213
djadi tida bisa keloewarin soewara, akan sekarang tinggal di San Tong.
Djadi begitoe adanja kita poenja anak ? dan kenapa neef tida maoe adjak dia poelang kemari, katanja Lioe Thaij Thaij.
Djangan kewatir Thaij Thaij, katanja Djaij Koen Liang, sebab In Djian Tiang Lo bilang, kaloe sakitnja soedara Lioe Si Djoen tida sembarang thabib jang bole di mintain pertoeloengan, maka In Djian Tiang Lo nanti hendak bawa di lain negri di mana ada thabib jang mengarti, akan di mintain pertoeloengan.
Lioe Thaij Thaij membilang banjak trima kasi pada Djaij Koen Liang jang dia soedah toeloeng membri kabar, lantas dia di adjak makan dan minoem arak.
Kemoedian pada besok paginja Djaij Koen Liang berangkat hendak kombali di tempatnja Lioe Si Djoen dan Lioe Thaij Thaij soeroe boedjang Lioe Hin ikoet pada Djaij Koen Liang akan djaga pada Lioe Si Djoen.
Tjerita sekalian nona-nona itoe, serenta sampe di San Tong dia dapet liat betoel itoe roema pendjoewalan thee begitoe rame, lantas dia sama masok.
