— 706 —
bertamba besar akoe poenja kekwatiran adalah dalem pembitjaraän itoe doea orang akoe dapet kanjata'an, nanti diawalnja moesin Tjoen jang aken dateng Pak An Ong maoe siapken pasoekan prangnja menjerang ka kota radja samentara Ko Tjoe-swe soeda berdjandji dengen pasti dalem itoe pakerdja'an diam-diam ia nanti membantoe djadi penjamboet dari bagian sebla dalem. Berbagi-bagi gerakan dari itoe doea orang boleh dibilang tjoema akoe saorang jang dapet taoe, kerna akoe sering mentjoeri denger pembitjara'an itoe doea orang besar dari selat djendela. Begitoelah dari lantaran liat gerakannja Tjoe-swe dan Pak An Ong ada sanget mengawatirken maka dengen tiada pikir tjape lela jang akoe bakal dapetken antara perdjalanan dari Gan Boen Koan ka kota radja, tiada oeroeng akoe brangkat ka mari boeat kasi taoe itoe perkata pada .........."
Souw Gie-soe jang bermoela kaliatan bagitoe sabar, di itoe tempo ia kaliatan djadi amat maranja. Alis matanja djadi berdiri betoel seoempama matjan jang hendak menoebroek pada koerbannja.
„Bangsat! oh djahanam jang terkoetoek!" treak Souw Gie-soe sambil mengetok medja, bidji matanja terpoeter meliatin Song Sie, hingga ini orang boeroen rasaken badannja di itoe sa'at djadi lemes.
Dengen swara lebi keras dari jang pertama, itoe pembesar berkata poela: „Sasoenggoenja kamoe
