— 1451 —
mana? Boeat dapet taoe itoe semoea, baeklah kita moendoer sedikit ini tjerita.
Sedari dapet pertoeloengan soedaranja waktoe ia anjoet di kali, sasoedanja koeboerken mait swaminja, Siok Nio lantas adjak So Nio poelang ka kampoengnja sendiri. Siok Nio ada poenja anak lelaki poetranja Pang Tikoan almarhoem, Po In namanja, jang koetika itoe soeda beroesia limablas taon. Ini anak sanget pinter, dan dalem oesia begitoe moeda soeda dapet gelaran Sioetjaij.
Masa idoepnja Pang Tikoan ada bersobat kekel sama Gak Kong, dan ia ini ada poenja satoe anak prampoean, jang oemoernja lebi renda satoe taon dari Po In. Ka doea orang toea itoe masing-masing telah bikin perdjandjian aken nikaken anaknja-satoe sama laen. Tegesnja antara Pang Kongtjoe dan Gak Siotja, sedari masi ketjil soeda di pertoendangken.
Sedari Gak Kong melataken djabatan itoe waktoe ia tiada dapet kabar satoe apa lagi tentang Pang Tikoan, tapi kamodian ia dapet kabar, itoe pembesar telah menoetoep mata, sedeng anak dan istrinja telah berlaloe dari tempat di mana doeloe swaminja ada melakoeken itoe pakerdja'an.
Gak Kong selaloe kenangken itoe perkara, satoe waktoe ia inget maoe tjari taoe dan panggil itoe familie aken berkoempoel sama-sama, tapi apa maoe tiada lama di tempatnja telah terbit kariboetan, maka niat djadi katoenda. Sampe
