— 1363 —
tiada lama lagi tentara negri aken sampe di itoe tempat dan boenoe padanja.
An Gin jang mendjadi djoeroemoedi dari itoe praoe sigra dajoeng kandarannja menghamperi, ka pinggir. Thian Poet Pa lantas lompat lebi doeloe dari jang laen laen ka dalem praoe. An Gin lantas mendoega itoe orang tentoe ada kapala begal jang telah melariken diri, maka tiada tempo lagi, koetika Thian Poet Pa naek ka atas praoenja, lantas ia goenaken gala-gaet dan dengen tjara begitoe Thian Poet Pa kena karingkoes.
Itoe kepala begal berontak-rontak dan hendak lepasken dirinja dari itoe pegangan tapi pertjoema sadja, kerna itoe matjem sendjata poen aneh djoega, kerna semingkin orang bergerak, semingkin kentjeng njangkelnja; djoega The An Gin ada sampe tegoe aken tiada bisa bikin korbannja sampe bergerak poela.
Ia sigra menoebroek, di bantoe oleh bebrapa soldadoe, tangan dan kakinja Thian Poet Pa lantas teriket kentjeng.
Pa Koensoe tatkala liat Thian Poet Pa soeda kena di tangkep hatinja djadi kaget sekali. Ini Koensoe merasa bahoea itoe tempo bahaja maoet aken dateng pada dirinja bila ia tiada tjepet singkirken diri dari itoe tempat. Sigra ia komendir sasisa tentaranja oendoerken diri dari itoe tempat jang tjilaka.
