— 1252 —
moesoe-moesoenja. Tapi hal itoe sekarang baekjah kita toenda doeloe sampe nanti di tjeritaken poela, kerna di ini bagian perloe kita oendjoek laen-laen oeroesan soepaja pembatja djadi mengarti baek.
Sadjek tinggal di roemanja Sian Wan-gwe, boleh di bilang keada'annja Tjo Kongtjoe moelai djadi lebi baek. Setiap hari ia selaloe kasi peladjaran silat, doedoek koeda dan laen-laen kepandean pada Song In Kongtjoe; ini doea orang soeda djadi begitoe roekoen, satoe dengen laen bisa saling menjinta sebagi djoega pada soedaranja sendiri. Pada satoe hari Song In hamperi Tjo Kongtjoe di kamarnja, sama siapa dengen girang ia berkata: „Siauwte dapet kabar berhoeboeng dengen pembrontakan di Selatan-Oetara, pamerenta di kota radja telah adaken pintoe terboeka boeat trima orang gaga, maka akoe rasa itoe ada tempo jang baek boeat kita orang dapetken pangkat."
„Djoestroe akoe poen baroe trima itoe warta bebrapa hari sadja dan niat maoe tanja Hiante poenja pikiran, tapi tiada doega sekarang Hiante sendiri menegor," saoet Tjo Kongtjoe, jang lantas kasi taoe, ia ada niatan boeat pergi ka sana aken toeroet bikin oedjian.
„Menginget Hengtiang poenja kepandean silat begitoe tinggi, sedeng kebisa'ankoe poen tiada haroes di tjela, maka akoe brani bilang, itoe
