280
hendak lari kombali tida dapet djalan, lantas dia tertangkep oleh Hwi Sik To Djin, bersama Djaij Koen Liang di hadepkan pada Song Boen Djaij.
Di sitoe Djaij Koen Liang sentakin pada Song Boen Djaij, hei bangsat! loe soedah brani boenoeh pada Hoa Ging (Hoa Tjoe Lim) sampe kita poenja Goan Swee Lioe Si Djoen terdakwa bikin itoe pemboenoehan, dan loe lantas lari akan tjari idoep, apa itoe teritoeng orang baik? dan apa sebabnja loe lantas bikin hoeroe hara? dan andelin loe poenja goeroe, tetapi nanti kaloe kita poenja Gwan Swee dateng bikin pitja loe poenja barisan dan loe hendak pergi lari kamana?
Song Boen Djaij serenta dengar itoe perkataän lantas dia marah besar, dan bri parintah itoe Djaij Koen Liang bersama 8 prampoean bagoes itoe semoea tertarik keloewar akan terpanggal kepalanja.
Tetapi dia poenja hoeloebalang bernama Loei Tian Pit dan Kwik Hoei Bing 2 orang itoe toendjoek atoeran pada Song Boen Djaij. Ja Taij Ong! hamba liat itoe Djaij Koen Liang satoe ambtenaar Militair jang nommer satoe, betoel saijang kaloe terboenoeh sebab ini waktoe tempo lagi pake orang, kaloe dia maoe taloek dan toeroet di bawa parintah Toean hamba, itoe hamba rasa ada lebi baik, dan
