— 292 —
Touw Hin poenja hati djadi amat terharoe. Dengen tida dirasa lagi aer mata laloe mengoetjoer di sapandjang pipinja.
Orang gaga ini laloe bersembajang dan berloetoet ampat kali di hadapannja itoe djisim jang ia sanget hormati dan pandang tinggi, sedeng hatinja ada berkata:
„Dari doeloe djoega waktoe akoe maoe berpisa, akoe soeda peringeti: sasoedanja tida ada akoe moesti djaga diri lebi baek, Loya. — Dan achir-achir njatalah perkatahankoe itoe boekannja persadja, sekarang telah berboekti.“
Sasoedanja lakoeken peradatan dihadepannja itoe djisim, Touw Hin laloe berdjalan ke sebla dalem dan dapetken Giok-go lagi doedoek omong-omong pada katjintahannja. Baeklah djoega itoe waktoe, itoe sapasang manoesia kedji boekan lagi bertjinta-tjintahan, tapi toch datengnja Touw Hin, membikin itoe prampoean dapet sedikit rasa terkedjoet dan memandang dengen heran.
„Naynay, Loya itoe sakit apatah, maka dengen mendadak boleh djadi mati?“ menanja Touw Hin, dengen tida membri hormat lagi pada itoe doea orang: „pada waktoe akoe maoe berangkat ka loear kota, badannja akoe liat ada segar dan tida berpenjakitan, soenggoe heran sekali, orang jang sehat begitoe boleh meninggal doenia?“
„Omongan apatah begitoe?“ saoet Giog-go dengen merasa koerang senang: „apa kaoe tida taoe, bahoewa sasaoeatoe manoesia oemoernja soe-
