Liauw Tjay.
305
dan Lie Tjoen Eng berkali-kali tanja tiada bisa menjahoet, kaget di daratan ada 2-3 orang bawa lantera lagi datang soesoelin, dia dapet dengar di dalem praoe ada soewara orang menangis begitoe djoega dia naik di praoe awasin tengok itoe anak prampoean, lagi doedoek diatas goedri sembari dia ngoehak ngihik menangis, dan dapet tengok lagi ada satoe anak moeda, kira-kira ada toedjoe delapan blas taoen poenja oemoer, lagi adepin sama ini satoe anak prampoean dan itoe orang soedah tengok begitoe, lantas dia makiin kata: O! kau bisa mengat pergi lari tjari kendak, baenja dia belon sempat bawa lari sama kau, enak betoel loe di praoe berdoea-doeahan saling tjinta, sekarang ini dia maoe adjak lari kemana sama loe, bole lekas kasi akoe taoe soepaja kau berdoea zonder kena labrakan.
Lie Tjoen Eng dengar mendjadi mara lantas sahoetin berkata: hei kau orang betoel tiada ada poenja mata, begitoe brani sembarangnja boeat katain sama akoe, kau poenja hati begitoe boesoek, maoe keniaja orang jang pake hati bae dan oedjoet betoel, dari ini anak prampoean dia datang boewang diri di aer, akoe poenja praoe memang ada brenti disini, dapet liat jang kita pake hati bae boeat toeloengin sama dia, diangkat naik ka praoe kau tiada bilang trima kasi, bole maki katain akoe maoe pergi kawa lari.
Lantas itoe masing-masing orang pada sentak sama Lie Tjoen Eng berkata: hei kapan betoel dia lompat boewang diri di soengei, kenapa dia ada di dalem kau poenja praoe lagi doedoek berselimoet, Lie Tjoen Eng sahoetin berkata: dia barang lompat di aer akoe lantas pergi toeloengin angkat naik, kapan akoe saorang tiada toeloengin tentoe sampe sekarang dia masi ada di dalem aer, lantas itoe masing-masing orang berkata lagi: kapan betoel begitoe bole bilang kau poenja hati bae, dan kaloe kau soedah toeloengin angkat naik, kenapa tiada lekas di anterin di akoe poenja dalem gedong, begimana kau bole semoeniin boeat simpan sama dia di dalem praoe, begitoe boekan jang terang sekali kau maoe bawa menggat, dan masi maoe berkoewat boeka moeloet begitoe roepa, kaloe tiada kau poenja ingetan begitoe kenapa tiada maoe soeroe orang boeat lapor kasi kabar.
Lie Tjoen Eng lantas berkata: baroesan akoe toeloeng angkat dia naik belon ada menanja dia poenja hal sampe terang, begimana maoe soeroe akoe boeat anterin sampe di kau poenja tempat, masing-masing itoe orang pada berkata kombali: hei kau apa tiada taoe akoe saorang jang berpangkat orang she Ban poenja soeroehan, jang mana orang tiada kenal sama dia, dia kata belon habis lantas ada brapa orang jang kasi kabar, balik bawa 2 potong tambang bilang jang dia poenja Loija ada pesen, kapan ada itoe orang jang maoe bawa lari, bole tangkap ikat sama-sama ini prampoean jang maoe menggat, toengoe sampe besok pagi bole bawa dia berdoea itoe di polisi, sehabis lantas teroes di ikat doea-doeanja, lantas Lie Tjoen Eng berkaok kuta: hei ada begini roepa poenja perkara Wan Ong Soe, akoe jang pake hati bae soedah toeloengin sama orang, bebalik sampe kena diri sendiri orang djailin bikin tjilaka, masing masing tiada maoe perdoeli betoel atau sala dia maen perkosa sadja tarik.
Lie Tjoen Eng tengok begitoe djadi apa bole boeat naik ka darat, itoe anak prampoean barang sampe di darat lantas menangis maoę lompat
