— 311 —
Pwe Soan rasa bitjara itoe betoel djoega, maka ia tida brani terlaloe memaksa dan berkata:
„Ja, sajang sekali kaloe Tonwheng tida toeroet tjampoer, sedeng akoe berdoea Joheng ada harep betoel kaoe poenja bantoean. Maka sekarang, bagimana baeknja kita moesti atoer ini perniatan jang besar ?”
„Ini niat baek dilandjoetken,” kata Touw Hin: „sedeng kaoe di sini mengatoer dan sadia-sadia apa jang perloe boeat itoe persiapan, akoe bersama Joheng nanti pergi ka Tokliongkong boeat adjak Tongdjin dateng ka mari.—Nah, kaloe Tongdjin djoega ada di sini bersama-sama, akoe tentoe tida koeatir lagi.”
„Benerlah,” kata Jo Liem sambil memanggoet: „akoe satoedjoe sekali dengen kaoe poenjá bitjara. Belon taoe bagimana Pwe Koko poenja pikiran ?”
„Begitoe poen baek,” saoet Pwe Soan jang djoega amat moefakat, kerna kaloe Lie Eng djoega bisa dateng berkoempoel, keadahannja djadi bertamba tegoeh.
Kamoedian tiga orang gaga ini doedoek makan minoem dengen bersoeka-soeka hati. Berselang doea hari Touw Hin dan Jo Liem membri slamat berpisa pada Pwe Soan. Dari ini tempat marika berangkat ka bilangan Tjetjioe dan sasampenja di Swatang iaorang menoedjoe ka pasar kampoengan,
Di sebla depan ada kaliatan banjak orang lagi bergeroemoetan. roepa-roepanja lagi menonton
