— 173 —
sekarang baik lah kasi saija kloear boeat saija lawan dan tangkep dia.
Lo Tong: — baik lah, djikaloe ade maoe pegi aken tetapi misti dengen hati-hati.
Memang ini Lo Djin masi anak ketjil dan tiada bisa bertoenggang koeda maka waktoe itoe lantsa ija ambil ija-poenja 2 pekakas gembolan besi troes kloear benteng, disitoe Goanswee Lo Tong lantas adjak dia poenja panglima kloear benteng boeat sengadja meliat dia poenja soedara kloear berprang, sekalian Thia Kauw Kim djoega toeroet kloear, maka samantara sampe di loear kliatan lah ada sa’orang prampoean jang elok sekali roepanja, dia poenja moeka poeti, bibirnja mera dan tangannja kliatan aloes sekali, serta pake sepasang giwang di koepingnja dengen berbadjoe koening serta pake Koen semoea tersoelam dari benang mas pake gambar oeler naga, serta kliatan terlaloe amat bagoes adalah seperti djeman dahoeloe kala jang diseboet rama Ong Tjiauw Koen Nio-nio poenja roepa.
Satelah To Louw Kiongtjoe mendapet liat kloearlah sa-orang anak ketjil maka Kiongtjoe lantas berkata : — he angkau anak ketjil jang makan nasi blon taoe lapar, soeda brani dateng mengadep disini kami meliat angkau masi anak ketjil djadi kami tiada ada itoe hati boeat bikin binasa padamoe, lebih baik sekarang angkau lekas poelang.
