— 1141 —
Song In sigra bikin sabar hatinja itoe orang-orang dan minta ketrangan, apa jang mendjadi sebab maka ia orang djadi berklai. Djoega masing-masing lantas kasi taoe she dan namanja, serta asal-oesoelnja dari mana. Setelah Tjo dan Ouw-Jan menoetoerken oeroesan roemanja, njatalah ka doea orang itoe satoe sama laenterkena familie; Tjo Kongtjoe poenja le, adé iboenja, menika sama Ouw Jan poenja 'ntjek, ajahnja poenja adé.
,,Kenapa kita siang-siang hari seperti di dalem kagelapan, hingga adoe kepelan sama familie sendiri!" begitoe achir-achir Ouw Jan Peng berkata sambil tertawa.
Tjo Kongtjoe lantas berloetoet dan minta maaf, kamodian ia berpaling pada Song In seraja minta di bri taoe, sekarang di mana adanja itoe nona pendjoeal koeda, tapi dengen roepa menjesel jang di tanja bri penjaoetan, ia tiada dapet taoe lagi orang itoe pergi ka mana, hingga Boen Pa di sitoe kliatan berdoeka.
,,Ouw Jan Heng poenja brangkat akoe maoe tahan doeloe sampe sabentar lagi," kata Song In, ,,pertemoean kita orang di ini hari ada sanget mengagoemken, maka akoe maoe adjak poelang doeloe boeat makan minoem, tjoema blon taoe Dji-wie Hengtiang bisa moefaket atawa tiada?"
Dengen berbareng Ouw-Jan Heng dan Tjo Kongtjoe oetjapken perkata'an jang menjataken
