— 285 —
hari ia tida loepa memikiri itoe pembesar jang baek boedi, jang soeda menoeloeng dirinja dari hoekoeman berat.
Touw Hin kapingin sekali bisa berboeat apa-apa jang bergoena bagi Kwa-eng poenja kaperloean. Djangan kata baroe kaloearken tenaga, sekali poen moesti liwatken laoetan api dan mengorbanken djiwa, ia tentoe tida aken toelak.
Tapi sakean lama itoe pembesar tida minta ia berboeat apa-apa, hingga ia poen tida bisa oendjoek kasatiahannja hati.
Di itoe tempat jang baroe Touw Hin merasa enak djoega. Kaloe soeda abis lakoeken sagala pekerdjahan, ia soeka djalan-djalan. Kerna lakoenja jang sopan dan djoedjoer, tambahan boedi bahasanja jang manis, membikin banjak orang djadi soeka padanja.
Begitoelah di ini tempat jang baroe Touw Hin soeda bisa berkenalan pada satoe pemboeroe. Hingga lama-lama ini doea orang djadi sobat jang baek.
Kaloe itoe pemboeroe dapet binatang oetan, iaorang laloe masak dan dahar sama-sama, sedeng Touw Hin jang mempoenjai sedikit oewang, laloe beli arak dan minoem dengen sagala soeka hati bersama itoe sobat baek.
Pada soeatoe hari, Touw Hin inget jang badjoenja masi ada doea. Kerna satoe hari sabelonnja ia berangkat ka mari, itoe badjoe jang kotor ia
