— 1654 —
boedjang-boedjang lelaki poen kliatan djadi repot bikin bresi djoli djoli jang moesti di goenaken di hari besok.
Ini perobahan jang mendadak dalem roemanja familie Sian telah membikin kaget bebrapa tetangganja, maka pada itoe waktoe bebrapa orang dateng mengoendjoengken, serta menanjaken, kaloe kaloe ada kedjadian hal apa jang membikin marika itoe kliatan djadi begitoe kasoesoe.
Pada tetangganja itoe Sian Wan-gwe toetoerken apa jang soeda kedjadian atas dirinja Sioe Eng dan Sioe Tji, begimana itoe doea orang soeda dapet pangkat, begimana Sioe Tjie soeda bisa bitjara dan laen-laen hal jang berhoeboeng dengen itoe.
Soeda tentoe sadja itoe bebrapa orang tiada maoe mengarti, kerna memang toch satoe hal jang sanget loear biasa, kaloe orang gagoe bisa bitjara.
Tapi dengen setjara sabar dan aloes Sioe Djin terangken itoe semoea, menoeroet tjerita seperti apa jang Song In toelis dalem soeratnja, jaitoe Sioe Tji soeda kena makan obat pil jang moestadjab dari The Koen.
Sorenja telah di adaken perdjamoean, di mana selaennja orang sedalem roema, poen bebrapa tetangganja jang berdeketan telah di oendang.
Dalem itoe perdjamoean kombali Thio Si moesti trima orang banjak poenja oetjapan slamat, hingga itoe njonja kaliatan djadi ripoe aken bales trima kasi.
Sampe djaoe malem baroelah itoe perdjamoean di toetoep.
