— 1627 —
paling boleh di pertjaja; kau taoe, Ya Loet Tong ada radja Pak Hoan poenja orang tanggoengan, tjara bagimana kau lepasken padanja? Brapa banjak kau trima oewang sogokan dari itoe radja asing? Oh, pantes kau begitoe lekas bisa djadi hartawan, hingga kau poenja roema tangga tiada beda sebagi gedongnja radja di dalem hikajat di djaman doeloe!"
Inilah ada poekoelan jang keras sekali bagi itoe dorna. Tapi sabisa-bisa ia menjangkal, soempa kerak- keroek dan sama sekali ia moengkir atas apa jang orang soeda toedoe atas dirinja.
Baginda djadi semingkin mara, maka lantas di prenta bebrapa soldadoe astana tangkep Leng Tjo, Tong Pit Taijkam dan Ang Kok In, jang telah di bawa poelang dari Pak Hoan.
Koetika itoe bebrapa dorna di bawa dateng ka astana, Baginda lantas bikin pertanja'an, tapi marika itoe tiada ada satoe jang maoe mengakoe, maka Baginda lantas angkat Gie Soe Souw Toan sebagi Pembesar dalem madjelis persidangan Kim le Wie aken preksa itoe orang-orang jang berdosa, samentara Ko Siotjia ada di bikin djadi saksi jang teroetama dalem itoe perkara.
Itoe waktoe djoega di dalem dan loear kota telah tersiar itoe warta dan hal jang terdjadi atas dirinja Lu Kok Taij dan kontjo-kontjonja. Satoe kabar girang boeat fihaknja pembesar-pembesar
