— 1369 —
rasa kaberatan, marilah kita orang mengoendjoengken ka pasanggrahannja.“
„Ja, akoe poen sanget ingin bisa lantas bertemoe padanja,“ saoet Ko Kong dengen girang, „tapi sekarang baeklah Tjiangkoen ketemoeken lebi doeloe padanja, kabarken apa soeda kedjadian dalem ini peprangan. Akoe sendiri seabisnja mengoeroes apa-apa sigra nanti menjoesoel ka sana.“
Song In bilang baek dan lantas berlaloe.
Koetika sampe di pasanggrahannja Tjo Goanswe, ini kepala prang tempo di kasi taoe dalem peprangan soeda dapet ka menangan, Thian Poet Pa dan Pa Koensoe soeda kena di tangkep hatinja djadi girang sekali. Lebi djaoe Song In bri taoe, begimana ia soeda dapet pertoeloengannja Ko Kong, begimana itoe orang bangsawan hendak dateng mengoendjoengken pasanggrahannja, hingga Tjo Goanswe djadi semingkin girang.
Sasoedanja kasi masoek Song In dan laen-laen panglima poenja gandjaran dalem Kong-Lo-pouw, Tjo Goanswe sigra mengatoer marika itoe aken menjamboet datengnja Ko Kong.
Bener djoega tiada antara lama dengen barisannja Ko Kong telah sampe di mana ini orang bangsawan telah di samboet dengen hormat oleh Tjo Goanswe dan sekalian panglimanja. Kamodian marika itoe masoek ka dalem pasanggrahan dan doedoek berkoempoel di sana.
