— 1257 —
kaget. „Brangkali telepas dan kau tiada iket dengen ati-ati!"
„Tiada bisa, Kongtjoe! Akoe rawat koeda boekannja baroe; itoe koeda memang tiada di iket, hanja ada di dalem istal jang ada di koeroeng dengen palangan kajoe jang terkantjing keras. Tadi koetika akoe maoe tambaken roempoet, itoe palangan soeda terboeka dan koedanja soeda tiada ada!"
Tjo Kongtjoe djadi penasaran, laloe pasang obor terang-terang, tjari di sakiter roema dan di kebon-kebon tapi pertjoema sadja. Sekarang itoe orang moeda djadi mara pada pengoeroes Hotel, kerna ia doega itoe orang jang soeda bermoefaketan sama orang djahat aken tjoeri koedanja. Itoe pengoeroes Hotel koetika di tegor begitoe djadi bingoeng sekali, tentoe sadja ia tiada mengakoe.
„Djikaloe kau tiada kasi penjaoetan jang bener dan oendjoek di mana adanja itoe koeda, djangan bilang keliwatan, akoe nanti kasi bagian jang sedep pada tengkorakmoe, bangsat!" kata Tjo Kongtjoe.
„Demi Allah, akoe sama sekali tiada dapet taoe siapa jang soeda tjoeri Kongtjoe poenja koeda," saoet itoe pengoeroes dengen swara menggeter, kerna liat itoe orang moeda maoe poekoel padanja. „Tapi kaloe Kongtjoe maoe salaken djoega,
