— 1438 —
Tjo Mama sigra ambil arak dan boea-boea'an
jang tadi, kamodian itoe tiga orang pergi ka blakang praoe, di mana marika itoe doedoek bersila
di atas papan sambil mengadepin tjawan.
Tatkala itoe soeda soenji sekali, kerna baek dalem itoe praoe, baek laen-laen praoe, semoea orang soeda tidoer, sebab waktoe itoe poen soeda djaoe malem. Remboelan baroe kliatan mera-mera sadja di bagian sebla Timoer, tapi bintang jang berkelap kelip di atas langit jang berwarna biroe ada riboean banjaknja.
Perdjamoean itoe lantas di moelai, ganti berganti ia orang bikin kering glasnja; Tjo Mama dan Kwe Si minoem sedikit, ia sengadja lo-lo pada Ong Ma, jang aken mendjadi korbannja.
Dengen tjara begitoe tiadalah mendjadi heran, sabentaran sadja Ong Ma djadi mabok keras, ia mengglepak di atas papan tiada beda sebagi bangke.
„Hahaha.. prampoean tjoerang!" kata Kwe Si sambil tendang orang poenja kapala dengen kakinja. „Ada oewang bilang tiada, soeda begitoe brani soempa kerak-keroek! Tjoba kaloe itoe tempo kau bitjara sabenernja sadja, soeda tentoe kita orang tiada goenaken kakedjeman pada kau!"
„Orang jang begini memang pantas di bikin mampoes!" kata Tjo Mama djoega sambil tentang orang poenja moeka. „Tapi akoe harep kau poenja roch
