— 276 —
„Ah, njatalah kaoe tida mengarti, nona manis, jang dengen membilang begitoe, akoe ada mempoenjai laen maksoed.“
„Lekaslah bilang, akoe kapingin sekali denger itoe.“
Sambil bersenjoem Pek-hoa laloe toetoerken bahoewa dalem ini satoe-doea hari ia bisa dapetken satoe akal boeat linjapken djiwanja si toea; dan kaloe Lopehoe itoe soeda binasa, boekantah iaorang boleh bersoeka-soeka dengen tida ada halangan soeatoe apa. Tegesnja iaorang boleh idoep seperti laki istri.
Ini istri jang doerdjana djadi amat girang satelah denger itoe katerangan. Maka sebagi oepah dari Pek-hoa poenja pikiran jang tadjem (?!), Giok-go lantas mameloek dan menjioem sapoewasnja hati.
„Kaloe begitoe, bener-bener kaoe ada tjinta padakoe,“ kata Ia.
Sorenja dari itoe hari, waktoe Kwa-eng poelang, Pek-hoa lantas tanja tentang oeroesan jang tadi oppasnja rapport. Hal ini Kwa-eng djawab, besok bakal dioeroes lebi djaoe, sekarang itoe persakitan-persakitan jang baroe dateng telah dimasoeki doeloe dalem pendjara.
Besoknja pagi Lie Kwa-eng laloe berpake-pake dan pergi ka kantoor, dan baroe sadja ia berangkat, Pek-hoa dan Giok-go lantas doedoek minoem arak sambil beromong-omong.
