288
Liauw Tjay.
segala tempat, teroes melantjong sampe toedjoe dlapan hari itoe waktoe di Tjit gwee sedang panas kentjang, tambahan ada angin Tjioe Hong, dan Haij Soeij balik poelang badannja rasanja panas, pergi mandi joetji sama aer dingin, sampe sore lantas dapet sakit tiada bisa bergerak, dia poenja hati tjoema pikirin maoe bikin examen reboet Tjong Goan, mendadakan dia dapet sakit, takoet sampe tempo belon bisa bae, maka dalem hatinja ada bertamba kesel, dia sakit tidoer di randjang pikirin, satoe ari dengan satoe ari sansan paja, teroes sampe di Pee gwee tiada bisa bangoen indjak boemi, dia taoe dia poenja peroentoengan sebegini belon bole dapet nama atau pangkat, dia poenja sobat-sobat pada pergi di Ko Thio, tjoena Haij Soeij di tenga randjang matanja kelak kelik, dalem hatinja kesel sekali, sampe liwat lagi 10 ari orang pada bikin examen soedah balik poelang, dapet dengar orang di Boen Tjiang Koan she Jauw nama In Tjit iang dapet.
Haij Soeij itoe waktoe baroe ada baean dia poenja sakit dan teman-temannja dia poenja sobat ande tiada satoe iang dapet semoea pada maoe balik adjakin Haij Soeij poelang. Haij Soeij lantas bilang bole sewa praoe sadja dan temannja toeroet sewa satoe praoe, adjakin Haij Soeij toeroen di praoe. Haij Soeij ada tarik napas sadja sepandjang djalan sebab tiada kebagian nama, dan bikin satoe sair pantoenan iang dia poenja peroentoengan, teman sobatnja tengok begitoe dia lantas boedjoekin kata, Haij Heng orang iang besar poenja kepinteran, sebab dapet sakit tiada sampe boeat masoek di Ko Thio, kaloe masoek soedah tentoe dapet rampas tiada nomor satoe dan nomor tiga misti dapet.
Haij Soeij berkata, masing-masing belon ada taoe, boekan dari akoe iang pikirin misti maoe dapet, sebab akoe didalem roema dapet parenta sama iboe dia toenggoe-toenggoe harep sampe sekarang ini sewaktoe tiada akoe poenja nama apa di boeat balas orang toea poenja pengharepan, sobatnja dengar semoea tarik napas berkata, iang betoel kau sanget tjinta oehauw sama orang toea, itoe satoe ari sampe di Loei Tjioe, Haij Soeij ingat iang dia soedah berdjandji sama Thio Kok Pek, sekarang ini tiada dapet ini nama, masa bole ilang kepertjajaän sama orang, djadi dia bilang sama dia poenja teman sobat, iang dia maoe naek, masing-masing pada teroes poelang ka roemanja, Haij Soeij kendiri berdjalan pergi di desa Thio Kee Tjoan, djalan sampe di Thio Siauw It poenja roema makan.
Thio Siauw It barang dapet liat lantas kasi slamat bilang, Haij Siang Kong iang betoel soedah dapet pangkat maoe poelang, Haij Soeij dengar lantas tarik napas berkata, maloe! maloe!! Soedah terlempar akoe poenja nama, Thio Siauw It berkata, begimana Siang Kong begitoe tinggi poenja kepinteran, bole terlempar apa sebabnja.
Haij Soeij lantas bilang akoe barang sampe di kota See Shia sakit tiada bisa masoek di Ku Thio poenja perkara.
Thio Siauw It ketawa berkata, ini iang betoel Siang Kong poenja oenki belon ada sampe, bintang masi ketoetoep bole menoenggoe sabar sadja djadi-in ini perkara djodo, baroe pergi poelang.
Haij Soeij berkata kerdja bikin kawin akoe tiada bisa tjoema akoe maoe ketemoein Thio Kok Pek Loija iang soeda berdjandji sebab itoe akoe dateng kau poenja tempat minta di toeloeng kabarin satoe soeara bilang akoe menoenggoe di roema makan. Thio Siauw It lantas bilang bae teroes pergi di gedongnja Thio Kok Pek, bilang iang Haij Soeij soedah balik dateng sebabnja dia sampe di kota radja dapet sakit tiada bisa madjoe di Ko Thio, sekarang ini dia balik soeroe akoe kabarin sama Taij Loija, apa Taij Loija maoe soeroe panggil boeat ketemoe apa begimana. Thio Kok Pek denger lantas berkata, O! dia soedah balik nanti akoe pergi paranin, adjakin dia sama-sama dateng di akoe poenja gedong; begitoe djoega ia prenta soeroe pikoel djoli pergi di roema makan.
(Ada samboengannja).
