— 1507 —
bawa taoenja sendiri," kata Ang Kokkioe. „Poen
dalem ini keada'an semoea ada lantaran ia sendiri ampoenja kealpa'an; dalem gerakan akoe
dapet liat, roepanja moesoe seperti ada mengatoer
tipoe jang bisa menerbitken tjilaka, brapa kali
akoe tjoba tjega padanja aken djangan bikin pengedjeran pada moesoe jang melariken diri, tapi
nasehat itoe pertjoema sadja. Sekarang ia soeda
kena di tangkep, biar poen itoe semoea ada dari
lantaran kateledorannja sendiri, tapi kita tiada
boleh tinggal diam sadja dengen tiada membri
pertoeloengan padanja. Maka dari itoe harep
Sinsiang soeka mengasi pikiran, begimana kita
orang moesti berdaja oepaja aken toeloeng pada
Taij Tjoe soepaja dapet di ambil lagi dari tangannja moesoe?"
Itoe ferdana mantri berdiam sadja, tapi ia kliatan ada berpikir apa-apa.
„Djikaloe kita orang tiada bisa menoeloeng Taij Tjoe dari itoe kasoesahan di mana kita ada moeka aken bertemoe pada Baginda radja, jang soeda pertjajaken pada kita dalem ini pakerdja'an," kata poela Ang Kokkioe dengen roepa semingkin bingoeng. „Toeroet akoe poenja pikiran, paling baek sekarang kita menjerang dengen mati-matian pada tentara moesoe. Kita orang masi ada mempoenjai djoembla bebrapa riboe soldadoe, dengen itoe semoea rasanja akoe masi sanggoep aken bikin satoe penjerangan heibat pada marika itoe."