— 1247 —
di bikin poetoes oleh Bong Loan, jang kwatir apa
brangkali ajahnja soeda djadi korban di tangannja
itoe orang-orang kedji.
„Abis begimana, apa itoe orang-orang jang Gak-Hoe prenta boenoe Ko Teng Tjan telah dapet sampeken maksoednja apa tiada?" Menanja Bong Loan dengen hati berdebar-debar.
Sablonnja dapet djawaban, hatinja Ko Siotjia merasa sanget kwatir, kerna poetoesan jang di ambil oleh itoe dorna ada membahajaken djiwanja ia poenja orang toea. Tapi hatinja djadi senang dan njataken soekoer pada Allah, sasoeda itoe dorna kasi ketrangan, bahoea maksoednja boeat boenoe Ko Teng Tjan soeda tiada berasil, kerna orang jang maoe di boenoe bintangnja masi terang, telah dapet pertoeloengan dari saorang laen, dan orang-orang jang ia prenta lakoeken itoe pakerdja'an tjoema ada bebrapa orang sadja jang poelang, sedeng selaennja telah mendjadi korban dari perboeatan itoe.
Terlebi djaoe itoe dorna bitjara laen-laen hal berhoeboeng dengen ia poenja sakit hati sama Ko Teng Tjan; soeda tentoe sadja ini dorna keparat tiada dapet mengetahoei kaloe orang jang di adjak bitjara ada anaknja ia poenja moesoe. „Oh, kaloe begitoe ajahkoe soeda djadi korban dari ini dorna keparat poenja perboeatan-perboeatan kedji!" kata Bong Loan dalem hatinja.
