— 1217 —
Esok di waktoe masi pagi, Tihoe dan istrinja telah oendang Bong Loan doedoek bersantap, begitoe poen Tjeng Bwe ada di silaken doedoek dalem itoe perdjamoean; beroelang-oelang itoe pembesar membri banjak nasehat baek pada Ko Siotjia, jang oleh itoe gadis poen telah di oetjapken trima kasi.
„Teroetama kau moesti inget, dalem segala perkara djangan kaboeroe napsoe, djangan sampe kau poenja resia dapet di ketahoei sama kawanan dorna di sana," kata Tio Tihoe. „Dalem oedjian kau moesti pake she dan nama palsoe, dengen begitoe kahendakmoe dapet di sampeken dengen tiada mendapet halangan."
„ Trima kasi atas Siokhoe poenja pesenan jang berharga itoe," saoet Bong Loan."
Sasoedanja poeas makan minoem, Ko Siotjia dan Tjeng Bwe satoe persatoe lantas ambil slamet tinggal pada Tio Tihoe dan istrinja, dengen di anter oleh itoe doea pengikoet ia orang sigra berlaloe dari bilangan Kang Tjioe.
Menoeroet sebagimana jang di pesen, sedikit poen Bong Loan tiada brani berlakoe alpa dalem itoe perdjalanan, ia orang djalan teroes dan tjoema di waktoe malem sadja di goenaken boeat mengaso.
Betoel di boelan Tjhia-gwe marika telah sampe di kota radja.
