— 284 —
„Kenapa?...... kenapa?......“ begitoelah si kaparat poera-poera menanja: „kenapa akoe poenja Lopehoe, Peh'm?“
„Ia kasampar. Toeloenglah. Siauwtit,“ djawabnja itoe prampoean doerdjana, jang merasa girang meliat akalnja bisa klaboein pada boedjang-boedjang.
Marika itoe lantas pada berlari-lari ka dalem kamar. Tapi Lie Kwa-eng didapetken soeda tida bernjawa.
Boedjang-boedjang semoa pada menangis waktoe dapet taoe itoe pembesar toea jang mendjadi madjikannja soeda tida bernapas. Marika inget bagimana baeknja itoe madjikan toea, jang sabegitoe lama djarang sekali taoe memaki atawa menjomel. Lantaran itoe djoega, maka kamatiannja telah membikir orang djadi merasa sedi.
Dan sekali-kali marika tida taoe, kaloe itoe semoa tjoema ada tipoenja itoe doea manoesia kedji.
...... ...... ...... ...... ...... ...... ...... ...... ......
...... ...... ...... ...... ...... ...... ...... ...... ......
Sagala orang repot mengoeroes djinasatnja Lie Kwa-eng, baeklah kita tinggalken doeloe sabentaran boeat meliat pada Touw Hin. Kerna djoestroe di ini harian Kwa-eng menoetoep mata itoe orang gaga poen hendak dateng menengoki.
Sedari ia dipindaken ka loear kota, Touw Hin itoe lakoeken kerdjahannja dengen betoel. Satiap
