— 1285 —
dalem pengidoepan jang haram, Hengtiang saorang jang sopan boeat apa tjampoer taoe lagi itoe perkara."
―„ Tida, akoe tiada indaken lagi kasopanan!"
―„ Tapi kaloe Hengtiang tiada menoeroet akoe poenja nasehat baek, tentoe dirimoe bakal dapet tjilaka. Dari roema kita ingin beroleh pangkat kaloe sampe di sini maoe tjari kabinasa'an, biar poen begimana djoega akoe tiada nanti soedi toeroet dateng kemari."
―„ Djikaloe Hiante ingin dapet pangkat, bekerdja dari sekarang; lagi sekali akoe bilang, kematian aken dateng terhadep pada djiwakoe, hatikoe djadi dingin seperti saldjoe sama itoe kabesaran dan laen-laen. Bermoela akoe doega, bahoea menoesia di doenia ada bersatoe hati, tapi ternjata doega'an itoe sanget kliroe; betoel sebagimana orang sering bilang: laen orang laen pikirannja. Wie Sioetjaij di Tjiauw Boen Koen akoe pandang ada sobat jang sedjati, tapi soeda berbalik hendak keniaja padakoe: Kou Tjan poen akoe doega ada temen jang aseli, tapi sajang orang itoe soeda melangka dari perdjandjian-perdjandjian sendiri. Hiante bisa pikir sendiri, apatah dirikoe satoe patoeng atawakah boneka kajoe maka sasoeda katahoei erang berboeat begitoe masi tinggal tiada berboeat apa-apa?"
„Oh, kaloe Hengtiang bilang begitoe, njatalah
