja, itoe piso pendek jang mengkilap langsoeng menerdjang ka arah dadanja sang oetoesan.
Dengen keloearken seantero tenaganja, Giauw Tjoe Soe brontak dan lepasken dirinja dari pegangan orang serta lari menjingkir setjepetnja.
„Maoe lari ka mana?” Sian Ang membentak sembari lompatin medja dan memboeroe pada Giauw Tjoe Soe
Meliat ini keadaän, alangkah terkedjoetnja itoe sekalian Thauw bak, sedeng itoe ada terdjadi dalem tempo begitoe pendek, hingga maoe menoeloeng poen rasanja soeda terlaloe kasep; terlebi poela Wie Jong Tat ampoenja kaget, boeat sesaät ia rasaken semangatnja seperti melajang - lajang, tapi ia lekas bisa koempoelin poela ingetannja. Dengen tjepet ia lompat melangkahin medja dan bener djoega atas kegesitannja, dalem sekedjapan sadja ia soeda berada di blakangnja Sian Ang, menarik sekerasnja itoe Thauw-bak poenja pakean di bagian poendak, berbareng membanting badan orang dengen keras, hingga membikin Sian Ang djadi djato tjelentang di atas tana, sedeng pisonja poen terlempar di satoe samping.
Zonder memboeang tempo poela, Taij Ong kita lantas toempangin kakinja begitoe roepa di atas dada orang, berbareng ia laloe tjaboet pedangnja, memboenoe mati pada Sian Ang itoe, kemoedian ia madjoe noentoen pada Giauw Tjoe Soe, sembari menghiboer katanja:
„Djanganlah Taijdjin merasa takoet poela, liat, Sian Ang sekarang toch soeda terboenoe mati."
Giauw Tjoe Soe itoe tempo soeda djadi begitoe kaget, sampe selebar moekanja beroba poetjet sebagi mait, dengen masi berdebar-debar ia membales hormat katanja:
„Heran sekali, He Khoa dateng kemari toch ada atas titahnja baginda, tapi kenapa ini orang soeda maoe memboenoe padakoe?"
Jong Tat lebi doeloe membri prenta pada Liauw-lonja aken sigra bawa maitnja Sian Ang dan koeboer di goenoeng blakang, baroelah ia silahken sang oetoesan berdoedoek poela, seraja membilang:
„Ja, Siauw Tjiang sekarang mengarti, itoe Sian Ang tentoenja lantaran tiada soeka menaloek, maka dia soeda maoe membikin tjilaka pada Taijdjin, agar soepaja Siauw Tjiang poen djadi gagal boeat menaloek. Tetapi sekarang Siauw Tjiang telah membri hoekoeman sepantesnja pada itoe orang, biarlah. Taijdjin djangan berkoeatir dan menjimpen sjak hati poela."
Giauw Tjoe Soe baroe mengarti doedoeknja hal setelah mendapet itoe ketrangan, tapi dalem hatinja traoeroeng telah berpikir djoega, bahoea maskipoen bener Wie Jong Tat ternjata bersoenggoe-soenggoe hati boeat menaloek, tapi iapoenja orang sebawahan ada banjak, sedeng hati dan boedi-pekerti masing-masing tiada bisa didjadjakin, siapa taoe kaloe mendadak nanti bisa terdjadi poela sebegimana apa jang baroesan telah kedjadian dengen Sian Ang itoe, atawa di tenga malem zonder terdoega terbit pembrontakan, dengen begitoe djiwanja pasti djadi sanget terantjem, maka ada lebi slamet kapan ia selekasnja berlaloe dari ini tempat.
Berpikir begitoe, ia sigra bangoen berdiri seraja berpamitan katanja:
„Kendati betoel Tjiang Koen sendiri ada berlakoe begitoe baek hati, tapi Tjiang Koen poenja orang-orang jang berdjoemblah besar, tiada bisa ditentoeken hatinja satoe persatoe djoega ada sama seperti Tjiang Koen. Maka itoe, lebi baek sekarang djoega He Khoa moehoen permisi boeat brangkat poelang, sedeng Tjiang Koen poen boleh traoesa repot atoer pendjagaän goena keslametan He Khoa saorang.
„Taijdjin ampoenja perbilangan djoega bener," berkata Jong Tat, Siauw Tjiang kekepaksa moesti menoeroet sadja dan hareplah diperbanjak maäf, kaloe sadja lantaran mana Siauw Tjiang poenja perlajanan soeda tiada sebegimana moestinja."
Sehabisnja berkata, Jong Tat lantas soeroean orang aken pergi ka pasanggrahan blakang boeat minta Hong Hoe Tiang Hoa toelisken rekest hatoerken trima kasi, atas boedi kemoerahannja baginda keizer. Tiang Hoa poen dengen tjepet mengatoer beres itoe soerat, berikoet djoega satoe rekest laen jang mempoenjai maksoed ampir bersamaän, tapi atas namanja sang iboe. Setelah rampoeng, laloe diantarken ka loear boeat diserahken pada sang oetoesan.
Lebi djaoe, Jong Tat tiada loepa membri hadiaän pada oetoesan terseboet dari bebrapa banjak mas-perak serta berbagi-bagi kaen tjita dan soetra; djoega pada semoea pengikoet dan pengiringnja itoe mantri, rata-rata telah dikasi persenan setjoekoepnja, hingga marika itoe djadi merasa amat girang dan bersama-sama Giauw Tjoe Soe mengatoerken trima kasi atas pembrian mana.
Kemoedian Giauw Tjoe Soe laloe memesen pada Jong Tat katanja:
„Dan Tjiang Koen, haroeslah selekasnja brangkat ka Teng Tjioe boeat hoeboengken tentara dengen Ong Goan Swee, soepaja tiada sampe mendjadi kepiran. Samentara Lauw Kok Koe sendiri, apa tiada ada soesoerat balesan boeat dibawa poelang ka kota radja?"
„Ja, paling laat lagi tiga-ampat hari Siauw Tjiang tentoe soeda brangkat djalan, sedeng Lauw Kok Koe jang djoega moesti ikoet perang bersama-sama, Siauw Tjiang rasa tiada perloe minta diapoenja soerat balesan lagi."
Sesoedanja berkata-kata, orang keliatan telah sama berdjalan keloear dari roeangan Tjoe Gie Thia, di mana masing-masing menoenggang koedanja. Jong Tat mengantar itoe oetoesan toeroen ka bawah goenoeng, teroes sampe di djalanan prapatan boeat saling berpisaän. Samentara itoe, oleh kerna berkoeatir di perdjalanan jang berdampingan, Giauw Tjoe Soe bisa dapet ganggoean dari orang-orang jang djahat, maka Jong Tat sengadja titah ampat orang Thauw-bak jang boleh diandelin, mengantar teroes sambil melindoengin perdjalanannja itoe oetoesan sampe di hari besok, baroe marika boleh balik poelang lagi di atas goenoeng.
Giauw Tjoe Soe merasa amat bertrima kasi boeat perlakoean begitoe manis jang ia telah trima dari sang Taij Ong, kemoedian sesoeda saling mengasi slamet djalan atawa slamet tinggal, kedoea fihak djadi berpisaän satoe sama laen.
Koetika Jong Tat soeda balik poelang ka atas goenoeng, sigra djoega ia keloearken titah pada sekalian Liauw-lo Liauw-lo aken moelai bikin persediaan seperloenja, kerna lagi ampat hari iaorang aken moesti brangkat djalan.
Begitoelah dalem satoe-doea hari itoe, di atas goenoeng keliatan orang repot sekali mengatoer ini-itoe serta bebena apa-apa jang perloe. Sedeng koetika sampe pada hari kaampatnja, di waktoe pagi sekali semoea barang berikoet ransoem soeda pada dimoeatin beres di bebrapa grobak. Begitoepoen Lauw Ke Pek telah dinaekin dalem grobak krangkengan dengen sekiternja tertoetoep rapet sama kaen-kaen lajar jang tebel.
Satoe hari seblonnja brangkat, memang lebi doeloe telah didjalanken oendangan pada tetoea-tetoea dari berbagi-bagi desa jang berdampingan, aken di itoe hari dateng berkoempoel di atas goenoeng Tjoei Taij San, boeat mengoempoelin dan angkoet pergi segala roepa barang dan prabotan dari seloeroe pasanggrahan, atawa apa sadja jang bisa dibawa dan ada perloenja bagi marika itoe. Demikianlah itoe pagi, di sitoe djadi rame sekali dengen bebrapa banjak rajat negri jang repot mengangkat ini atawa mengangkoet itoe, hingga dalem sebentaran sadja seantero pasanggrahan dari jang besar sampe jang paling ketjil, rata-rata djadi pada kosong dan orang pelahan pelahan moelai berlaloe poela dengen beroentoen - roentoen sesoeda meliat tiada ada apa-apanja lagi jang bisa dibawa.
Kemoedian Jong Tat lantas keloearken prenta aken njalaken api dan bakar habis itoe semoea pasanggrahan, soepaja di blakang hari tiada ditempatin poela oleh laen laen kawanan penjamoen.
Tempo semoea ini soeda berdjalan beres, baroelah dengen mengapalaken itoe pasoekan jang terdiri dari 3000 lebi laskar - laskar brandal jang dengen maoenja sendiri masoek mendjadi soldadoe negri, Wie Jong Tat bersama laen-laennja langsoeng brangkat djalan boeat menoedjoe ka Teng Tjioe. Sepandjang djalan, itoe bekas Taij Ong dari Tjoei Taij San senantiasa lakoeken penilikan keras dan melarang dengen antjeman hoekoeman berat pada siapa jang brani mengganggoe keamanan pendoedoek, atawa lakoeken perboeatan-perboeatan jang beroepa perkosaän serta laen-laen sebaginja. Dengen begitoe, membikin pendoedoek-pendoedoek di mana sadja jang itoe pasoekan liwatin, tetep berada seperti biasa, begitoe aman dengen tiada perna terbit kerewelan apa-apa, hingga banjak orang pada bersoekoer dan memoedji-moedji atas ketjakepannja pemimpin itoe pasoekan.
⁂
Kita sekarang berada di pertengahan pertama dari boelan Sha-gwee.
Itoe satoe hari, Ong Goan Swee bersama pasoekan besarnja soeda sampe di perwatesan Teng Tjioe. Maka Soen Boe, Peng Djoe Tek, jang mendapet denger itoe warta, sigra djoega membawa berbagi-bagi pembesar keloear kota boeat menjamboet. Samentara itoe, Ong Siauw Hoe lebi doeloe telah keloearken titah mendiriken pasanggrahan di loear kota, atawa sesoedanja atoer beres seantero balatentaranja, baroelah dengen membawa sekalian panglima - panglimanja, Goan Swee kita dateng di Kong Koan, di mana, lebi doeloe soeda berkoempoel itoe sekalian pembesar-pembesar jang mengadaken penjamboetan dengen satoe perdjamoean.
Tenga makan dan minoem, Ong Siauw Hoe perloeken menanja tentang pri-keadaän dan kekoeatannja fihak moesoe ini masa?
„Kekoeatan dari pasoekan Tiauw Sian, selaennja daripada jang binasa di peprangan berserta jang mati lantaran sakit, sekarang ini tjoema ketinggalan tiada tjoekoep 40 000 djiwa," demikianlah Tjong Peng, Oen Jauw Sian, mengasi ketrangan, „melaenken marika poenja Koen Soe, Sin Boe Todjin, ada mempoenjai ilmoe siloeman jang amat Lihaij. serta moesoe poenja Goan Swee, Oh Pit Khaij, amat gaga perkasa lebi djaoe, ada poela sembilan panglima perang, jang semoea terkenal galak; inilah semoea jang roes dikoeatirken. Sedeng semandjek Jo Taijdjin soeda meninggal, djoestroe ada djato di moesim dingin, maka pasoekan moesoe telah dimoendoerken ka tenga laoetan, sebab koeatir aer laoet djadi bekoe jang bisa menghalangin perdjalanannja praoe-praoe perang. Di tenga laoetan itoe ada terdapet seboeah poelo kosong jang dinamaken Soa Boen To, biasanja mendjadi moesoe poenja pasanggrahan, di mana tersimpen marikapoenja ransoem berikoet laen-laen keperloean. Begitoelah sekarang di sekiternja poelo penoe berkoempoel marikapoenja praoe-praoe perang. Baroe-baroe ini oleh kerna mendapet warta Goan Swee poenja pasoekan besar bakal sampe, moesoe roepanja belon maoe lantas bergerak, hanja tinggal menoenggoe di sitoe sampe dapet kepastian, apakah Goan Swee hendak pergi menjerang ka itoe poelo, atawa sebaliknja menoenggoe sadja sampe pasoekan moesoe dateng memoekoel kemari ?"
„Memang djoega kerna moesoe pikir pasoekan kita dari doeloe kebanjakan takoet pada gloembang ombak di laoetan, maka laorang brani lakoeken itoe pembrontakan serta oendjoek kapala batoenja," berkata Siauw Hoe, „dari itoe sekarang. Poen Swee telah ambil ketetepan boeat toeroen di laoetan aken maloemken peprangan di moeka aer, serta membri adjaran betoel - betoel pada marika."
„Itoelah boekan ada djalan jang sampoerna," berkata Peng Djoe Tek, „haroes sekali dikoeatirken kaloe sadja sang Jauw To keloearken ilmoe siloemannja melepasken api membakar praoe atawa menjiptaken angin dan ombak boeat membikin tenggelem praoe kita, nistjajalah pasoekan kita soeker dapet djalan boeat moendoer, achirnja mendjadi hadepin keroesakan jang amat ketjiwa.'
Tetapi, kitaorang tech mengandel atas redjeki jang besar dari sri baginda, harep sadja ilmoe siloeman tiada bisa kalaken kedjoedjoeran," berkata lagi Ong Goan Swee, maka takoet apa pada itoe segala matjem ilmoe tjoerang!"
Sebaliknja, maski begitoe kepingin, sebab Peng Soen Boe berada djoega di itoe perdjamoean, Ong Goan Swee djadi tiada maoe menanjaken prihal keadaännja Hong Hoe Keng.
Perdjamoean itoe berdjalan dengen slamet sehingga sore baroe berachir dan Ong Goan Swee sigra djoega poelang ka pasanggrahannja bersama sekalian panglima - panglima.
Tempo soeda berada dalem pasanggrahannja, atawa selagi Ong Goan Swee berada saorang diri, keliatanlah iapoenja sala satoe pengikoet telah dateng mengadep sembari membilang katanja:
„Hamba soeda serepin dengen pasti, jang Hong Hoe Goan Swee bersama Goei Sian Hong, sesoeda kena tertawan oleh moesoe sampe sekarang belon dapet kabar tentang mati-idoepnja. Sama sekali tiada ada kabarnja telah menaloek pada moesoe atawa hendak berbalik membawa pasoekan Tiauw Sian dateng memoekoel ini kota."
Ong Siauw Hoe tiada djadi heran mendenger itoe warta, memangnja djoega ia telah merasa pasti sang ajah tiada bakal maoe menaloek pada moesoe.
Besok paginja, waktoe berhimpoen dengen sekalian panglima panglima dalem pasang-grahannja, Ong Goan Swee telah menetepken tanggal 20 Sha gwee bakal dilakoeken oepatjara sembajangin laoetan, sedeng tanggal 21 lantas toeroen ka praoe boeat sigra madjoe perang, maka itoe diperingetin aken semoea orang moelai djoega mengatoer segala persediaän goena itoe maksoed.
Pada paginja dari hari ketiga, Wie Jong Tat poenja pasoekan telah sampe di itoe kota. Dan setelah mengatoer baek bala tentaranja, Jong Tat, Jong Pioe dan Hong Hoe Tiang Hoa laloe bersama sama dateng ka pasanggrahan besar aken djoempaken Ong Goan Swee. Tapi kerna koeatir resia marika bisa diketahoei oleh Peng Djoe Tek, Siauw Hoe tiada brani lantas bikin perkenalan soenggoe soenggoe, hanja itoe waktoe marika melaenken mendjalanken kehormatan setjara antara Goan Swee dengen panglimanja. Kemoedian semoea Liauw lo jang soeda soeka toeroet men aloek, satoe-persatoe tertjatet sebagi soldadoe negri sama seperti laen-laennja dan diserahken dalem pegangannja Wie Jong Tat.
Jong Tat laloe madjoe ka depan boeat menerima tjap kebe aran dari Joe Sian Hong, menantjep kembang mera di atas kapalanja, serta minoem djoega tiga tjangkir arak keslametan. Lebi djaoe, Ong Goan Swee tjaboet seratoes orang soldadoe boeat diserahken pada Hong Hoe Tiang Hoa sebagi barisan penglindoengnja. dan dapet seboeah praoe perang. Begitoe djoega itoe doea orang boedak prempoean ketjil, Gim Siong dan Jauw Pin, tetep mengikoet pada Siotjianja sebegimana biasa.
Sesoeda itoe, Goan Swee kita laloe prenta orang pergi oendang dateng Tjong Peng, Oen Jauw Sian. pada siapa ia membilang katanja:
„Di sini ada ikoet Hong Hoe Goan Swee ampoenja istri, le Sie. sedeng Poen Swee denger Tjong Peng ada beroema - tangga dalem kota, dari itoe Poen Swee pikir hendak titipken le Sie padamoe, serta sebisanja disediaken seboeah gedong boeat kediamannja, sedeng prihal diapoenja makan dan pake, itoelah Tjong Peng boleh traoesa repotin, kerna dia sendiri ada membawa boedak toea serta boedak-boedak prempoean jang sang goep merawatin padanja sampe baek."
Oen Jauw Sian setelah trima itoe titah, poen lantas berlaloe dari sitoe, sebentar lagi ia soeda titah orang bawa djoli aken menjamboet dengen hormat le Hoedjin dari dalem pasanggrahan.
Sebelonnja brangkat, le Sie telah memesen pada Jong Tat serta poetrinja :
„Di atas praoe dan sewaktoe hadepin peprangan, biarlah senantiasa berlakoe ati-ati. Akoe doaken siang hari malem moedah-moedahan kaoeorang bisa lekas balik poelang dengen beroleh kemenangan."
Dengen merasa amat berat dan tiada tega. itoe iboe dan poetri kepaksa djoega berpisaän satoe sama laen, demikianlah le Sie Hoedjin soeda doedoekin sang djoli, jang dengen tjepet sigra dibawa dateng ka depan kantoran dari Tjong Peng. sedeng Loe Tiong tertampak ada mengikoet dari blakang.
Orang berdjalan masoek dari pintoe tenga, di mana lebi siang soeda menoenggoe Oen Tjong Peng poenja istri dan poetri, jang menjamboet dengen lakoe hormat sekali pada Hoedjin kita, serta tra loepoet telah dise- diaken perdjamoean sebagi tanda membri slamet dateng. Djoega telah dibersiken itoe roeangan Hoa Thia boeat tempat kediamannja le Sie serta sekalian boedak - boedaknja.
Begitoelah selandjoetnja Hoedjin berdiam di sitoe, dengen mendapet perlakoean manis dan hormat dari Oen Tjong Peng soeami-istri.
Samentara itoe, adalah Ong Siauw Hoe dengen seantero pasoekannja, beroentoen-roentoen telah moelai toeroen ka praoe jang memang soeda disediaken setjoekoepnja Di sitoe, Goan Swee kita soeda mengatoer se- poetjoek rekest boeat dikirim ka kota radja. aken mewartaken ketetepan hari iapoenja menjebrang laoetan dan gerakin balatentara.
Sampe di tanggal 20 Sha - gwee, orang lantas lakoeken oepatjara sembajangin laoetan, sedeng pada tanggal 21, di waktoe pagi-pagi sekali, oepatjara sembajangin bendera poen telah berdjalan beres.
Peng Djoe Tek dengen membawa seantero pembesar soeda dateng ka pinggir laoet boeat membri slamet djalan.
Sebentar lagi, di prace besar kedengeran soeara rioeh sekali dari tamboer dan gembreng, maka semoea praoe perang beroentoen - roentoen soeda pasang lajar dan bergerak madjoe ka tenga laoetan.
Terbantoe dengen angin, pasoekan kapal perang dari Goan Tiauw madjoe dengen pesat sekali dan tiada lama kemoedian orang dateng membri rapportan pada Ong Goan Swee, bahoea pasoekannja soeda berantaraän tiada djaoe lagi dengen poelo Soa Boen To. Siauw Hoe sigra naek ka loteng di bagian blakang dari kapalnja, sambil memandeng ka djoeroesan depan dengen satoe tropong. Maka ia dapet liat kapal-kapal perang dari fihak Tiauw Sian ada berbaris rapet di sepandjang pesisir poelo terseboet Sigra djoega ia keloearken titah boeat diriken pasanggrahan aer kiri kira berantaraän sepoeloe paal moeka aer dari pasanggrahannja moesoe, begitoepoen ada diperingetin soepaja masing-masing pasanggrahan selaloe mendjaga ati-ati, djangan sampe kena diterdjang dengen menggelap oleh pasoekan moesoe di waktoe malem.
Sampe di sini, baeklah kita tjoba menilik aken keadaännja fihak Tiauw Sian. Adapoen sedari moesim Tang taon liwat, Tiauw Sian poenja Goan Swee soeda oendoerken pasoekannja dan bertempat di Soa Boen To, dengen berniat di pertengahan moesim Tjhoen aken madjoeken poela pasoekannja boeat memoekoel kota Teng Tjioe. Tapi blakangan ia trima warta dari spion-spionnja jang membri taoe tentang Goan Seng Tjong soeda mengangkat Goan Swee Ong Siauw Hoe, berbareng puen telah koempoelken bebrapa banjak soldadoe marine, hendak maloemken peprangan seroe di ka laoetan. Blakangan ia djoega trima rapport prihal Teng Tjioe soeda sedia dan bikin banjak sekali kapal-kapal perang, ia djadi mendoega sedikit hari poela tentoe bakal terdjadi soeatoe peprangan heibat, maka itoe ia lantas bermoefakatan dengen Sin Boe Todjin, jang sama berpendapetan fihaknja bakal djadi lebi beroentoeng kapan itoe peprangan dibikin di tenga laoetan. Lantaran mana, jaorang oeroeng madjoeken pasoekannja, malahan tinggal menoenggoe sadja toeroennja pasoekan kapal perang dari fihak Goan Tiauw.
Tiada lama kemoedian, Oh Pit Khaij menerima warta tentang sampenja Ong Goan Swee ampoenja pasoekan besar di kota Teng Tjioe, tapi ia menjangka pasoekan Goan Tiauw tiada brani melangka laoetan boeat menjerang fihaknja. Dan itoe satoe hari, tiba-tiba iapoenja penjerep kabar telah dateng merapport tentang Ong Goan Swee bersama satoe pasoekan besar kapal-kapal perang soeda sampe, serta mendiriken pasanggrahan di moeka aer, sekira berantaraän ada sepoeloe paal.
Mendenger ini rapportan, Oh Pit Khaij djadi ketawa besar, sembari membilang pada sekalian panglima-panglimanja :
„Goan Tiauw ampoenja Goan Swee soenggoenja ada orang jang tiada taoe mati maoepoen idoep. Tjoba, kaloe ini peprangan dimaloemken di daratan, menang dan kala masi belon bisa ditentoeken, tapi sekarang dengen gegaba dia brani dateng lakoeken peprangan di moeka aer, satoe alamat dia maoe mentjari mati sendiri!"
Besok paginja, Oh Pit Khaij telah berdoedoek di pasanggrahannja dan menanja pada sekalian pangiimanja:
„Siapakah di antara Tjiang Koen sekalian jang maoe tjoba mereboet ini pahala pertama-tama?"
Baroe sadja ini perkataän habis dioetjapken, keliatan telah madjoe keloear iapoenja Sian Hong bernama San Thauw Houw, jang mendjawab katanja : „Biarlah itoe pahala terserah pada Siauw Tjiang !"
„Baek lah." berkata sang Goan Swee, „tetapi haroeslah berlakoe ati-ati sewaktoe berhadepan dengen moesoe."
San Thauw Houw menerima itoe prenta, laloe membawa iapoenja pasoekan kapal perang sendiri, kıbarken bendera dan poekoel tamboer lantas madjoe minta perang.
Pendjoeroe kabar dari fihak Goan Tiauw, sigra djoega dateng masoek ka dalem pasanggrahan besar, mengadep Ong Goan Swee seraja merapport katanja:
„Harep Goan Swee mendapet taoe, sekarang ini ada dateng panglima moesoe jang minta perang !"
„Baeklah Poen Swee keloear perang sendiri," berkata Ong Siauw Hoe.
Tapi Him Hauw tjepet madjoe ka depan, sembari menjega ia berkata:
„Tjoema satoe panglima moesoe jang tiada berarti, perloe apa Goan Swee moesti tjapeken diri boeat keloear perang sendiri, toch tjoekoep aken Boat Tjiang sadja jang pergi kasi adjaran padanja."
„Tetapi Heng Tiang brangkali loepa, bahoea boeat peprangan jang pertama-tama, perloe sekali moesti bisa mereboet kemenangan," berkata poela Siauw Hoe, maka kaloe Heng Tiang keras djoega hendak keloear, biarlah soeka berlakoe ati-ati, djangan sampe keangkeran dari pasoekan kita mendjadi linjap."
Him Hauw trima baek itoe pesenan, langsoeng membawa iapoenja pasoekan kapal perang, madjoe ka depan sampe berhadepan betoel, di mana kedoeà fihak brentiken kapalnja serta melepasken djangkarnja masing- masing. Him Hauw mengangkat kapala memandeng ka djoeroesannja moesoe, maka tertampak panglima moesoe itoe kira-kira beroesia ampir tigapoeloe taon, penggawakannja. tinggi-besar beramboet mera dan di tangannja ada memegang seboeah kampak besar, kira-kira berat 80 kati lebi. Sebaliknja San Thauw Houw djoega telah awasin ka tempatnja moesoe, ia dapetken Him Hauw bermoeka lebar dan koeping besar, tangan memegang sepasang toembak pendek, sedeng di blakangnja berkibar seboeah bendera dengen toelisan : „Boe Pong Gan Kip Te, Liong Djiang Taij Tjiang Koen, Tjo Sian Hong, Him".
„Panglima jang dateng ini boleh lekas oendjoekin nama," begitoelah membentak Him Hauw kemoedian...soepaja menggampangken boeat akoe nanti mengambil kaoepoenja kapala !"
„Ha, ketahoeilah, akoe ini ada Tiauw Sian Kok, Oh Goan Swee ampoenja Sian Hong, San Thauw Houw inilah dia!" mendjawab San Thauw Houw dan sembari bales menanja, dan kaoe, siapa namamoe? Hajo, lekas oendjoekin kemari, soepaja dalem boekoe Kong Lo, gampang tertjatet kaoepoenja kapala!"
„Akoe ini jalah ada Taij Goan Tiauw, Ong Goan Swee ampoenja Tjo Sian Hong, Him Hauw, sengadja dateng kemari boeat mengambil kaoepoenja djiwa !"
Sehabisnja berkata, Him Hauw madjoe lagi bebrapa tindak ka kapala kapal, dengen toembak dari tangan kanannja ia goenaken menjerang pada San Thauw Houw, siapa poen dengen sebat menangkis sama goloknja seraja barengin dengen satoe kali batjokan menoedjoe atas kapalanja Him Hauw.
Meliat itoe serangan datengnja begitoe heibat, Him Hauw lantas menangkis dengen kedoea toembaknja dan ia rasaken tangannja djadi ngiloe saking beratnja itoe batjokan, sedeng dari moeloetnja tiada merasa keloearken oetjapan :
„Oh, soenggoe Lihaij ini Hoan Kauw!"
„Ha, ha," menjentak San Thauw Houw sambil membatjok poela dengen goloknja. „baroe sekarang kaoe taoe akoepoenja Lihaij!"
Him Hauw mengarti jang ia sekarang lagi berhadepan dengen moesoe jang tanggoe, dari itoe ia laloe melawan perang dengen teliti sekali, tapi koetika soeda berdjalan kira-kira tigapoeloe djoeroes lebi, Him Hauw moelai merasa tiada sanggoep aken melawan lebi lama, tersebab sang golok dari panglima moesoe bermaen seperti angin poejoe dan oedjan deres. Ia djadi berkoeatir bila dalem pertandingan pertama fihaknja menampak kekalahan, pastilah itoe nanti bisa mengoerangken keangkerannja ia poenja pasoekan atawa melinjapken napsoe berklai dari balatentaranja. Maka ia lantas prenta lekas - lekas moendoerken kapal perangnja, samentara San Thauw Houw tentoe sadja tiada soeka liat moesoenja tinggal pergi, sigra djoega ia prenta madjoeken kapalnja boeat mengoedak.
.jpg)
HIM JOE HOK MEMOEDJA PEDANG
MENDIRIKEN PAHALA.
XLI.
Petjaken ilmoe siloeman, panglima Goan
mengoendjoek kegarangan Lari ka
loear laoetan, pasoekan Tiauw
San menampak kekalahan'
Sjahdan Him Hauw tatkala meliat San Thauw Houw mengoedak bersama kapalnja. setelah berpisaän tiada sebrapa djaoe, sigra djoega dari poendaknja ia tjaboet keloear itoe Tjam Kauw Kiam dan lempar ka oedara, sembari balikin dirinja mengadep pada itoe Sian Hong dari Tiauw Sian, ia menjentak katanja:
„Andjing Tiauw Sian, djangan keboeroe mengoedak! Liat, akoepoenja Popwee lagi toeroen mengambil djiwamoe !”
Mendenger itoe seboetan „Popwee”, San Thauw Houw djadi sanget terprandjat, ia dongakin kapalanja memandeng ka atas, maka terliat olehnja di tenga-tenga oedara, segoeloeng sinaran terang mirip sebagi tjahaja kilat, melajang-lajang toeroen ka bawah menoedjoe padanja. Ia boeroe boeroe tjoba menjingkirin dirinja, tapi soeda tiada keboeroe poela. Sang Po Kiam telah toeroen membatjok mengenaken San Thauw Houw poenja bagian poendak kiri, jang membikin ia djadi rasaken kesakitan jang tiada terhingga, teroes djato roeboe di atas papan kapal.
Itoe tempo, kedoea praoe terseboet berdempetan deket sekali, dengen satoe kali lompat Him Hauw soeda berada di praoenja moesoe, berbareng atjoengken toembaknja jang membikin San Thauw Houw gampang sadja djadi terbinasa.
Balatentara moesoe tjoba dateng mengepoeng pada Him Hauw saorang, tapi soldadoe-soldadoe dari fihak Goan djoega soeda pada memboeroe ka itoe kapala, menjamoek dan memboenoe kalang-kaboet pada lawanannja, hingga boekan sedikit jang djadi tiwas dan dapet loeka-loeka heibat.
„Siapa-siapa di antara Hoan Koen jang kepingin idoep, bolehlah sigra lempar sendjatanja dan dengen tangan kosong berdiri diam di tenga tenga kapal," demikian Him Hauw berseroe dengen soeara keras. „sebaliknja barang siapa jang masi memegang sendjata di tangan, dengen roepa masi hendak melawan, bakal diboenoe habis satoe persatoe!"
Baroe sadja ini perkataan habis dioetjapken, dalem sekedjapan sadja laskar laskar Tiauw Sian, berikoet semoea toekang toekang dajoeng, berbareng dengen tangan kosong pada lompat toeroen ka tenga tanganja kapal, menjerahken doi boeat manaloek.
Itoe kapal moesoe jang dapet dirampas, sesoedanja dipasangin pakoe laloe dibawa tjampoer dalem pasoekannja sendiri dan San Thauw Houw poenja kapala poen telah dikoetoengin. Kemoedian marika laloe madjoe lagi boeat menerdjang pada laen laennja kapal dari moesoe, serta oedjanin dengen anak pana, membikin Hoan Koen dapetken keroesakan amat besar, boeroe - boeroe melariken diri dengen kapalnja.
Him Hauw mengoedak teroes sampe bebrapa paal lagi, baroelah ia tarik poelang seantero pasoekan kapal perangnja dateng djoempaken Ong Goan Swee seraja oendjoeken itoe kapala dari panglima moesoe jang terboenoe mati, katanja:
„Boat Tjiang mengandel atas Goan Swee ampoenja keangkeran, dapet memboenoe ini satoe Sian Hong dari Tiauw Sian dan merampas djoega doea boeah kapal perang moesoe, serta trima menaloek doearoetoes orang lebi Hoan Koen, hareplah Goan Swee mendapet taoe."
Mendenger itoe rapportan, Ong Goan Swee djadi sanget girang dan membilang : „Heng Tiang pertama tama madjoe perang soeda bisa perolehken ini kemenangan, itoelah boekan ada soeatoe gandjaran jang ketjil sadja."
Berbareng berkata begitoe. Siauw Hoe laloe menjatet dalem boekoe Kong Lo Pho boeat Him Hauw poenja pahala jang pertama, sambil kemoedian prenta bawa mengadep itoe semoea soldadoe soldadoe moesoe jang menaloek dan dititah boleh sigra lepasken tali iketannja masing-masing. Sesoeda itoe, dengen selakoe menghiboer Goan Swee kita membilang pada marika itoe:
„Orang jang soeka menaloek selamanja terbebas dari kematian, dari itoe kaoe sekalian boleh traoesa koeatir soeatoe apa. Dan sekarang kaoeorang boleh tinggal berdiam sadja dalem kapalmoe, toenggoe sampe radjamoe djoega soeda menaloek, baroelah kaoeorang nanti dilepasken poelang ka negrimoe sendiri."
Semoea Hoan Koen itoe laloe pada hatoerken trima kasi. Samentara Ong Goan Swee prenta orang-orangoja aken sigra mengatoer medja perdjamoean, boeat doedoek makan-minoem tanda membri slamet atas kemenangan terseboet, teroetama mendjamoe soldadoe-soldadoe jang soeda toeroet dalem itoe peprangan. Begitoelah itoe hari orang makan dan minoem sampe sore baroe boebar.
Officier jang diwadjibken lakoeken penilikan pada itoe sekalian soldadoe - soldadoe Tiauw Sian, soeda menanjaken tentang keadaännja Hong Hoe Keng, kemoedian ia dapet ketrangan, adapoen Hong Hoe Keng dan Goei Tjin Tjong setelah kena ditangkep, beroelang - oelang telah boedjoekin boeat marika maoe menaloek serta djadi pemimpin aken balik memoekoel kota Teng Tjioe. Tetapi itoe kedoea mantri jang ternjata amat setia, biar begimana tiada sekali-kali maoe menoeroet. maka sekarang iaorang ada terkoeroeng dalem pendjara besar di iboe-negri dari Tiauw Sian dengen hadepin kesengsaraän dari roepa-roepa siksaän.
Setelah mendapet ini ketrangan, sang officier telah dateng membritaken itoe hal pada Goan Swee. Maka Siauw Hoe selaennja merasa sedih di hati bagi apa jang dialamin oleh sang ajah, sebaliknja ia djoega merasa soekoer sekali bahoea itoe ajah sesoenggoenja ada berhati setia dan keras, hingga di blakang hari menggampangken boeat ia membales sakit hatinja dengen boekti-boekti tjoekoep, jang ia seroema tangga meloeloe telah djadi bersengsara tersebab fite: naban jang amat kedji.
Samentara itoe, Hoan Koen jang kala perang dan lari poelang, telah dateng mengadep pada Goan Sweenja, sembari merapportken prihal San Thauw Houw kena terboenoe mati oleh moesoe, serta laen - laen sebaginja.
„Betoel koerang ajjar itoe Him Hauw". berkata Oh Pit Khaij dengen sanget morkanja setelah mendenger rapportan demikian. „besok akoe moesti keloear perang sendiri, tangkeppadanja boeat membales ini sakit hati!"
„Aken tetapi," berkata iapoenja sala satoe panglima jang bernama Hoe Lie sembari madjoe ka depan, kapan panglima moesoe djoega ada menggoenaken ilmoe kesaktian, begimanalah Goan Swee nanti bisa beroentoeng bertaroeng padanja, tiada lebi baek oendang sadja Koen Soe keloear perang sama-sama, soepaja dapet memetjaken marikapoenja ilmoe"
„Tjoema ilmoe sebegitoe ketjil," berkata Oh Pit Khaij, „perloe apa moesti bikin kaget pada Koen Soe."
Besok paginja, Oh Pit Khaij telah madjoeken pasɔekan kapal perangnja dan dateng sampe deket Goan Koen ampoenja pasanggrahan aer, laloe meminta perang. Soldadoe penoenggoe pasanggrahan poen laloe boeroe-boeroe masoek ka dalem. merapportken pada Ong Goan Swee, sembari katanja:
„Sekarang ada Hoan Koen poenja Goan Swee, Oh Pit Khaij. membawa diapoenja pasoekan besar lagi dateng minta perang."
Ong Siauw Hoe poen lantas keloearken prenta boeat sediaken iapoenja kapal perang. sebab ia sendiri hendak madjoe hadepin moesoe, begitoe djoega pada sekalian panglimapanglimanja ada diprenta boleh bawa kapal perang masing-masing boeat toeroet madjoe di peprangan.
Begitoelah Goan Koen poenja pasoekan kapal perang dengen berbaris rapi soeda madjoe samperin di mana pasoekan moesoe ada menanti. Dan koetika kedoea fihak soeda berhadepan betoel satoe sama laen, Oh Pit Khaij lebi doeloe telah membentak katanja:
„He, panglima jang dateng ini, lekas tinggalken nama, soepaja akoe boleh lantas ambil angkau poenja kapala !"
„Hm, baek-baek bagoes! Pasanglah koepingmoe boeat mendenger terang," membales Siauw Hoe. Poen Swee ini jalah ada sri baginda keizer Taij Goan ampoenja Tjeng Tang Taij Goan Swee, Ong Siauw Hoe, jang telah menerima titah boeat dateng bikin binasa padamoe."
„Ha!" menjentak lagi Oh Pit Khaij. „traoesa banjak bitjara, tjobalah rasaken ini akoe poenja satoe gembolan!"
Berbareng itoe, Oh Pit Khaij angkat gembolannja menjerang pada Siauw Hoe, samentara Goan Swee kita poen menangkis itoe serangan dengen tjepet sama iapoenja Hong Thian Hoa Kek, seraja kemoedian barengin menjerang dengen tjara loear biasa gapanja, sampe beroentoen-roentoen ampat kali toesoekan, hingga mirip seoepama menjambernja kilat dan membikin Oh Pit Khaij diam-diam djadi menjeboet dalem hatinja:
„Oh, betoel amat gaga-perkasa !"
Demikianlah ini kedoea Goan Swee dengen berdiri di kapala kapal, djadi saling berantem begitoe seroe, serta masing-masing sama mengoendjoek kegagahan dan kebisaannja.
(Aken disamboeng).