— 275 —
Itoe tjoetjoe kaparat berkata poela:
„Tapi lagi doea-tiga hari djoega tentoe baek. Dan begitoe semboeh akoe poen maoe barangkat.“
Kwa-eng tida berkata apa-apa lagi. dan sahabisnja santap dateng satoe boedak jang membri taoe, bahoewa dari laen tempat dateng lagi bebrapa persakitan jang moesti djalanken hoekoemannja di sini.
„Baeklah,“ kata si kolot jang lantas berlaloe.
Sasoedanja tinggal berdoea-doea, Giok-go laloe berkata pada Pek-hoa:
„Kenapa kaoe bilang maoe berangkat dalem ini doea-tiga hari. Apa kaoe tega tinggalken akoe sendirian di tangannja itoe toea bangka?“
„Oh, tentoe sadja akoe tida tega,“ saoet kekasihnja sambil bersenjoem: „maka djoega akoe telah kata begitoe.“
„Akoe tida mengarti perkatahanmoe itoe.“
„Boekantah kaoe telah denger sendiri, jang Lopehoe soeroe akoe berangkat besok pagi?“
„Ja, itoelah akoe denger.“
„Nah, lantaran itoe, maka boeat toelak prentanja, akoe soeda kasi alesan sakit pinggang, dan sasoedanja pinggangkoe baek, baroe akoe berangkat.“
„Tapi mengapa kaoe tida maoe minta tempo lagi satoe-doea boelan, hanja lagi satoe doea hari sadja?“
