— 1174 —
praoe. Sasoedanja berlaloe dari hadepan Ong Ma, bersama Bauw Hian dan Lo Keng ini orang moeda pergi dari roema penginepan, dan sakaloearnja dari sitoe ia pergi ka pinggir kali sewa satoe praoe dan pesen toekang-toekang praoe begimana haroes berboeat dalem perdjalanannja.
Koetika Ong Ma sampe di pinggir kali dan orang jang gape-gapein ia dari praoe poen boekan laen jalah Lo Keng; djadi di sini gampang kita terangken, bahoea pakerdja'an kedji ini njatalah soeda diatoer terlebi doeloe, dan pesenannja Ong Ma pada Hok Tjoen inilah kedjadiannja.
Sekarang kita balik poela ka praoe di mana ini pamoeda doerhaka kasi maen lelakornja di hadepan Joe Si.
„Nona djangan maloe maloe, akoe ini haroes dipandang kau poenja swami jang nanti menjinta pada Siotjia dengen sagenep hati dan djiwa." kata Hok Tjoen: „Sakean lama akoe denger kau selaloe menolak orang orang moeda jang menjinta padamoe, dan penolakan itoe tentoe lantaran tiada penoedjoe atawa deradjatnja orang itoe sanget renda."
Sedeng kata begitoe Hok Tjoen tarik satoe krosi dan doedoek di deketnja Joe Si, tapi ini nona jantas bangoen, sedeng Heng Hoa lantas pegang tangannja,
