— 170 —
soeda boenoe itoe andjing Souw Pak tentoe dapet gandjaran, sekarang apa soedara maoe toeroet pada kami atawa hendak poelang kombali,
Lo Djin : Ja gandjaran itoe begimana nanti di hadepan baginda radja sadja, sekarang saija memang harep boeat toeroet pada enko sadja boeat boenoeh moesoeh.
Lo Tong : djikaloe begitoe baiklah, maka kadoea soedara itoe lantas balik poelang di bentengnja, maka di dalem benteng semoea panglima serta meliat Goansweenja poelang, maka sekalian marika itoe girang lah di dalem hatinja laloe keloear berpapak sambil berkata: Ja Goanswee slamatlah, slamat, brangkali Goanswee di tempat medan peprangan ada sekikit kaget.
Demikian di waktoe itoe djadi bersama masoek ka dalem benteng, maka di dalem benteng ada Thia Kauw Kim meliat Lo Tong soeda poelang dan Thia Kauw Kim lantas pangil: he tjoetjoe sedari kami liat tjoetjoe di boeroe oleh itoe andjing Souw Pak, maka di dalem kami poenja hati mendjadi kliwat kagetnja.
Satelah Lo Tong mendenger lantas ija mendjawab serta kasi tierita jang soedaranja soeda dateng boeat menoeloeng dia, satoe persatoe di kasi tjerita dengen terang.
Setela Thia Kauw Kim mendenger lantas mendjadi senang di dalem hatinja sambil berpoedji :
