— 1601 —
kombali itoe tjap Goanswe jang tadi ia seraken di tangannja itoe pamoeda.
Itoe waktoe Bong Loan dapet inget apa-apa, maka ia lantas panggil Tjeng Bwe dan berkata: „Bila angkau maoe pergi ambil itoe tjap kabesaran, sekalian kau tanja, koetika bikin perdjandjian sama Joe Si ia ada kasiken barang sebagi tanda penetepan atawa tiada?"
Tjeng Bwe mengarti apa jang nonanja prenta, tapi ia sengadja poera poera tegong dan bales menanja: „Akoe moesti tanja sama siapa, Siotjia? Kau tjoema seboetken si itoe si. . . ."
Dengen satoe sentakan Bong Loan poetoesken bitjaranja Tjeng Bwe jang nakal.
„Sasoenggoenja kau ada saorang jang dengki !" kata itoe gadis. Akoe taoe, kau mengarti apa jang akoe prenta, tapi kau kliatan maoe sengadja dan memang maoe mengganggoe padakoe!"
„Boekan begitoe, Siotjia," kata Tjeng Bwe sambil tertawa, „tjoba Siotjia pikir sadja sendiri, kaloe akoe ada oeroesan apa-apa sama sa-orang jang akoe tiada kenal dan orang jang mamerentah tiada kasi taoe namanja, tjara begimana akoe bisa lakoeken itoe prentahan? Seperti Siotjia poenja tjara, si ini, si itoe, siapa bisa taoe.
„Soeda, djangan banjak moeloet lagi!" menjentak Bong Loan. „Kau liat sendiri, dalem ini gedong sekarang ada saorang loear, apa kau tiada kwatir kita poenja resia djadi petja?"
