— 234 —
Sabelonnja Jo Liem bisa menjataken pikirannja, satoe boedak dateng membri taoe, bahoewa di loear ada dateng satoe tetamoe jang minta bertemoe pada Touw Hin. Satelah denger begitoe, Touw Hin laloe berbangkit dan permisi pada sobatnja boeat kaloear sabentaran aken katemoeken itoe orang.
Tida lama Touw Hin soeda berada di loear pondoknja.
Bener sadja di sitoe ada berdiri satoe lelaki moeda, jang katjakepannja membikin Touw Hin djadi amat kagoem. Ia tida kenali siapa adanja itoe tetamoe. Dari pakean dan dandanannja ada menjataken, kaloe boekan anak orang bangsawan, sedikitnja ada orang-orang hartawan.
Siapa? Siapatah ?? ― Itoelah ia tida kenal!
Lelaki itoe, ada saorang moeda jang berkoelit aloes dan poeti. Sapasang matanja ada tadjem dan bersorot terang. Idoengnja bangir, bibirnja mera, pengawakannja poen bagoes. Ditamba dengen pakeannja jang perlente, membikin parasnja djadi amat tjakep, betoel seperti Phoa An di djaman doeloe.
Sambil memandang itoe tetamoe, Touw Hin berpikir di hati sendiri:
„Ah, kaloe Giok-go dapet liat ini orang, tentoe hatinja boleh djadi berlompat. Orang jang tjakep soenggoe! Tapi siapalah dia, akoe tida kenal ini orang dan ia maoe, apalah bertemoe padakoe ?”
Kamoedim Touw Hin memanggoet dan tanja
