— 310 —
„Bagoes!” kata poela Touw Hin dengen hati senang.
Kamoedian katiga orang itoe laloe berangkat ka lemmatjwan, hingga maoe atawa tida, terpaksa Touw Hin menoeroet djoega.
Sasampenja di itoe roema, iaorang laloe doedoek beromong-omong.
Pwe Soan njataken ia poenja niatan boeat geraken satoe angkatan perang jang tegoe. Tapi boeat adaken itoe, lebi doeloe maoe dikoempoelken orang, ramsoem, alat sendjata, koeda dan sabaginja, boeat geraken satoe pakerdjahan besar.
„Demikianlah kita-orang poenja niatan,” kata poela ia kaloe kita maoe lakoeken soenggoe-soenggoe, akoe tida pertjaja jang geraken itoe tida berhasil.”
„Itoe poen boleh,” kata Touw Hin: „tapi akoe rasanja tida bisa toeroet berdiam lama-lama di ini tempat, kerna sabagimana Joheng dan Pwehong sendiri ada taoe, bahoewa akoe poenja hoekoeman belon didjalanken abis.”
„Djoestroe itoe ada lebi baek lagi, boekan ?” kata Pwe Soan.
„Baek boeat akoe, tapi tida baek boeat akoe poenja Tongdjin. Tjoba kaoe pikir, seande pembesar negri dapet taoe jang akoe ada berdiam di sini, tidakah Tongdjin Lie Eng djoega boleh toeroet dapet soesa kaloe akoe ditoedoeh djadi orang pemboeronan ?”
