313
Maka di tanja oleh njonja Wan Gwee, ada perkara apa toean, sampe begitoe girang?
Wan Gwee kasi toendjoek 1 bidang soerat!
Melainkan 1 bidang soerat boekannja barang moestika, begimana misti di girangkan demikian, katanja njonja Wan Gwee, itoe soerat dari mana asalnja toean?
Bing Wan Gwee berkata: dari Lioe Wan Gwee, jang nana ini soerat kita dapet batja dia soedah bikin brenti pembrontakan Song Boen Djaij, akan sekarang soedah kombali di Kota Radja, dari amat girang hatinja Baginda Radja, dia di angkat djadi Ping See Tjing Kok Ong, selainnja itoe ada 8 prampoean bagoes bidjaksana dan gaga perkasa toeroet di dalem itoe peprangan, akan sekarang 8 prampoean itoe angkat soedara pada Permisoeri, itoe 8 prampoean dapet idzin akan poelang di negrinja, maka dia kirim ini soerat.
Nona Sim Gwat Ko serenta batja itoe soerat amat girang dia poenja hati, dan apa dia poenja menjesel hati mendjadi ilang semoea.
Dari pada itoe Bing Wan Gwee lantas bersedia ting dan roemanja terhias soetra-soetra, boenikan moeziek tjina, boeat bernanti kedatangan Ping See Ong.
