— 1655 —
Esoknja di waktoe pagi segala apa soeda sedia. Thio Si bersama anaknja, Peng Si dan Wan gwe, masing-masing lantas naek ka atas djoli, mantoenja itoe orang hartawan menganter pada Thio Si dan kaliatan merasa sanget berat aken berpisahan.
⁂
Sedeng itoe sekalian familie brangkat, adalah Ko Kong di kota radja sedeng repot mengatoer perkara nika'an antara anak-anaknja.
Pertama itoe orang bangsawan telah bitjaraken lerkawinannja Ko Kongtjoe pada Wie Siotjia dan soeda di tetepken djoega harinja, tapi apa maoe Kou Kongtjoe poen kirim bingkisan dan minta di tetepken hari kawinnja.
Kou Kongtjoe ingin begitoe, adalah pada satoe hari ia trima kiriman barang bingkisan dari Taij Goan Kong Tjo Keng, jang minta di tetepken djoega ia poenja hari pernika'an sama Keng Hoa Siotjia.
Menoeroet Ko Kong poenja poetoesan, marika itoe poenja hari nika di bikin bareng, jaitoe dalem boelan Tjap Dji Gwe tanggal sepoeloe.
Djalannja hari tjepet sekali, kerna begitoe lekas telah sampe pada itoe hari jang di tetepken. Pada itoe hari, di gedongnja Tin Kok Hoe, Kong Pouw Siang Si Gak Kong dan Kou Han Lim, tiga roema, telah di rameken oepatjara perkawinan.
Pembesar-pembesar negri, orang-orang jang ternama dan sampe pada tingkatan jang renda pendoedoek di kota radja, semoea telah dateng mengoendjoengken pestanja itoe tiga orang dengen goembira sekali.
