— 141 —
moerid, dan ia ada lebi perloeken oeroes pakerdjahan jang mendjadi kawadjibannja, dari pada bergoeroe pada si kaparat jang banjak kali telah dipetjoendangin orang.
Pakerdjahan jang Boen-ho lakoeken itoe, boekan sadja menjenangken hatinja itoe Swanwie, hanja semoea orang saisih roema poen ada merasa soeka padanja, kerna salaen bisa merenda dan manis boedi bahasa, djoega amat radjin.
Kaloe tida ada kerdjahan, Boen-ho djarang sekali kaloear melantjong atawa djalan-djalan, sabagimana laen-laen orang jang bekerdja di itoe gedong, sering tjari kasenangan hati. Dalem sagala waktoe Boen-ho tida loepa berhati-hati boeat mendjaga diri.
Mengapatah ia moesti berhati-hati? Siapatah sabenernja ini Ien Boen-ho?
Ia poen boekan laen dari pada Gak Ho. Sedeng nama-nama Ien Boen-ho sakedar dipergoenaken boeat menjamar.
Sabagimana di bagian kasatoe pembatja telah taoe, bahoewa Gak Ho itoe soeda lari dari gedongnja Ong Hoema, jang sampe sekarang masi ditjari teroes, dan lantaran koeatir katangkep, maka dalem perdjalanan boeron itoe ia tida brani seboetken nama sadjatinja,
Jang mendjadi lantaran boeronnja ini orang gaga, kerna ia poen soeda denger bagimana
