— 86 —
orang banjak jang pande dan beriimoe jang sakti, brangkali dia masoek di dalem tana, troes lari pegi di Tiang Aan minta soldadoe pertoeloengan; disitoe djoega Gwanswe Tjouw Kie Loen prenta 3 panglima prangnja boeat toengoe di kota Pek Liang Koan aken tahan sama dia jangan sampe dia bole liwat, dan orangnja trim prenta sembari berkata: itoe atoeran ada betoe sekali.
Tjerita Thia Kauw Kim sesedanja djato dari koeda dia lantas klenger tiada ingar orang, di koepingnja kadengeran 1 swara ada orang pangil dan berkata: he Louw Kok Thia Ongheng lekas bangoen, disini boekan tempat kita.
Serta Thia Kauw Kim boeka mata liat didalem oetan di bawa poehoen besar tiada djaoe kliatan ada 1 roema gedong di depan gedong ada satoe orang lagi mendatengin tangannja bawa sapoean njamoek dengen moeka manis tetawa mengadep di hadepan Thia Kauw Kim, dan Thia Kauw Kim dia bangoen doedoek di tana dengen berkata: ija Siantiang jang dateng apa Giam Lo Ong jang prenta boeat tangkep saija atawa maoe kasi saija pangkat Tian He Touw Touw Tee? Dan itoe orang sahoetin: 01 boekan saija dateng maoe menoeloeng pada kau.
Thia Kauw Kim berkata: he ini orang perkataännja tiada kroewan, sebab kita soeda mati masa kau bisa toeloeng bikin hidoep kombali!
