— 1337 —
„Akoe tiada maoe bertanding sama laen orang, akoe ingin bertanding doeloe pada kau, kerna akoe kapengen liat sampe di wates mana kau poenja kasombongan!“ kata itoe panglima negri sambil menoeding pada Hoei Liong.
Sabelonnja Hoei Liong menjaoet, kawannja tadi soeda menerdjang pada panglimanja Tjo Goan-swe, hingga ia ini djadi sanget mara dan laloe menangkis.
Di sitoe lantas terbit satoe pertempoeran jang heibat.
Tapi perklaian itoe tiada berdjalan lama, baroe bebrapa djoeroesan sadja itoe panglima begal soeda terdjoengkel dari atas toenggangannja dengen tiada bernjawa lagi.
Meliat begitoe Hoei Liong djadi sanget mara, ini Tauw-bak sigra madjoeken koedanja dan menjerang dengen seroe sekali.
Pertempoeran ini ada lebi heibat dari jang pertama, kerna soeda sepoeloe djoeroesan blon kliatan ada jang menang atau kala. Doea panglima laen dari fihak tentara negri dengen berbareng lantas menerdjang, hingga Hoei Liong kena di keroeboetin tiga.
Maski begitoe ini Tauw-bak tiada kliatan djadi berlipat ganda. Ia ini sanget sebat; dengen begitoe baek ia bisa menangkis tiga sendjata jang dateng dari moesoe-moesoenja, sebaliknja setiap
