— 142 —
Soen Liep, jang mendjadi Tjihoenja, ada terbitken kariboetan di kota Tengtjioe. Kendati kariboetan itoe tida berhoeboeng padanja dan sekali-kali ia tida taoe atawa tjampoer, tapi lantaran ada terhoeboeng familie, toch ia koeatir nanti terembet djoega.
Doegahan ini poen ada dengen sabenernja. Kerna tjobalah kaloe ia tida kaboeroe lari, tentoe soeda lama dirinja tertangkep
Tapi sabelonnja bahaja besar itoe dateng menimpa, Gak Ho jang ada bergelar Thiatkiauwtjoe, lantas singkirken diri ka laen tempat. Dalem perdjalanannja ini tida ada soeatoe halangan atawa sangkoetan jang memberati, kerna istrinja soeda lama meninggal doenia. Dengen itoe nama samaran ia berdjalan teroes, dan boeat samentara waktoe ia inget pada Lioe Pwe-tong, sala satoe sobat baek jang tinggal di kota Kiankong.
Tapi sasampenja di ini kota, Lioe Pwe-tong jang ditjari itoe tida ada, hingga terpaksa ia moesti trima tawarannja Kwe Keng dan tinggal dalem gedongnja Ong Tiauw-ien sabagi djoeroe pelajan.
Demikianlah orang gaga ini poenja riwajat dan asal-oesoel jang sebenernja. Maka djoega, di waktoe sempet atawa menganggoer, ia djarang sekali kaloear, kerna selempang ada orang kenalin.
