— 1543 —
Goanswe oeroengken itoe perkara,“ kata poela Ouw-jan Peng, „kita orang tiada ingin menampak perkara tiada enak di kamodian hari.“
„Dalem ini perkara akoe menerangken, boleh djadi saorang laen nanti dapet hoekoeman bila brani menetepken oeroesan kawin di dalem peprangan, tapi boeat akoe,“ tiada,“ kata Bong Loan.
„Djangan lagi baroe satoe, kendati poen sepoeloe orang boeat akoe tida nanti mendjadiken halangan.“
Semoea orang denger begitoe djadi heran, dan saling meliatin pada kawan-kawannja sendiri. Maski begitoe, tiada oeroeng marika tjoba menjega lagi, tapi Bong Loan tetepken kahendaknja, maka maoe tiada maoe marika itoe lantas moendoer dari itoe roewangan.
Poet Hoa Sinsiang dan Ang Kokkioe koetika liat itoe sekalian panglima prang menjataken tiada moefaket, serta nasehatken Goanswenja aken djangan trima baek itoe oeroesan. hatinja merasa sanget tiada enak. Ia orang kwatir itoe kapala prang nanti berbalik pikir dengen poetoesan jang ia soeda ambil, tapi kamodian ia merasa girang, tempo liat penjega'annja itoe semoea tiada berasil satoe apa.
„Sekarang begimana?“ begitoe Poet Hoa menanja pada sasoedanja itoe sekalian panglima oendoerken diri.
„Bawa itoe poetri. dateng ka mari,“ mamerentah Bong Loan.
