— 291 —
djang--boedjang maski soeda dapet taoe doedoeknja perkara jang betoe, tapi tida ada saorang jang brani njataken apa-apa, hingga Giok-go djadi kira, bener-bener akalnja telah berhasil.
Dan boedjang inilah jang djoetroe ditanja oleh Touw Hin.
Sigra djoega orang jang ditanja itow laloe kasi katerangan sabagimana jang tadi ia soeda tjeritaken pada kawannja.
Denger begitoe, Touw Hin laloe mengelah napas sambil gojang-gojang kapala.
„Ah, prampoean tjilaka doerhaka!“ kata ia dengen soeara menggerendang: „dan lebi lagi itoe tjoetjoe jang amat terkoetoek!.........“
„Tapi, Hohan,“ kata itoe boedjang: „lebi baek kita-orang toetoep moeloet, dari pada banjak tjerita jang boleh mendatangi bahaja atawa katjilakahan.“
„Sakarang di mana djinasat Loya ditaro?“ tanja Touw Hin jang tidak perhatiken orang poenja bitjara: „apa soeda dimasoeki ka dalem peti?“
„Belon. Djinasat itoe masi ada di roewang pertengahan.“
„Akoe maoe tengok.“
Sambil kata begitoe ia berdjalan masoek.
Sasampenja di tempat jang dioendjoek, betoel sadja ada kaliatan djinasatnja Lie Kwa-eng jang ditaro dengen zonder terdjaga. Touw Hin dateng mendekati dan liat moekanja itoe djinasat ada bebrapa tanda biroe bekas dipoekoel.
