— 1147 —
Pada kontjonja ini Kok Tjaij sigra bertaoeken maksoednja dan berikoetken djoega perdjandjian- perdjandjian jang bagoes, hingga Tji Hoei trima baek, maski djoega orang bri taoe, dengen itoe tjara ia tiada nanti bisa balik poela ka kota radja.
Satelah soeda tetep begimana itoe perkara moesti di atoer, Poet Hoa sigra berlaloe dan pada esok paginja, dengen bertjampoeran sama orang banjak, ia dan kawan-kawannja soeda kaloear kombali dari dalem kota dan menanti di satoe tempat jang telah di tetepken.
Esoknja pada waktoe sore penggawe pendjara membri lapor ka gedong Sianghoe, bahoea tadi pagi Ong Tji Hoei adjak Ja Loet Tong pergi djalan-djalan ka laen kota, tapi sampe begini waktoe blon kliatan poelang. Lu Kok Tjaij jang trima ini warta djadi kaget sekali; tetapi orang djangan loepa ini tjoema poera-poera sadja.
Sasoedanja liwat tiga hari sedari ia trima itoe laporan, baroe ini pembesar doerhaka tersipoe-sipoe dateng ka astana dan bri taoe Ja Loet Tong dan Ong Tji Hoei soeda linjap. Baginda denger begitoe djadi kaget dan timboel maranja, sigra prenta satoe ponggawa millitair dengen mengepalaken sadjoembla balatentara pergi mengedjer.
Tadi tentoe sadja pengedjeran itoe pertjoema-tjoema sadja, kerna orang-orang boeron soeda djalan tiga hari lamanja dan tiada ketaoean soeda
