— 1423 —
akoe sanget kwatir hal itoe aken nanti mengabarken satoe perkara djelek boeat kita poenja fihak.“
„Itoelah tjerita gila, tiada tjoekoep boeat kita orang pertjaja, Mama!“ kata Kwe Sie dengen angkoe. „Pendeknja akoe kasi taoe, hal ini sedikit poen akoe tiada merasa kwatir atawa dapet pengrasahan begitoe!“
Tjo Mama liat kelakoeannja Kwe Si begitoe matjem, ia poen djadi toeroet merasa girang.
Tapi kaberoentoengan jang di rasa oleh itoe doea keparat tiada berdjalan lama. Pribahasa poen ada kata: Sekali poen goenoeng, kaloe setiap hari di patjoelin, lama kelama'an nistjaja djadi abis. Begitoe djoega telah kedjadian dengen itoe doea orang, jang setelah berselang tiga taon kamodian, itoe bebrapa ratoes tail perak soeda djadi loedes sama sekali.
Sekarang baroe itoe doea orang merasaken berbagi-bagi kasoesahan jang menerdjang atas dirinja. Penjeselan dateng berganti-ganti; ia orang seselken dirinja, waktoe ada oewang tiada perloe beli barang jang berharga, boeat di djoeal atawa di gade, aken loepoetken diri dari kasoesahan.
Boeat meliwatken pengidoepan sehari-hari, maoe tiada maoe Tjo Mama pegang lagi pakerdja'annja jang doeloe, jaitoe menjengkauw atawa trima prentahannja njonja njonja hartawan dengen
