— 239 —
Nanti kami kas taoe di hadepan baginda radja.
Maka sahabisnja bitjara kadoea orang itoe lantas ia mengadep pada baginda radja Lie Sie Bin ia berkata: — ja baginda tjilaka lah ini sekali, oleh kerna To Louw Kiongtjoe telah diboenoe mati oleh Lo Tong.
Apabila baginda radja Lie Sie Bin denger perkatahan itoe lantas djadi mara besar troes berkata: — he! betoel itoe anak soendel tiada menoeroet kami poenja prenta, sekarang ini itoe Lo Tong bole lantas di iket bawa dateng disini dan lagi itoe mantri To Hong ia ada di mana?
Thia Kauw Kim: sekarang mantri To Hong ada di pintoe Ngo Moeij
Maka baginda radja Lie Sie Bin lantas prenta Oettie Kiong soeroe pergi tjari, maka Oetti Kiong dapet prenta dengen sigrah laloe kloear aken pegi tjari serta ketemoe lantas di adjak masoek kedalem, samantara sampe lantas mantri To Hong berloetoet di hadepan dengen panggil: — ja sri baginda dari sebab to Louw Kiongtjoe soeda mati barangkali hamba ada berdosa, maka itoe hamba harep djangan di kasi hoekoeman.
Radja Lie Sie Bin: — ja mantri dari angkau tiada sekali-kali ada kesalahan, dari sebab kami poenja pengharepan kapengen doea negri ini bersobat mendjadi slamat, tiada taoe jang itoe Lo Tong soeda binasaken To Louw Kiongtjoe.
